ନୟାଗଡ଼ ଅଫିସ,୧୬।୫: ନୟାଗଡ଼ ଜିଲା ସଦର ମହକୁମାରେ ଘରୋଇ କ୍ଲିନିକ୍ କର୍ମକର୍ତ୍ତାଙ୍କ ମନମାନି ଉପରେ ଲଗାମ ଦେବାରେ ସ୍ବାସ୍ଥ୍ୟ ବିଭାଗ ବିଫଳ ହୋଇଛି । ଭଲ ସ୍ବାସ୍ଥ୍ୟସେବା ପାଇବା ପାଇଁ ଘରୋଇ କ୍ଲିନିକ୍ ମୁହଁା ରୋଗୀ ଉପଯୁକ୍ତ ସେବା ନ ପାଇ ଶୋଷଣର ଶିକାର ହେଉଛନ୍ତି। ଅନ୍ୟପକ୍ଷେ କେତେକ କ୍ଲିନିକ୍ର ପ୍ରୋପାଇଟର ଡାକ୍ତରଙ୍କ ଭୂମିକା ତୁଲାଇ ବେକରେ ଟ୍ରୋଥୋ ପକାଇ ରୋଗୀ ଦେଖୁଛନ୍ତି । ନକଲି ଡାକ୍ତର ଉପରେ କାର୍ଯ୍ୟାନୁଷ୍ଠାନ ଓ ଭ୍ରୁଣ ହତ୍ୟା ଘଟଣାର ଇତିମଧ୍ୟରେ ୧୬ ମାସ ବିତିଥିଲେ ମଧ୍ୟ କୌଣସି ପରିବର୍ତ୍ତନ ଘଟି ନାହିଁ ।
ଜିଲା ସଦର ମହକୁମାରେ ୧୬ ଘରୋଇ କ୍ଲିନିକ ସରକାରୀ ଖାତାରେ ପଞ୍ଜିକରଣ ହୋଇଛି । ହେଲେ ଅଧିକାଂଶ ଘରୋଇ କ୍ଲିନିକର ପ୍ରୋପାଇଟର ରୋଗୀ ଦେଖୁଛନ୍ତି ଓ ଔଷଧ ଖାଇବାକୁ ରୋଗୀଙ୍କୁ ଲେଖି ପରାମର୍ଶ ଦେଉଛନ୍ତି। ବେଳେବେଳେ ଅପରେଶନ ବି କରୁଛନ୍ତି। ନକଲି ଡାକ୍ତର ଗିରଫ ଓ ଭ୍ରୁଣହତ୍ୟା ଘଟଣାର ୧୬ ମାସ ପରେ ଚଢ଼ାଉ ନ ଥିବାରୁ କ୍ଲିନିକ୍ଗୁଡ଼ିକରେ ପୁଣି ଭ୍ରୁଣହତ୍ୟା ଚାଲିଛି ା ଏବାବଦରେ ଭଲ ରୋଜଗାର କରୁଥିବା ଅଭିଯୋଗ ହେଉଛି । ନୟାଗଡ଼ ସହରର ୫ ନାମୀଦାମୀ କ୍ଲିନିକ୍ ଏପରି କାରନାମା ବେଶି ହେଉଛି ବୋଲି ଅଭିଯୋଗ ଉଠିଛି । ତେବେ ୬ କ୍ଲିନିକ୍ରୁ ଗୋଟିଏ କ୍ଲିନିକ୍ ଫସି ଯାଇଛି । ଗତ ୨୦୧୪ଜୁଲାଇ, ୨୦୨୦ ଅଗଷ୍ଟ ଓ ୨୦୨୧ ଡିସେମ୍ବର ଶେଷ ସପ୍ତାହରେ ଭ୍ରୁଣ ହତ୍ୟା ଅଭିଯୋଗ ପ୍ରମାଣିତ ହୋଇସାରିଛି । ୨୦୨୧ ଡିସେମ୍ବର ଶେଷ ସପ୍ତାହରେ ଆଦିତ୍ୟ ହସ୍ପିଟାଲ ଆଣ୍ଡ କ୍ଲିନିକ୍ର ମାଲିକ ବକଳବନ୍ଧ ଗଁାର ସତ୍ୟପ୍ରିୟ ସ୍ବାଇଁ ଗିରଫ ହୋଇ ଜେଲ ଯାଇଥିଲେ । ଉକ୍ତ କ୍ଲିନିକ୍କୁ ଯାଉଥିବା ନକଲି ଡାକ୍ତର ବିଶ୍ୱନାଥ ଘଡେଇଙ୍କୁ ମଧ୍ୟ ଜେଲ ହୋଇଥିଲା । ଏହାପରେ ଯେଉଁ ପରିବର୍ତ୍ତନ ଆଶା ଥିଲା ତାହା ଆଶାରେ ହିଁ ରହି ଯାଇଛି । କାରଣ ଭ୍ରୁଣହତ୍ୟା ଧରା ପଡିବା ସମୟରେ ଚଢ଼ାଉ ତ୍ୱରାନ୍ବିତ ହେଉଛି । ପରେ ଚଢ଼ାଉ ଶୀତଳଭଣ୍ଡାରକୁ ଚାଲି ଯାଇଛି । ଅନ୍ୟପକ୍ଷେ ହାତଗଣତି କ୍ଲିନିକ ମାଲିକ ରାଜନୈତିକ ନେତା, ସ୍ବାସ୍ଥ୍ୟ ବିଭାଗର ଅଧିତ୍କାରୀ ଓ ପ୍ରଶାସକଙ୍କୁ ଧରାଧରି କରି ବେଆଇନ ଭାବେ ଲକ୍ଷାଧିକ ଟଙ୍କା ରୋଜଗାର କରୁଛନ୍ତି। ଏନେଇ ଆଇନଜିବୀ ରଣଜିତ୍ ଦାଶ କୁହନ୍ତି, ନୟାଗଡ଼ ସହରର ଅନେକ ଘରୋଇ କ୍ଲିନିକ୍ ବେଆଇନ ଭାବେ ରୋଗୀଙ୍କୁ ଶୋଷଣ କରି ଚାଲିଛନ୍ତି । ସେମାନଙ୍କ ବେଆଇନ କାରନାମା ନେଇ ଜିଲା ସ୍ବାସ୍ଥ୍ୟ ବିଭାଗ ଅବଗତ ଥିଲେ ବି କାର୍ଯ୍ୟାନୁଷ୍ଠାନ ନାହିଁ । ଘରୋଇ କ୍ଲିନିକ୍ ପ୍ରୋପାଇଟର ରୋଗୀ ଦେଖୁଥିଲେହେଁ କାର୍ଯ୍ୟାନୁଷ୍ଠାନ ନାହିଁ । ତଦନ୍ତ ପାଇଁ ଦାବି ହେଉଥିଲେ ମଧ୍ୟ ସ୍ବାସ୍ଥ୍ୟ ବିଭାଗ ଚେଇଁ ଶୋଇଛି । ଏପରି ଅଭିଯୋଗ ମୁଁ ବହୁ ଦିନ ହେଲା କରି ଆସୁଥିଲେ ମଧ୍ୟ ସୁଫଳ ମଳୁନି । ଭାପୁରର ଦିନମଣି ସ୍ବାଇଁ, ଖଣ୍ଡପଡ଼ାର ରାମଚନ୍ଦ୍ର ସାହୁ, ଦଶପଲ୍ଲାର ବିଷ୍ଣୁ ନାୟକ କୁହନ୍ତି, ସରକାରୀ ସ୍ବାସ୍ଥ୍ୟ କେନ୍ଦ୍ରରେ ସ୍ବାସ୍ଥ୍ୟ ସେବା ମିଳୁନି । ଘରୋଇ କ୍ଲିନିକ୍କୁ ଗଲେ ସେଠାରେ ଲୁଟ୍ ଚାଲିଛି । ଘରୋଇ କ୍ଲିନିକରେ ଡାକ୍ତର ଅପରେଶନ କରୁଥିଲେ ହେଁ ପ୍ରୋପାଇଟର ଓ ଅନ୍ୟ କିଛି କର୍ମଚାରୀ ଡାକ୍ତର କାମ ଚଳାଇ ନେଉଛନ୍ତି । ନିଜେ ସବୁ କିଛି କରି ଅଧିକ ଟଙ୍କା ଦାବି କରୁଛନ୍ତି । ଡାକ୍ତରୀ ପାଠ ନ ପଢ଼ି କିପରି କେତେଜଣ ବ୍ୟକ୍ତି ସ୍ବାସ୍ଥ୍ୟ ସେବା କରୁଥିଲେ ମଧ୍ୟ ସେନେଇ ତଦନ୍ତ କି କାର୍ଯ୍ୟାନୁଷ୍ଠାନ ନାହିଁ । କେତେବେଳେ କିଛି ଅଘଟଣ ଘଟିଲେ କିଏ ଦାୟୀ ହେବ ବୋଲି ପ୍ରଶ୍ନ ଉଠାଇଛନ୍ତି । ସିଡିଏମ୍ଓ ମକରନ୍ଦ ବେଉରା କୁହନ୍ତି, ଘରୋଇ କ୍ଲିନିକ୍ କର୍ତ୍ତୃପକ୍ଷଙ୍କ ମନମାନି ନଜରକୁ ଆସୁଛି । ହେଲେ ପ୍ରମାଣ ମିଳୁନି । ତଥାପି ସ୍ବାସ୍ଥ୍ୟ ବିଭାଗ ପକ୍ଷରୁ ଚଢ଼ାଉ କରାଯାଉଛି ଓ କରାଯିବ। ଅଭିଯୋଗ ମିଳିଲେ ତଦନ୍ତ କରାଯିବ ବୋଲି ପ୍ରତିଶ୍ରତି ଦେଇଛନ୍ତି ା
