ଢାକା,୯।୪: ଗତ ବର୍ଷ ଭାରତ-ବାଂଲାଦେଶ ସମ୍ପର୍କରେ ଉତ୍ତେଜନା ଶୀର୍ଷରେ ପହଞ୍ଚିବା ପରେ ବାଂଲାଦେଶ ଏବେ ସମ୍ପର୍କ ଉନ୍ନତ କରିବା ପାଇଁ ପଦକ୍ଷେପ ନେଉଛି। ଏହି ପରିପ୍ରେକ୍ଷୀରେ ବାଂଲାଦେଶର ବୈଦେଶିକ ମନ୍ତ୍ରୀ ଖଲିଲୁର ରହମାନ ତାଙ୍କର ପ୍ରଥମ ବିଦେଶ ଗସ୍ତରେ ଭାରତରେ ପହଞ୍ଚିଛନ୍ତି ଏବଂ ଅନେକ ଶୀର୍ଷ ନେତାଙ୍କ ସହ ସାକ୍ଷାତ କରିଛନ୍ତି।
ବାଂଲାଦେଶର ବୈଦେଶିକ ମନ୍ତ୍ରୀ ଖଲିଲୁର ରହମାନ ଭାରତର ବୈଦେଶିକ ମନ୍ତ୍ରୀ ଏସ. ଜୟଶଙ୍କର ଏବଂ ଜାତୀୟ ସୁରକ୍ଷା ପରାମର୍ଶଦାତା ଅଜିତ ଡୋଭାଲ ସମେତ ଅନେକ ଅଧିକାରୀଙ୍କ ସହ ସାକ୍ଷାତ କରିଛନ୍ତି। ଢାକା ଦ୍ୱାରା ଜାରି ଏକ ବିବୃତ୍ତି ଅନୁଯାୟୀ, ଜୟଶଙ୍କରଙ୍କ ସହ ତାଙ୍କର ସାକ୍ଷାତ ସମୟରେ ରହମାନ ପୂର୍ବତନ ବାଂଲାଦେଶୀ ପ୍ରଧାନମନ୍ତ୍ରୀ ଶେଖ ହାସିନା ଏବଂ ପୂର୍ବତନ ଗୃହମନ୍ତ୍ରୀ ଅସଦୁଜ୍ଜମାନ ଖାନ କମଲଙ୍କ ପ୍ରତ୍ୟର୍ପଣ ପାଇଁ ଅନୁରୋଧକୁ ପୁନର୍ବାର ଦୋହରାଇଥିଲେ। ଭାରତ ଏହି ଅନୁରୋଧର କୌଣସି ଉତ୍ତର ଦେଇ ନ ଥିଲା।
ରହମାନ କହିଛନ୍ତି ଯେ, ପ୍ରଧାନମନ୍ତ୍ରୀ ତାରିକ ରହମାନଙ୍କ ନେତୃତ୍ୱରେ ବାଂଲାଦେଶ ନ୍ୟାଶନାଲିଷ୍ଟ ପାର୍ଟି (BNP) ସରକାର ‘ବାଂଲାଦେଶ ପ୍ରଥମେ’ ନୀତି ଉପରେ ଆଧାରିତ ଏହାର ବୈଦେଶିକ ନୀତି ପରିଚାଳନା କରିବ। ଏହି ନୀତି ପାରସ୍ପରିକ ବିଶ୍ୱାସ, ସମ୍ମାନ ଏବଂ ପାରସ୍ପରିକ ଲାଭ ଉପରେ ଆଧାରିତ ହେବ। ଛାତ୍ର ନେତା ସରିଫ ଉସମାନ ହାଦିଙ୍କ ହତ୍ୟାକାଣ୍ଡରେ ସମ୍ପୃକ୍ତ ଅଭିଯୁକ୍ତଙ୍କୁ ଗିରଫ କରିବା ପାଇଁ ରହମାନ ଭାରତ ସରକାରଙ୍କ ପ୍ରତି କୃତଜ୍ଞତା ମଧ୍ୟ ପ୍ରକାଶ କରିଥିଲେ।
