ପୁରୁଷୋତ୍ତମପୁର,୬।୪(ସବିତା ମିଶ୍ର): ଗଞ୍ଜାମ ଜିଲା ପୁରୁଷୋତ୍ତମପୁର ସହର ମଧ୍ୟରେ ପରିତ୍ୟକ୍ତ ଅବସ୍ଥାରେ ରହିଥିବା ଐତିହାସିକ ଗୋପାଳ ବନ୍ଧକୁ ନେଇ ଦୀର୍ଘଦିନ ହେଲା ସବୁବର୍ଗରୁ ଅସନ୍ତୋଷ ଲାଗିରହିଥିଲା। ତେବେ ଏହାର ସୌନ୍ଦର୍ଯ୍ୟକରଣ ଲାଗି ଅଣ୍ଟା ଭିଡିଛନ୍ତି ନିର୍ବାହୀ ଅଧିକାରୀ ସଙ୍ଗୀତା ସେଠୀ ସୋମବାର ସେ ଗୋପାଳ ବନ୍ଧ ନିକଟକୁ ଯାଇ ପାରିପାର୍ଶ୍ୱିକ ସ୍ଥିତିକୁ ପରଖିବା ସହ ସହରର ଜନସାଧାରଣ, ଜନପ୍ରତିନିଧିଙ୍କ ସହ ସୌନ୍ଦର୍ଯ୍ୟକରଣ ସମ୍ପର୍କରେ ଆଲୋଚନା କରି କିପରି ଏହାର ଉନ୍ନତିକରଣ ହେବ ସେନେଇ ସମସ୍ତଙ୍କ ପରାମର୍ଶ ନେଇଛନ୍ତି। ଏହି ସମୟରେ ପୋଖରୀ ହିଡରେ କିଛି ବ୍ୟକ୍ତି ବେଆଇନଭାବେ ଜବରଦଖଲ କରି ରହି ପାଇଖାନାର ମଇଳାପାଣି ସହ ବର୍ଜ୍ୟବସ୍ତୁ ପୋଖରୀକୁ ଛାଡୁଥିବାହେତୁ ତୁରନ୍ତ ସେମାନଙ୍କୁ ଉଚ୍ଛେଦକରି ଜବରଦଖଲ ମୂକ୍ତକରିବାକୁ ଜନସାଧାରଣ ଦାବି କରିଥିଲେ। ଏହାକୁ ନେଇ ନିର୍ବାହୀ ଅଧିକାରୀ ଜବରଦଖଲକାରୀଙ୍କ ନିକଟକୁ ଯାଇ ବୁଲି ଦେଖିବା ସହ ପାଇଖାନାପାଣି ଓ ଆବର୍ଜନା ନ ପକାଇବାଲାଗି କଡା ଚେତାବନୀ ଦେଇଛନ୍ତ। ଏହାସହ ପୋଖରୀରେ ପାଣିର ଆବଶ୍ୟକତା ଦୃଷ୍ଟିରୁ ଦୁଇଟି ଉଚ୍ଚକ୍ଷମତା ସମ୍ପର୍ଣ୍ଣ ବୋରୱେଲ ନିର୍ମାଣ କରିବା, ପୋଖରୀରେ ପଡିରହିଥିବା ଆବର୍ଜନାକୁ ବାହାରକରି ଦୂଷିତ ପାଣିକୁ ଡ୍ରେନେଜ କରିବା ସହ ରାସ୍ତାପାଶର୍ବରେ ବିପଦପୂର୍ଣ୍ଣ ଭାବରେ ରହିଥିବା ତୁଠର ନିର୍ମାଣ କରି ଚତୁଃପାଶର୍ବକୁ ଆଲୋକିକରଣ କରି ପାର୍କ ନିର୍ମାଣ ପାଇଁ ଲୋକେ ନିର୍ବାହୀ ଅଧିକାରୀଙ୍କୁ ଅନୁରୋଧ କରିଥିଲେ।
ଏଥିପ୍ରତି ଯଥା ସମ୍ଭବ ପଦକ୍ଷେପ ନେବାକୁ ନିର୍ବାହୀ ଅଧିକାରୀ ପ୍ରତିଶ୍ରୁତି ଦେଇଥିଲେ। ଏଥିରେ ଅଧ୍ୟକ୍ଷ କୃଷ୍ଣଚନ୍ଦ୍ର ପଣ୍ଡାଙ୍କ ସମେତ ବହୁ ଜନପ୍ରତିନିଧି ଉପସ୍ଥିତଥିଲେ।
ସୂଚନାଯୋଗ୍ୟ, କିଛିମାସହେଲା ଗୋପାଳ ବନ୍ଧ ହିଡରେ ଫୁଡକୋର୍ଟ ନିର୍ମାଣକୁ ସହରବାସୀଙ୍କ ସମେତ ବୁଦ୍ଧିଜୀବୀ, ବରିଷ୍ଠ ନାଗରିକ ଓ ବିଭିନ୍ନ ସଂଗଠନ ପକ୍ଷରୁ ତୀବ୍ର ବିରୋଧ କରିବା ସହ ସେଠାରେ ପୂର୍ବ ପ୍ରସ୍ଥାବିତ ପ୍ରକାରେ ପାର୍କ ନିର୍ମାଣ ଲାଗି ଦାବିକରି ଆସୁଛନ୍ତି। ଏପରିକି ଯଦି ଫୁଡକୋର୍ଟ ନିର୍ମାଣ କରାଯାଏ ତେବେ ଆନ୍ଦୋଳନ ସହ ଅଦାଲତର ଆଶ୍ରୟ ନେବାକୁ ଏନ୍ଏସି ପ୍ରଶାସନକୁ ଚେତାବନୀ ଦେଇ ସହରବାସୀ ସଜାଗ ହୋଇ ରହିଛନ୍ତି। ଏଣୁ ଏନଏସି ପ୍ରଶାସନ ସହରବାସୀଙ୍କ ସ୍ବାର୍ଥକୁ ଗୁରୁତ୍ୱ ଦେବ ନା ନିଜର ରାଜସ୍ବ ଆଦାୟପ୍ରତି ଗୁରୁତ୍ୱ ଦେବ ସେ ନେଇ ଏକପ୍ରକାର ହରଡଘଣାରେ ପଡିଯାଇଛନ୍ତି । ଯାହାକୁନେଇ ଏଠାରେ ଏକପ୍ରକାର ବିବାଦୀୟ ପରିସ୍ଥିତି ଲାଗିରହିଛି।
