କଟକ,୧୦ା୬(କାର୍ତ୍ତିକ ସାହୁ): ବେଆଇନ ଭାବେ ଗାଡ଼ିରେ ନାଲିବତୀ ବ୍ୟବହାରକୁ ବିରୋଧ କରି ରୁଜୁ ଜନହିତ ମାମଲାରେ ସୁପ୍ରିମକୋର୍ଟଙ୍କ ନିର୍ଦ୍ଦେଶ କାର୍ଯ୍ୟକାରୀ କରିବାକୁ ହାଇକୋର୍ଟ ରାଜ୍ୟ ସରକାରଙ୍କୁ ଆଦେଶ ଦେଇଛନ୍ତି। ଭାରତୀୟ ବିକାଶ ପରିଷଦ ପକ୍ଷରୁ ରୁଜୁ ମାମଲାର ଶୁଣାଣି କରି ମୁଖ୍ୟ ଶାସନ ସଚିବ ଓ ବାଣିଜ୍ୟ ପରିବହନ ବିଭାଗ ସଚିବଙ୍କୁ ହାଇକୋର୍ଟ ଏହି ନିର୍ଦ୍ଦେଶ ଦେଇଛନ୍ତି।
ସୂଚନା ଅନୁସାରେ, କେନ୍ଦ୍ର ସରକାର ମୋଟରଯାନ ନିୟମାବଳୀ ୧୯୮୯କୁ ୨୦୧୭ରେ ନିୟମ ୧୦୮ର ସଂଶୋଧନ ଓ ସୁପ୍ରିମକୋର୍ଟଙ୍କ ଆଦେଶ ମୁତାବକ କେନ୍ଦ୍ର ସରକାରଙ୍କ ବିଜ୍ଞପ୍ତିରେ କୌଣସି ବିପର୍ଯ୍ୟୟ ସମୟରେ ଜରୁରୀକାଳୀନ କାର୍ଯ୍ୟ ପାଇଁ ରାଜ୍ୟ ସରକାରଙ୍କ କେଉଁ କେଉଁ ପଦାଧିକାରୀ ନାଲିବତୀ ଗାଡ଼ି ବ୍ୟବହାର କରିବେ ତାହା ସ୍ଥିର କରିବେ ବୋଲି ଦର୍ଶାଯାଇଛି।
ଏପରି ଆଦେଶନାମାକୁ ବେଖାତିର କରି ବିପର୍ଯ୍ୟୟ ସମୟ ବାଦ୍ ସବୁ ସମୟରେ ରାଜ୍ୟର ଅଧିକାଂଶ ବିଡ଼ିଓ, ତହସିଲଦାର, ଉପଜିଲାପାଳ, ଅତିରିକ୍ତ ଜିଲାପାଳ, ଜିଲାପାଳ, ପୋଲିସ ଅଧିକାରୀ, ରାଜସ୍ବ କମିଶନର, ମହାନଗର ନିଗମ କମିଶନର, ମୁନିସିପାଲିଟି ଅଧିକାରୀଙ୍କ ସମେତ ବିଜ୍ଞାପିତ ଅଞ୍ଚଳ ଅଧିକାରୀମାନେ ସୁପ୍ରିମକୋର୍ଟଙ୍କ ଆଦେଶ ଉଲଂଘନ କରି ନାଲିବତୀ ଗାଡ଼ି ବ୍ୟବହାର କରୁଛନ୍ତି। ଆବେଦନକାରୀ ଏହା ବିରୋଧରେ ରାଜ୍ୟ ସରକାରଙ୍କୁ ସ୍ମାରକପତ୍ର ପ୍ରଦାନ କରିଥିଲେ ମଧ୍ୟ ରାଜ୍ୟ ସରକାର କୌଣସି କାର୍ଯ୍ୟାନୁଷ୍ଠାନ ଗ୍ରହଣ କଲେ ନାହିଁି। ଫଳରେ ପରିଷଦ ପକ୍ଷରୁ ହାଇକୋର୍ଟରେ ଜନହିତ ମାମଲା ରୁଜୁ କରାଯାଇଥିଲା। ଏଥିରେ ମୁଖ୍ୟ ଶାସନ ସଚିବ, ପରିବହନ ଓ ବାଣିଜ୍ୟକର ବିଭାଗର ପ୍ରମୁଖ ଶାସନ ସଚିବ ଓ ରାଜ୍ୟ ପରିବହନ କର୍ତ୍ତୃପକ୍ଷ ଆଦିଙ୍କୁ ପକ୍ଷଭୁକ୍ତ କରାଯାଇଥିଲା। ଆବେଦନକାରୀଙ୍କ ପକ୍ଷରୁ ଆଇନଜୀବୀ ଗୋପାଳ ପ୍ରସାଦ ଜେନା ମାମଲା ପରିଚାଳନା କରୁଥିଲେ।