ବାଂଲାଦେଶୀ ବିବୃତ୍ତିରେ ଉଲ୍ଲେଖ କରାଯାଇଛି ଯେ, ଉଭୟ ପକ୍ଷ ସହମତ ହୋଇଛନ୍ତି ଯେ ଗିରଫ ବ୍ୟକ୍ତିମାନଙ୍କୁ ଦୁଇ ରାଷ୍ଟ୍ର ମଧ୍ୟରେ ପ୍ରତ୍ୟର୍ପଣ ଚୁକ୍ତିରେ ବର୍ଣ୍ଣିତ ପ୍ରକ୍ରିୟା ଅନୁଯାୟୀ ବାଂଲାଦେଶକୁ ହସ୍ତାନ୍ତର କରାଯିବ। ତଥାପି, ଭାରତର ବୈଦେଶିକ ବ୍ୟାପାର ମନ୍ତ୍ରଣାଳୟ ଦ୍ୱାରା ଜାରି ବିବୃତ୍ତିରେ ଶେଖ ହାସିନା କିମ୍ବା ହାଦି ସମ୍ପର୍କିତ ପ୍ରସଙ୍ଗଗୁଡ଼ିକର କୌଣସି ଉଲ୍ଲେଖ କରାଯାଇ ନାହିଁ।
ଏହା ଉଲ୍ଲେଖନୀୟ ଯେ, ଅଗଷ୍ଟ ୨୦୨୪ରେ ବାଂଲାଦେଶରେ ଘଟିଥିବା ହିଂସାତ୍ମକ ପ୍ରତିବାଦ ପରେ, ତତ୍କାଳୀନ ପ୍ରଧାନମନ୍ତ୍ରୀ ଶେଖ ହାସିନା ତାଙ୍କ ପଦବୀ ଏବଂ ଦେଶ ଉଭୟ ପରିତ୍ୟାଗ କରିବାକୁ ବାଧ୍ୟ ହୋଇଥିଲେ। ସେ ସେବେଠାରୁ ସେ ନୂଆଦିଲ୍ଲୀରେ ରହୁଛନ୍ତି। ବାଂଲାଦେଶରେ ଶେଖ ହାସିନା ଏବଂ ପୂର୍ବତନ ଗୃହମନ୍ତ୍ରୀ ଉଭୟଙ୍କୁ ଅନ୍ତର୍ଜାତୀୟ ଅପରାଧ ଟ୍ରିବ୍ୟୁନାଲ ଦ୍ୱାରା ମୃତ୍ୟୁଦଣ୍ଡ ଦିଆଯାଇଛି। ବାଂଲାଦେଶ ପୂର୍ବରୁ ଶେଖ ହାସିନାଙ୍କ ପ୍ରତ୍ୟର୍ପଣ ଦାବି କରିଆସିଛି; ମହମ୍ମଦ ୟୁନୁସଙ୍କ ନେତୃତ୍ୱରେ ପୂର୍ବ ସରକାର ମଧ୍ୟ ଭାରତକୁ ଏହି ଅନୁରୋଧ କରିଥିଲେ, କିନ୍ତୁ ଭାରତ ଏହାକୁ ଗ୍ରହଣ କରି ନ ଥିଲା। ଭାରତ ଏବଂ ବାଂଲାଦେଶ ଏବେ ଏକମତରେ ପହଞ୍ଚିଛନ୍ତି ଯେ, ଶେଖ ହସିନାଙ୍କ ସମ୍ପର୍କିତ ପ୍ରସଙ୍ଗ ଦୁଇ ରାଷ୍ଟ୍ର ମଧ୍ୟରେ ସମ୍ପର୍କକୁ ପ୍ରଭାବିତ କରିବ ନାହିଁ।
ସୂତ୍ର ଅନୁଯାୟୀ, ଉଭୟ ଏସ. ଜୟଶଙ୍କର ଏବଂ ଖଲିଲୁର ରହମାନ ଏକମତ ହୋଇଛନ୍ତି ଯେ,ଭାରତରେ ଶେଖ ହସିନାଙ୍କ ଉପସ୍ଥିତି ଦ୍ୱିପାକ୍ଷିକ ସମ୍ପର୍କରେ ପ୍ରତିବନ୍ଧକ ହେବା ଉଚିତ୍ ନୁହେଁ। ବାଂଲାଦେଶର ମଧ୍ୟବର୍ତ୍ତୀକାଳୀନ ସରକାରଙ୍କ କାର୍ଯ୍ୟକାଳ ସମୟରେ ଦେଖାଦେଇଥିବା ଉତ୍ତେଜନାକୁ ପଛରେ ପକାଇ, ଉଭୟ ପକ୍ଷ ସହଯୋଗ ପାଇଁ ନୂତନ ରାସ୍ତା ଅନୁସନ୍ଧାନ କରିବା ଉପରେ ବିସ୍ତୃତ ଆଲୋଚନା କରିଥିଲେ।
Dharitri – Odisha’s No.1 Odia Daily
