ନୟାଗଡ଼ ଅଫିସ,୫।୯: ନୟାଗଡ଼ ଜିଲାରେ ଭ୍ରୂଣହତ୍ୟା ଘଟଣା ୨ୟ ଥର ସାମ୍ନାକୁ ଆସିବା ପରେ ପ୍ରଶାସନର ନିଦ ହଜିଯାଇଛି । ଏହି ଘଟଣାରେ ପ୍ରଶାସନର ପ୍ରାଥମିକ ତଦନ୍ତରେ ଅଟକ ଥିବା ଅପାଠୁଆ ନକଲି ଡାକ୍ତର ବିଶ୍ୱନାଥ ଘଡ଼େଇଙ୍କୁ ଶନିବାର ନୟାଗଡ଼ ଟାଉନ ଥାନା ପୋଲିସ ଗିରଫ ଦର୍ଶାଇ କୋର୍ଟ ଚାଲାଣ କରିଛି । ଜାମିନ ନାମଞ୍ଜୁର ପରେ ତାଙ୍କୁ ନୟାଗଡ଼ ସବ୍ଜେଲକୁ ପଠାଇ ଦିଆଯାଇଛି । ଶନିବାର ନୟାଗଡ଼ ଟାଉନ ଥାନାରେ ଆୟୋଜିତ ଏକ ଖବରଦାତା ସମ୍ମିଳନୀରେ ଅତିରିକ୍ତ ଏସ୍ପି ମାଧୁରୀ ସାମଲ ଏହି ସୂଚନା ଦେଇଛନ୍ତି ା
ଆଦିତ୍ୟ ହସ୍ପିଟାଲ ଆଣ୍ଡ କ୍ଲିନିକ୍ରେ ଗତ ଅଗଷ୍ଟ ୩୦ ଭ୍ରୂଣ ହତ୍ୟା ଘଟଣାରେ ନକଲି ଡାକ୍ତର ବିଶ୍ୱନାଥ ଘଡେଇ ସଂପୃକ୍ତି ଥିବା ପ୍ରମାଣ ମିଳିଛି । ଉକ୍ତ କ୍ଲିନିକର ମାଲିକ ସତ୍ୟପ୍ରିୟ ସ୍ବାଇଁଙ୍କୁ ଘଡେଇ ସହଯୋଗ କରିଥିଲେ । ପୂର୍ବରୁ ସଂପୃକ୍ତ ଘରୋଇ ହସ୍ପିଟାଲରେ ସେ ଭ୍ରୂଣହତ୍ୟା କରୁଥିବା ପ୍ରାଥମିକ ତଦନ୍ତରୁ ଜଣାପଡିଛି। ଏକଥା ଜଣାପଡ଼ିବା ପରେ ୩୧୨, ୩୧୩, ୪୧୭, ୩୪ ଆଇପିସି, ୫ ପ୍ରିଭେନଶନ ଟର୍ମିନେସନ ଅଫ୍ ପ୍ରେଗ୍ନେନ୍ସି ଆକ୍ଟ ଦଫାରେ ଏକ ମାମଲା(ନଂ. ୧୮୨/୨୧)ରୁଜୁ ହୋଇଛି ା ଏଥିରେ ନକଲି ଡାକ୍ତରଙ୍କ ନାମକୁ ଯୋଡି ଦିଆଯାଇଛି ବୋଲି ଆଇଆଇସି ଜୟଦୀପ ମହାନ୍ତି କହିଛନ୍ତି ।
ଅତିରିକ୍ତ ଏସ୍ପିଙ୍କ ସୂଚନା ଅନୁଯାୟୀ, ଭ୍ରୂଣହତ୍ୟାର ପ୍ରାଥମିକ ତଦନ୍ତରେ ନକଲି ଡାକ୍ତର ବିଶ୍ୱନାଥ ଘଡେଇ ଫସିଗଲେ । ସେ ଡାକ୍ତରୀ ପାଠ ନ ପଢ଼ି ନିଜକୁ ଡାକ୍ତର କହି ନୟାଗଡ଼ ସହରର ଛାୟାପଥ ଲେନ୍ରେ କଲ୍ୟାଣୀ କ୍ଲିନିକ ଖୋଲିଥିଲେ, ଯାହାକି ପଞ୍ଜୀକୃତ ନୁହେଁ। ସେହି ବେଆଇନ କ୍ଲିନିକରେ ସେ ରୋଗୀମାନଙ୍କୁ ଚିକିତ୍ସା ଓ ଅପରେଶନ କରୁଥିଲେ। ଏନେଇ ସିଡିଏମ୍ଓଙ୍କ କାର୍ଯ୍ୟାଳୟ ଅବଗତ ହେବା ପରେ ଜିଲାପାଳଙ୍କ ନିର୍ଦ୍ଦେଶରେ ତଦନ୍ତ ଟିମ୍ ତାଙ୍କ କ୍ଲିନିକ୍ରେ ଚଢ଼ାଉ କରିଥିଲା ା ଉକ୍ତ ଟିମ୍ରେ ତହସିଲଦାର, ପୋଲିସ ସାମିଲ ଥିଲେ । ତଦନ୍ତରେ ନକଲି ଡାକ୍ତର, ବେଆଇନ କ୍ଲିନିକ୍ ସମ୍ପର୍କରେ ସ୍ପଷ୍ଟ ହେବା ପରେ ସିଡିଏମ୍ଓଙ୍କ ଟିମ୍ର ସନ୍ତୋଷ ନାୟକଙ୍କ ଅଭିଯୋଗ କ୍ରମେ ନୟାଗଡ଼ ଟାଉନ ଥାନାରେ ୪୧୯, ୪୨୦, ୩୮୪, ୪୬୮ ଆଇପିସି ଦଫା, କଣ୍ଟ୍ରୋଲ ଆଣ୍ଡ ରେଗୁଲେଶନ ଆକ୍ଟ ୧୯୯୦ର ୧୬ ରେ ଏକ ମାମଲା(ନଂ.୧୮୫/୨୧) ରୁଜୁ ହୋଇଥିଲା । ଦରକାର ପଡିଲେ ନକଲି ଡାକ୍ତରଙ୍କୁ ରିମାଣ୍ଡରେ ଅଣାଯିବ ବୋଲି କହିଛନ୍ତି ଅତିରିକ୍ତ ଏସ୍ପି ା ନୟାଗଡ଼ ଏସ୍ଡିପିଓ ଶୁଭେନ୍ଦୁ ସିଂ କହିଛନ୍ତି, ନକଲି ଡାକ୍ତର ଜେଲ୍ ଯିବା ପରେ ତଦନ୍ତ ଶେଷ ହୋଇନି, ବରଂ ଆରମ୍ଭ ହୋଇଛି । ଭ୍ରୂଣହତ୍ୟା ଘଟଣାରେ ଯେଉଁମାନେ ସଂପୃକ୍ତି ଥିବେ ସେମାନଙ୍କୁ ତଦନ୍ତ ପରିସରଭୁକ୍ତ କରାଯିବ ା ଏଥିପାଇଁ ସବୁଦିଗରୁ ତଦନ୍ତ ଚାଲିଛି।
