ମୁମ୍ବାଇ, ୨୦।୯ : ମହାରାଷ୍ଟ୍ରରେ ବେଦାନ୍ତ-ଫକ୍ସକନ ଚୁକ୍ତି ବନ୍ଦ ହେବା ପରେ ରାଜନୈତିକ ଆରୋପ-ପ୍ରତ୍ୟାରୋପ ବୃଦ୍ଧି ପାଇବାରେ ଲାଗିଛି। ମହାବିକାଶ ଆଘାଡ଼ି (ଏମଭିଏ )ସରକାରଙ୍କ କାରଣରୁ ଏହି ପ୍ରକଳ୍ପ ଗୁଜରାଟକୁ ଯାଇଥିବା ଭାଜପା ନେତାମାନେ ଅଭିଯୋଗ କରିଛନ୍ତି। ବିଧାନସଭାରେ ବିରୋଧୀ ଦଳର ନେତା ଅଜିତ ପାୱାର ଏହାର ଜବାବ ଦେଇଛନ୍ତି। ସେ ମହାରାଷ୍ଟ୍ର ସରକାରଙ୍କର ସମସ୍ତ ଅଭିଯୋଗକୁ ସମ୍ପୂର୍ଣ୍ଣ ମିଥ୍ୟା ବୋଲି କହିଛନ୍ତି।
ମଙ୍ଗଳବାର ମହାରାଷ୍ଟ୍ର ବିଧାନସଭା ପରିସରରେ ଅଜିତ ପାୱାର ଗଣମାଧ୍ୟମକୁ ସୂଚନା ଦେଇ କହିଛନ୍ତି ଯେ ବେଦାନ୍ତ-ଫକ୍ସକନ କମ୍ପାନୀ ଗୁଜରାଟକୁ ଯାଇଥିବା ନେଇ ଆମ ବିରୋଧରେ ଅଭିଯୋଗ ଅଣାଯାଉଛି ଯେ ଏମଭିଏ ସରକାରରେ କିଛି ଲୋକ ଟଙ୍କା ମାଗିଥିଲେ। ଏହାର ସତ୍ୟାସତ୍ୟ ଜାଣିବା ପାଇଁ ମୁଁ ଏହି ଅଭିଯୋଗର ଯାଞ୍ଚ ଲାଗି ସରକାରଙ୍କୁ ଆହ୍ବାନ କରୁଛି। କେନ୍ଦ୍ରରେ ଭାଜପା କ୍ଷମତାରେ ଅଛି, ରାଜ୍ୟରେ ଏବଂ ଅନ୍ୟାନ୍ୟ ଏଜେନ୍ସି ମଧ୍ୟ ସେମାନଙ୍କ ସହ ଅଛନ୍ତି। ସେମାନଙ୍କୁ ଅନୁସନ୍ଧାନ କରିବାକୁ ଦିଅନ୍ତୁ, ତେବେ ଅଭିଯୋଗ ସ୍ପଷ୍ଟ ହୋଇଯିବ ।
ଅଜିତ ପାୱାର କହିଛନ୍ତି ମୁଖ୍ୟମନ୍ତ୍ରୀ ଏକନାଥ ଶିନ୍ଦେ ସରକାର କ୍ଷମତାକୁ ଆସିବା ପୂର୍ବରୁ ବେଦାନ୍ତ ଗୁଜରାଟରେ ଏହାର କାରଖାନା ସ୍ଥାପନ କରିବାକୁ ନିଷ୍ପତ୍ତି ନେଇଥିଲେ ବୋଲି ଗୁଜବ ପ୍ରଚାର କରାଯାଉଛି। ଏହା ସମ୍ପୂର୍ଣ୍ଣ ମିଥ୍ୟା।
ବେଦାନ୍ତ-ଫକ୍ସକନ ପ୍ରକଳ୍ପ ଉପରେ ରାଜ୍ୟ ମୁଖ୍ୟ ଶାସନ ସଚିବଙ୍କ ନେତୃତ୍ୱରେ ଏକ ଉଚ୍ଚ କ୍ଷମତା ସମ୍ପନ୍ନ କମିଟିର ବୈଠକ ଜୁଲାଇ ୧୫ ରେ ଅନୁଷ୍ଠିତ ହୋଇଥିବାବେଳେ ଉଦ୍ଧବ ଠାକରେଙ୍କ ନେତୃତ୍ୱାଧୀନ ଏମଭିଏ ସରକାରଙ୍କୁ ଜୁନ ମାସରେ କ୍ଷମତା ଚ୍ୟୁତ କରାଯାଇଥିଲା। ଏହି ପ୍ରକଳ୍ପ ସ୍ଥାନାନ୍ତରଣରେ ଶିନ୍ଦେ ସରକାରଙ୍କ ପ୍ରଚ୍ଛନ୍ନ ହାତ ରହିଥିବା ସେ କହିଛନ୍ତି।
