କଟକ ଅଫିସ,୨୫ା୩: କଟକସ୍ଥିତ ମଧୁସୂଦନ ଆଇନ ବିଶ୍ୱବିଦ୍ୟାଳୟ (ଏମ୍ଏଲ୍ୟୁ)ରେ ୫ ବର୍ଷିଆ ବିଏ ଏଲ୍ଏଲ୍ବି ଏବଂ ୩ ବର୍ଷିଆ ଏଲ୍ଏଲ୍ବି ପାଠ୍ୟକ୍ରମର ପ୍ରଥମ ସେମିଷ୍ଟର ପରୀକ୍ଷା ସ୍ଥଗିତ ରଖାଯାଇଛି। ଏଥିସହ ଉକ୍ତ ବିଶ୍ୱବିଦ୍ୟାଳୟ ଅଧୀନରେ ଥିବା ୨୪ଟି ଆଇନ ମହାବିଦ୍ୟାଳୟରେ ମଧ୍ୟ ଉକ୍ତ ପରୀକ୍ଷାକୁ ସ୍ଥଗିତ ରଖାଯାଇଛି। ଏନେଇ ଗୁରୁବାର ବିଶ୍ୱବିଦ୍ୟାଳୟ ପକ୍ଷରୁ ବିଜ୍ଞପ୍ତି ପ୍ରକାଶ ପାଇଛି। ଗତ ୨୧ ତାରିଖରୁ ୫ ବର୍ଷିଆ ବିଏ ଏଲ୍ଏଲ୍ବିର ପ୍ରଥମ ସେମିଷ୍ଟର ଆରମ୍ଭ ହୋଇଥିବାବେଳେ ୨୫ ତାରିଖରୁ ୩ ବର୍ଷିଆ ଏଲ୍ଏଲ୍ବି ପାଠ୍ୟକ୍ରମର ପ୍ରଥମ ସେମିଷ୍ଟର ଆରମ୍ଭ ହେବାର ଥିଲା। ହେଲେ ବିଶ୍ୱବିଦ୍ୟାଳୟ ଅଧୀନରେ ଥିବା ଭଦ୍ରକ ଆଇନ ମହାବିଦ୍ୟାଳୟ ଏଲ୍ଏଲ୍ବି ପାଠ୍ୟକ୍ରମର ଛାତ୍ରୀଛାତ୍ରମାନେ ଷ୍ଟେଟ୍ କଞ୍ଜୁମର ଡିସ୍ପ୍ୟୁଟ୍ସ ରିଡ୍ରେସାଲ କମିଶନ(ଏସ୍ସିଡିଆରସି)ଙ୍କ ନିକଟରେ ଅଭିଯୋଗ କରିଥିଲେ। ସେମିଷ୍ଟର ପରୀକ୍ଷା ନିଜ କଲେଜରେ ନ କରାଯାଇ ଅନ୍ୟ କଲେଜରେ ହେଉଥିବାରୁ ଏହାକୁ ବିରୋଧ କରି ସେମାନେ ଉକ୍ତ ଅଭିଯୋଗପତ୍ର ଦାଖଲ କରିଥିଲେ। ଏହି ଅଭିଯୋଗ ବିଚାରାଧୀନ ଥିବାରୁ ଉକ୍ତ ପରୀକ୍ଷା ସ୍ଥଗିତ ନିମନ୍ତେ ଏସ୍ସିଡିଆର୍ସି ନିର୍ଦ୍ଦେଶ ଦେଇଛନ୍ତି। ସମସ୍ୟାର ସମାଧାନ ହେଲା ପରେ ପୁଣି ଥରେ ପରୀକ୍ଷା ପାଇଁ ନୂତନ ବିଜ୍ଞପ୍ତି ପ୍ରକାଶ ପାଇବ ବୋଲି ବିଶ୍ୱବିଦ୍ୟାଳୟ ପକ୍ଷରୁ ସୂଚନା ମିଳିଛି।
