ଭୁବନେଶ୍ୱର,୮ା୧: ଓଡ଼ିଶାର ଅବସରପ୍ରାପ୍ତ ଆଇଏଫଏସ (IFS) ଅଧିକାରୀ ସୁଶାନ୍ତ ନନ୍ଦଙ୍କୁ ବଡ଼ ଦାୟିତ୍ୱ ଦେଇଛନ୍ତି କେନ୍ଦ୍ର ସରକାର। ପୁନର୍ଗଠିତ ‘ପ୍ରୋଜେକ୍ଟ ଏଲିଫ୍ୟାଣ୍ଟ’ର ଷ୍ଟିଅରିଂ କମିଟିରେ ସୁଶାନ୍ତ ନନ୍ଦ ସଦସ୍ୟ ଭାବେ ନିଯୁକ୍ତ ହୋଇଛନ୍ତି। ବୁଧବାର କେନ୍ଦ୍ର ପରିବେଶ, ଜଙ୍ଗଲ ଏବଂ ଜଳବାୟୁ ପରିବର୍ତ୍ତନ ମନ୍ତ୍ରଣାଳୟ ପକ୍ଷରୁ ଏହି ନୂତନ କମିଟି ଗଠନ ନେଇ ବିଜ୍ଞପ୍ତି ପ୍ରକାଶ ପାଇଛି।
ମାର୍ଚ୍ଚ ୨୦୨୨ରେ ଗଠିତ ପ୍ୟାନେଲ ବଦଳରେ ଏହି ନୂତନ କମିଟି କାର୍ଯ୍ୟ କରିବ। କେନ୍ଦ୍ର ପରିବେଶ ମନ୍ତ୍ରୀ ଏହାର ଅଧ୍ୟକ୍ଷତା କରିବେ। ୧୯୮୯ ବ୍ୟାଚର ଅଧିକାରୀ ନନ୍ଦ ନଭେମ୍ବର ୨୦୨୪ରେ ପିସିସିଏଫ (ବନ୍ୟପ୍ରାଣୀ) ଭାବେ ଅବସର ଗ୍ରହଣ କରିଥିଲେ। ହାତୀ-ଟ୍ରେନ୍ ଦୁର୍ଘଟଣା ରୋକିବା ଏବଂ ମଣିଷ-ବନ୍ୟଜନ୍ତୁ ମଧ୍ୟରେ ସଂଘର୍ଷ ପରିଚାଳନା କ୍ଷେତ୍ରରେ ତାଙ୍କର ବିଶେଷ ଅଭିଜ୍ଞତା ରହିଛି।
ଏହି କମିଟିରେ ଅଣ-ସରକାରୀ ସଦସ୍ୟ ଭାବେ ଡକ୍ଟର ସମୀର ସିହ୍ନା, ଡକ୍ଟର ନାରାୟଣ ଶର୍ମା ଏବଂ WWF-ଇଣ୍ଡିଆର ରବି ସିଂହ ମଧ୍ୟ ସ୍ଥାନ ପାଇଛନ୍ତି। ୩ ବର୍ଷିୟା କାର୍ଯ୍ୟକାଳ ବିଶିଷ୍ଟ ଏହି କମିଟି ୧୯୯୨ରେ ଆରମ୍ଭ ହୋଇଥିବା ‘ପ୍ରୋଜେକ୍ଟ ଏଲିଫ୍ୟାଣ୍ଟ’ର ସମୀକ୍ଷା କରିବା ସହ ହାତୀଙ୍କ ବାସସ୍ଥାନ ଓ ଚଲାପଥର ସୁରକ୍ଷା ଉପରେ କାର୍ଯ୍ୟ କରିବ।
ସୁଶାନ୍ତ ନନ୍ଦ ଅବସର ପରେ ମଧ୍ୟ ସୋସିଆଲ ମିଡିଆ ମାଧ୍ୟମରେ ପ୍ରକୃତି ଓ ଜୈବ ବିବିଧତା ସମ୍ପର୍କରେ ସଚେତନତା ସୃଷ୍ଟି କରି ବେଶ୍ ଲୋକପ୍ରିୟ ହୋଇଛନ୍ତି।


