ପାରାଦୀପ,୧୪।୩(ସ୍ବ.ପ୍ର.):ପାରାଦୀପ ବାହାକୁଦ ଘାଟରୁ ନୂଆଗଡ ପଞ୍ଚାୟତ ଚଉମୁହାଣି ପର୍ଯ୍ୟନ୍ତ ମହାନଦୀ ସଲଗ୍ନ ଜମିରୁ କିଛି ଦିନ ହେବ ବିପୁଳ ପରିମାଣର ମାଟି ଖନନ କରାଯାଇ ବିକ୍ରି ହେଉଛି। ଉକ୍ତ ଜମିକୁ ଅଧିଗ୍ରହଣ କରିବା ପାଇଁ ଏଏମ୍ଏନ୍ଏସ୍ (ଆର୍ସେଲର ମିତ୍ତଲ ନିପ୍ପନଷ୍ଟିଲ)କମ୍ପାନୀ ବିଜ୍ଞପ୍ତି ଜାରି କରିବା ପରଠୁ ଏଭଳି କାର୍ଯ୍ୟ ହେଉଛି। ସ୍ଥାନୀୟ ଅଞ୍ଚଳର କେତେଜଣ ପ୍ରଭାବଶାଳୀ ବ୍ୟକ୍ତିଙ୍କ ଏଥିରେ ସମ୍ପୃକ୍ତି ଥିବା ଜଣାପଡ଼ିଛି। ଏହାସତ୍ତ୍ୱେ ସ୍ଥାନୀୟ ଲକ୍ ଥାନା ପୋଲିସ କିମ୍ବା କୁଜଙ୍ଗ ତହସିଲ ପକ୍ଷରୁ କୌଣସି କାର୍ଯ୍ୟାନୁଷ୍ଠାନ ନିଆଯାଉନାହିଁ।
ସୂଚନାଯୋଗ୍ୟ, ନୂଆଗଡ ପଞ୍ଚାୟତ ମୂଷାଡିଆ ମୌଜାର ପ୍ରାୟ ୧୨ଶହ ଏକରରୁ ଅଧିକ ଜମି ଏସାରଷ୍ଟିଲ କମ୍ପାନୀ ନେବ ବୋଲି ୨୦୦୮-୨୦୦୯ରେ ନିଷ୍ପତ୍ତି ହୋଇଥିଲା। ଉକ୍ତ ଜମିରୁ ଅର୍ଦ୍ଧାଧିକ ଅଞ୍ଚଳ ଏପର୍ଯ୍ୟନ୍ତ ଫାଙ୍କା ପଡ଼ିଛି। ୨୦୧୯ ଫେବୃୟାରୀରେ ଏସାରଷ୍ଟିଲ କମ୍ପାନୀକୁ ଏଏମ୍ଏନ୍ଏସ୍ ଅଧିଗ୍ରହଣ କରିଛି। ଉକ୍ତ କମ୍ପାନୀ ଏବେ ପ୍ଲାଣ୍ଟର ସମ୍ପ୍ରସାରଣ ଓ କ୍ଷମତା ବୃଦ୍ଧି ପାଇଁ ଭିତ୍ତିଭୂମି ସଜାଡ଼ୁଛି। ଏହି କ୍ରମରେ ନୂଆଗଡ, ମୂଷାଡିଆ, ହାଣ୍ଡିଆ, ବାଲିଡିଆ, ଚଉମୁହାଣି ଗ୍ରାମ ପଛ ଏବଂ ମହାନଦୀ ସଲଗ୍ନ ଅଞ୍ଚଳରେ କମ୍ପାନୀ ଉଚ୍ଚ ବନ୍ଧ କରିବା ସହ କଙ୍କ୍ରିଟ ପାଚେରୀ ନିିର୍ମାଣ କାର୍ଯ୍ୟ ଆରମ୍ଭ କରିଛି। ଏଥିସହ ଫାଙ୍କା ଥିବା ଜମିକୁ ଅଧିଗ୍ରହଣ କରିବା ପାଇଁ ନୋଟିସ ଜାରି କରିଛି। ଏହା ପରଠୁ ଉକ୍ତ ଜମିରୁ ପ୍ରତି ରାତିରେ ଜେସିବି ସାହାଯ୍ୟରେ ମାଟି