ମୁମ୍ବାଇ, ୧୦।୯ : ମହାରାଷ୍ଟ୍ରର ୟାକୁବ ମେମନଙ୍କ କବରକୁ ମଜାର ଆକାର ଦେବାକୁ ଚେଷ୍ଟା କରିବା ବର୍ତ୍ତମାନ ଏକ ନୂଆ ରାଜନୈତିକ ମୋଡ଼ ନେଇଛି। ଏହାକୁ ନେଇ ଭାଜପା ଏବଂ ଉଦ୍ଧବ ଠାକରେଙ୍କ ଶିବସେନା ସମର୍ଥକଙ୍କ ମଧ୍ୟରେ ଆରୋପ ପ୍ରତ୍ୟାରୋପ ଜାରି ରହିଛି। ଯେତେବେଳେ ଶିବସେନା ନେତା ତଥା ୟାକୁବ ମେମନଙ୍କ ସମ୍ପର୍କୀୟ ଭାଇ ରୌଫ ମେମନଙ୍କ ଭିଡିଓ ସୋସିଆଲ ମିଡିଆରେ ଭାଇରାଲ ହୋଇଥିଲା, ସେତେବେଳେ ଭାଜପା ପୁଣିଥରେ ଉଦ୍ଧବ ସମର୍ଥକଙ୍କୁ ଟାର୍ଗେଟ କରିଥିଲା।
ଅଭିଯୋଗ ହୋଇଥିଲା ଯେ ଶିବସେନା ଆତଙ୍କବାଦୀଙ୍କ ସମ୍ପର୍କୀୟଙ୍କ ସହ ସମ୍ପର୍କ ରଖିଛି। ଏହାର ଜବାବରେ ଶିବସେନା ନେତା ତଥା ପୂର୍ବତନ ମେୟର କିଶୋରୀ ପେଡନେକର ସୋସିଆଲ ମିଡିଆରେ ଦେବେନ୍ଦ୍ର ଫଡନାଭିସ ଏବଂ ମହାରାଷ୍ଟ୍ର ରାଜ୍ୟପାଳ ଭଗତ ସିଂ କୋଶିୟାରୀଙ୍କ ଫଟୋ ସୋସିଆଲ ମିଡିଆରେ ଶେୟାର କରି ଏହାର ପ୍ରତିଶୋଧ ନେଇଛନ୍ତି। ଫଟୋରେ ଉଭୟ ନେତା ରୌଫ ମେମନଙ୍କ ସହିତ ଥିବାରୁ ଦେଖିବାକୁ ମିଳୁଛି।
ଉଦ୍ଧବ ଠାକରେ ମୁଖ୍ୟମନ୍ତ୍ରୀ ଥିବାବେଳେ ୟାକୁବ ମେମନଙ୍କ କବରକୁ ମଜାର କରିବା ପାଇଁ ଉଦ୍ୟମ କରାଯାଇଥିଲା ବୋଲି ଭାଜପା ଅଭିଯୋଗ କରିଛି। ଏହା ଉପରେ ଶିବସେନା ପକ୍ଷରୁ ଭାଜପାକୁ ପଚରା ଯାଇଛି ଯେ ଓସାମା ବିନ ଲାଦେନଙ୍କ ପରି ୟାକୁବଙ୍କ ମୃତଦେହ ସମୁଦ୍ରରେ କାହିଁକି ସମାଧି ଦିଆଗଲା ନାହିଁ।
ପେଡନେକର ତାଙ୍କ ଅଫିସିଆଲ ସୋସିଆଲ ମିଡିଆରେ ଗୋଟିଏ ପରେ ଗୋଟିଏ ଟୁଇଟ କରି ଭାଜପାକୁ ଘେରିଛନ୍ତି। ମହାରାଷ୍ଟ୍ର ରାଜ୍ୟପାଳ କୋଶୟାରୀ ଏବଂ ଫଡନାଭିସ ରୌଫ ମେମନଙ୍କୁ ସମ୍ମାନିତ କରୁଥିବାର ଫଟୋ ସେ ଶେୟାର କରିଛନ୍ତି। ପେଡନେକର ଭାଜପାକୁ ପଚାରିଛନ୍ତି ଯେ ତୁମର ନେତା ଆତଙ୍କବାଦୀଙ୍କ ସମ୍ପର୍କୀୟମାନଙ୍କ ସହିତ କ’ଣ କରୁଛନ୍ତି? ତେବେ ଭାଜପା ଏପର୍ଯ୍ୟନ୍ତ କୌଣସି ବିବୃତ୍ତି ଦେଇନାହିଁ। କିନ୍ତୁ ଏହା ନିଶ୍ଚିତ ଯେ ଯାକୁବଙ୍କ ସମାଧିରେ ଥିବା ସାଜସଜ୍ଜାକୁ ନେଇ ବିବାଦ ଆହୁରି ବଢ଼ିବାକୁ ଯାଉଛି ବୋଲି ରାଜନୈତିକ ସମୀକ୍ଷକ ମତ ପୋଷଣ କରିଛନ୍ତି ।
ସୂଚନାଯୋଗ୍ୟ, ମହାରାଷ୍ଟ୍ର ମୁଖ୍ୟମନ୍ତ୍ରୀ ଏକନାଥ ଶିନ୍ଦେ ଶୁକ୍ରବାର କହିଥିଲେ ଯେ ୧୯୯୩ ମୁମ୍ବାଇ ବିସ୍ଫୋରଣରେ ଦୋଷୀ ସାବ୍ୟସ୍ତ ହୋଇଥିବା ଯାକୁବ ମେମନ ଜଣେ ଅପରାଧୀ ଏବଂ ତାଙ୍କୁ ଗୌରବାନ୍ବିତ କରାଯାଇପାରିବ ନାହିଁ। ଆମେ ଏହାକୁ ଗ୍ରହଣ କରିବୁ ନାହିଁ କିମ୍ବା ଏହା ଘଟିବାକୁ ଦେବୁ ନାହିଁ । ମୁଁ ଏ ସମ୍ପର୍କରେ ବିଏମସି ଏବଂ ମୁମ୍ବାଇ ପୋଲିସକୁ ନିର୍ଦ୍ଦେଶ ଦେଇଛି। ଗୃହ ମନ୍ତ୍ରଣାଳୟ କଡା କାର୍ଯ୍ୟାନୁଷ୍ଠାନ ଗ୍ରହଣ କରିବ। ଗୋଟିଏ ଦିନ ପୂର୍ବରୁ ଶିନ୍ଦେ କହିଥିଲେ ଯେ କବରକୁ ସୌନ୍ଦର୍ଯ୍ୟକରଣ ପାଇଁ ତଦନ୍ତ ଆରମ୍ଭ ହୋଇଛି। ଉପ-ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟ ମୁମ୍ବାଇ ପୋଲିସକୁ ଶୀଘ୍ର ରିପୋର୍ଟ ଦାଖଲ କରିବାକୁ କହିଛନ୍ତି।
