ଲାହୋର,୯ା୩: ପାକିସ୍ତାନର ପୂର୍ବତନ ପ୍ରଧାନମନ୍ତ୍ରୀ ତଥା ପାକିସ୍ତାନ ତେହରିକ୍-ଇ-ଇନ୍ସାଫ୍ (ପିଟିିଆଇ) ଅଧ୍ୟକ୍ଷ ଇମ୍ରାନ୍ ଖାନ୍ଙ୍କ ସମେତ ୪୦୦ ଜଣ ଦଳୀୟ କର୍ମଙ୍କ ବିରୋଧରେ ଲାହୋର ପୋଲିସ ଗୁରୁବାର ହତ୍ୟା ଓ ଆତଙ୍କବାଦ ମାମଲା ରୁଜୁ କରିଛି।
ଦଳର ଏକ ରାଲିରେ ପୋଲିସ ସହ ସଂଘର୍ଷ ଘଟି ଜଣେ କର୍ମୀଙ୍କ ମୃତ୍ୟୁ ଘଟିବା ସହ ଅନେକ ଆହତ ହୋଇଥିଲେ। ଅନ୍ୟପକ୍ଷେ ପାକିସ୍ତାନ ମୁସଲିମ୍ ଲିଗ୍-ନଓ୍ବାଜ (ପିଏମ୍ଏଲ୍-ଏନ୍) ନେତୃତ୍ୱାଧୀନ ମେଣ୍ଟ ସରକାରର ୧୧ ମାସ ଶାସନ କାଳ ମଧ୍ୟରେ ଇମ୍ରାନଙ୍କ ବିରୋଧରେ ୮୦ଟି ମାମଲା ରୁଜୁ କରିଛି।
ବୁଧବାର ଇମ୍ରାନଙ୍କ ବାସଭବନ ବାହାରେ ପୋଲିସ ସହ ସଂଘର୍ଷ ଘଟି ପିଟିଆଇ କର୍ମୀ ଅଲି ବିଲାଲ ନିହତ ହେବା ସହ ଅନେକ ଆହତ ହୋଇଥିଲେ। ଏହି ସଂଘର୍ଷରେ ୧୧ ଜଣ ପୋଲିସ କର୍ମଚାରୀ ମଧ୍ୟ ଆହତ ହୋଇଥିଲେ। ପୋଲିସ ଶତାଧିକ ପିଟିଆଇ କର୍ମୀଙ୍କୁ ଗିରଫ କରିଥିଲା।
