ମହାକାଳପଡ଼ା, ୨୨ା୪ (ପ୍ରତାପ ଚନ୍ଦ୍ର ସ୍ବାଇଁ):ଜଳବାୟୁ ପରିବର୍ତ୍ତନରେ ଘଟୁଛି ପରିବର୍ତ୍ତନ। ପୂର୍ବ ଅପେକ୍ଷା ସୂର୍ଯ୍ୟଙ୍କ ଉତ୍ତାପ ବଢ଼ିଛି। ଫଳରେ ଦିନ ୧୦ଟା ସୁଦ୍ଧା ଉପକୂଳ ଅଞ୍ଚଳରେ ୩୫ ଡିଗ୍ରୀ ତାପମାତ୍ରା ବୃଦ୍ଧି ପାଇବା ଯୋଗୁ ଚିନ୍ତାରେ ଅଞ୍ଚଳବାସୀ। ମଧ୍ୟାହ୍ନ ସୁଦ୍ଧା ପାଖାପାଖି ୪୦ ଡିଗ୍ରୀ ତାପମାତ୍ରା ରହିଛି। ଅପରପକ୍ଷରେ ଶିଳ୍ପ, କାରଖାନାର ନିଅଁା, ଧୂଅଁା ବ୍ୟାପିବା ଯୋଗୁ ପ୍ରବଳ ଗ୍ରୀଷ୍ମ ପ୍ରବାହ ସହ ଅଧିକ ଉତ୍ତାପ ବୃଦ୍ଧି ପାଇଛି। କେନ୍ଦ୍ରାପଡ଼ା ଜିଲା ମହାକାଳପଡା ବ୍ଲକ ମହାନଦୀ ଅପର ଦକ୍ଷିଣ ପାର୍ଶ୍ୱର ପାରାଦୀପ ବୃହତ୍ ଶିଳ୍ପ, କାରଖାନାର ନିଅଁା, ଧୂଅଁା ଓ ପଚାଗନ୍ଧ ଭଳି ଗ୍ୟାସ ଠିକ୍ ଖରା ବଢ଼ିଲେ ବଢୁଛି। ଫଳରେ ଅଞ୍ଚଳରେ ନାହିଁ ନ ଥିବା ସମସ୍ୟା ଉପୁଜିଛି।
ଦୁଇଦିନ ପୂର୍ବରୁ ଏହି ଅଞ୍ଚଳରେ ପାରାଦୀପ ପାର୍ଶ୍ୱରୁ ଖରା ବେଳେ ପଚାଗନ୍ଧ ସହ ଧୂଅଁାମୟ ହୋଇଥିଲା। ଏହା ୨ ଘଣ୍ଟାରୁ ଅଧିକ ସମୟ ପର୍ଯ୍ୟନ୍ତ ଲଗି ରହିଲା। ଫଳରେ ସ୍ଥାନୀୟ ଲୋକମାନେ ଗରମରେ ଅଣନିଃଶ୍ୱାସୀ ଭଳି ଅନୁଭବ କରିଥିଲେ ବୋଲି ପଲ୍ଲୀ,କେନ୍ତିଆ, କୋଚିଳା, ସରୁମୁହିଁ, ବଜରପୁର, ତେନ୍ତୁଳିକନ୍ଧା, ବରକନ୍ଧା, ମଙ୍ଗଳପୁର, କୁମାରପଡ଼ା, ମଳାଢ଼ଇ, ବାରଡ଼ାଙ୍ଗ, ବଉଳକଣି, ରାମନଗର, ଖରିନାସୀ, ପେଟଛେଲା ଅଞ୍ଚଳରେ ଘନକୁହୁଡ଼ି ଭଳି ଦୃଶ୍ୟମାନ ହୋଇଥିଲା ବୋଲି ସ୍ଥାନୀୟ ଲୋକେ, ସାମାଜିକକର୍ମୀ, ବହୁ ବୁଦ୍ଧିଜୀବୀ କହିଥିଲେ। ଆଗାମୀଦିନରେ ଖରା ପରିମାଣ ବଢ଼ିବା ସହ ଶିଳ୍ପ, କାରଖାନାର ଗ୍ୟାସ, ନିଅଁା