ଖୋଳା ଚାଲିଛି। ଏଠାରୁ ପ୍ରାୟ ୨୦୦ ରୁ ୩୦୦ ଟ୍ରିପ ମାଟି ଖୋଳାଯାଇ ବିକ୍ରି କରାଗଲାଣି ବୋଲି ସ୍ଥାନୀୟ ସରପଞ୍ଚ ଦେବେନ୍ଦ୍ର ରାଉତ କହିଛନ୍ତି। ଏ ନେଇ ସେ କୁଜଙ୍ଗ ତହସିଲଦାର ଓ ଲକ୍ଥାନା ପୋଲିସକୁ ଅବଗତ କରାଇଛନ୍ତି ବୋଲି ସୂଚନା ଦେଇଛନ୍ତି। ଅପରପକ୍ଷେ ଏହି ଘଟଣାରେ କେତେଜଣ ପୋଲିସ କର୍ମଚାରୀଙ୍କ ସମ୍ପୃକ୍ତି ଥିବା ଚର୍ଚ୍ଚା ହେଉଛି।
ମାଟି ବିକ୍ରି କରୁଥିବା ଲୋକଙ୍କ କହିବା କଥା ହେଲା, କମ୍ପାନୀ ଜମି ନେବ। ଏହାପୂର୍ବରୁ ସେଠାରୁ ମାଟି ତାଡ଼ି ବିକ୍ରି କରିଦେଲେ ଜମିର ମୂଲ୍ୟ କମିବ ନାହିଁ ବରଂ ରୋଜଗାର ହେବ। ଏ ସମ୍ପର୍କରେ ଏଏମ୍ଏନ୍ଏସ୍ କମ୍ପାନୀ ଭିପି (ଉପସଭାପତି)ଏମ.କେ.ଠାକୁର
କହିଛନ୍ତି, ଜିଲା ପ୍ରଶାସନ ଏହାକୁ ଦେଖିବା କଥା। ଆମେ ସୂଚନା ଦେବାପରେ ମଧ୍ୟ କିଛି କାର୍ଯ୍ୟାନୁଷ୍ଠାନ ନିଆଯାଉନାହିଁ। ଲକ୍ଥାନା ଅଧିକାରୀ ଭାବଗ୍ରାହୀ ରାଉତଙ୍କୁ ଏସମ୍ପର୍କରେ ପଚାରିବାରେ ଏହି ଘଟଣାରେ ପୋଲିସ କର୍ମୀଙ୍କ ସମ୍ପୃକ୍ତି ସମ୍ପର୍କରେ ପୂର୍ବରୁ ଜାଣି ନଥିଲି ଏନେଇ ତଦନ୍ତ କରାଯିବ। ଏସମ୍ପର୍କରେ ନୂଆଗଡ଼ ଆର୍ଆଇ( ରାଜସ୍ବ ନିରୀକ୍ଷକ) ନାରାୟଣ ସ୍ବାଇଁ କୁହନ୍ତି, କିଛି ଦିନ ପୂର୍ବେ ଚଢ଼ାଉ କରାଯାଇ ୧୨ ଗାଡିରୁ ଜରିମାନା ଆଦାୟ କରାଯାଇଥିଲା। ଏବେ ପୁଣି ମାଟି ବିକ୍ରି ଖବର ଜଣାନାହିଁ। ସେମାନେ ରାତିରେ ଏମିତି କରୁଛନ୍ତି। ସେତେବେଳେ ଘଟଣାସ୍ଥଳକୁ ଯିବା ବିପଦ ବୋଲି କହି ସେ ଅସହାୟ ପ୍ରକାଶ କରିଥିଲେ। ତହସିଲଦାର ପ୍ରୀତିପର୍ଣ୍ଣା ମିଶ୍ର ଏବିଷୟରେ କିଛି ଜାଣି ନ ଥିବା କହି ପ୍ରସଙ୍ଗକୁ ଏଡ଼ାଇ ଯାଇଥିଲେ।