ଧୂଅଁା ବ୍ୟାପିବା ଯୋଗୁ ଚର୍ମ ରୋଗ ଆଶଙ୍କା ରହିଛି ବୋଲି ବୁଦ୍ଧିଜୀବୀ ଲକ୍ଷ୍ମୀକାନ୍ତ ସ୍ବାଇଁ, ସୁବାସ ଚନ୍ଦ୍ର ସ୍ବାଇଁ, ବିରଞ୍ଚତ୍ ନାରାୟଣ ଦାସ ପ୍ରମୁଖ କହିଛନ୍ତି। ସାଧାରଣତଃ ଛୋଟ ଛୋଟ ଶିଶୁ,ଗର୍ଭବତୀ ମହିଳା ଓ ବୟସ୍କ ଲୋକଙ୍କ ଶରୀର ଏହି ଶିଳ୍ପ କାରଖାନାର ଗ୍ୟାସ, ନିଅଁା ଧୂଅଁା ବ୍ୟାପିବା ଯୋଗୁ ସମସ୍ୟା ସୃଷ୍ଟି ହୋଇପାରେ ବୋଲି କୁହାଯାଇଛି। ବିଶେଷକରି ଶିଳ୍ପ, କାରଖାନାର ଉଚ୍ଚ କର୍ତ୍ତୃପକ୍ଷ ଠିକ୍ ଖରାଦିନରେ ଦକ୍ଷିଣ ପାର୍ଶ୍ୱରୁ ପବନ ବହିବା ସମୟରେ ଏଭଳି ହେଉଥିବା ପୂର୍ବତନ ସରପଞ୍ଚ ନାଥ କୁମାର ଭୋଳ ମତବ୍ୟକ୍ତ କରିଛନ୍ତି। ଅପରପକ୍ଷରେ ଏହି ଅଞ୍ଚଳର ନଦୀ ନାଳ ସଂଲଗ୍ନଗୁଡ଼ିକରେ ଥିବା ଲୁଣା ହେନ୍ତାଳ ଜଙ୍ଗଲଗୁଡ଼ିକରେ ଲୁଣା ଜାତୀୟ ଗଛଗୁଡ଼ିକର ପତ୍ର ଉପର ଭାଗରେ ବହଳିଆ ମୋଟା ତେଲିଆ କଳା ରଙ୍ଗର ଆସ୍ତରଣ ଜମି ଯାଉଥିବା ଦେଖିବାକୁ ମିଳୁଛି। ଯାହାଫଳରେ ଗଛଗୁଡ଼ିକ ଖାଦ୍ୟ ସଂଗ୍ରହ କରିବାରେ ବାଧା ଉପୁଜିବା ସହ ନୂଆ ପତ୍ର ବାହାରିବାରେ ବାଧା ଉପୁଜିଛି ବୋଲି ପରିବେଶବିତ୍ ସମରେନ୍ଦ୍ର ମାହାଳି ମତପ୍ରକାଶ କରିଛନ୍ତି। ଏ ସଂକ୍ରାନ୍ତରେ ପାରାଦୀପସ୍ଥିତ ରାଜ୍ୟ ପ୍ରଦୂଷଣ ନିୟନ୍ତ୍ରଣ ବୋର୍ଡ ଆଞ୍ଚଳିକ ଅଧିକାରୀ ପୁଷ୍କର କୁମାର ବେହେରାଙ୍କୁ ପଚାରିବାରେ ଶିଳ୍ପ, କାରଖାନାର ଆନୁଆଲ ଶଟ ଡାଉନ୍ କ୍ଲିଅରାନ୍ସ ମାର୍ଚ୍ଚ ଶେଷ ଓ ଏପ୍ରିଲ ପ୍ରଥମ ସପ୍ତାହରେ ହୋଇଥାଏ। ଯାହାଫଳରେ ଏହିଭଳି ଅବସ୍ଥା ଦେଖାଦିଏ। ପରେ ଦିନେ ୨ ଦିନ ମଧ୍ୟରେ ପୂର୍ବ ସ୍ଥିତି ଫେରିଆସେ ବୋଲି ସେ କହିଛନ୍ତି।
