ନୂଆଦିଲ୍ଲୀ,୨୫।୧: ସମଗ୍ର ବିଶ୍ୱରେ ବଡ଼ ବଡ଼ ବୈଷୟିକ କମ୍ପାନୀଗୁଡିକରେ ଚାକିରି ଛଟେଇ ଚାଲିଛି। ଏହି କମ୍ପାନୀଗୁଡିକ ଶହ ଶହ କର୍ମଚାରୀଙ୍କୁ ଚାକିରିରୁ ବିଦା କରୁଛନ୍ତି। ପ୍ରତି ୪ ଜଣ ଭାରତୀୟଙ୍କ ମଧ୍ୟରୁ ଜଣଙ୍କର ଚାକିରି ଚାଲିଯିବାର ଭୟ ଘାରିଛି। ଅନ୍ୟପକ୍ଷରେ ୪ ଜଣ ଭାରତୀୟଙ୍କ ମଧ୍ୟରୁ ୩ ଜଣ ମୁଦ୍ରାସ୍ଫୀତି ବୃଦ୍ଧି ନେଇ ଚିନ୍ତିତ ଅଛନ୍ତି। ଏଥିସହିତ ପ୍ରାୟ ଅଧା ଲୋକ ବିଶ୍ୱାସ କରନ୍ତି, ୨୦୨୩ରେ ଦେଶର ଅର୍ଥନୀତି ବୃଦ୍ଧି ପାଇପାରେ। ମାର୍କେଟିଂ ଡାଟା ଏବଂ ଆନାଲିଟିକ୍ସ ଫାର୍ମ କାଣ୍ଟାର ଦ୍ୱାରା କରାଯାଇଥିବା ଏକ ସର୍ଭେରେ ଏହି ଖୁଲାସା ହୋଇଛି।
ଭାରତର ସାଧାରଣ ବଜେଟ ସର୍ଭେ-୨୦୨୩ (ଭାରତୀୟ ଅର୍ଥନୀତି ଅଭିବୃଦ୍ଧି) ର ଦ୍ୱିତୀୟ ସଂସ୍କରଣରେ ଫାର୍ମ କାଣ୍ଟାର ସର୍ଭେ ପ୍ରକାଶ କରି କହିଛି ଯେ, ଉପଭୋକ୍ତା ଆୟକର ସମ୍ବନ୍ଧରେ ନୀତି ପରିବର୍ତ୍ତନ ଘୋଷଣା କରାଯାଇପାରେ। ଏଥିରେ ଆୟକର ଛାଡ଼ର ସୀମା ବର୍ତ୍ତମାନର ୨.୫ ଲକ୍ଷରୁ ବୃଦ୍ଧି କରାଯାଇପାରିବ। ସର୍ବେକ୍ଷଣ ଅନୁଯାୟୀ, ମାକ୍ରୋ-ଅର୍ଥନୈତିକ ସ୍ତରରେ ଅଧିକାଂଶ ଲୋକଙ୍କ ଚିନ୍ତାଧାରା ସକାରାତ୍ମକ ରହିଛି।
କାଣ୍ଟାରା ସର୍ଭେ ଅନୁଯାୟୀ, ୨୦୨୩ରେ ଭାରତୀୟ ଅର୍ଥନୀତି ବୃଦ୍ଧି ପାଇବ ବୋଲି ୫୦ ପ୍ରତିଶତ ଲୋକ ବିଶ୍ୱାସ କରନ୍ତି। ୩୧ ପ୍ରତିଶତ ଲୋକ ଅନୁଭବ କରନ୍ତି ଯେ, ଏହାର ଗତି ହ୍ରାସ ପାଇବ ବୋଲି ଆଶା କରାଯାଉଛି। ସେହିପରି ୫୪ ପ୍ରତିଶତ ଛୋଟ ସହରଗୁଡ଼ିକ ମେଟ୍ରୋ ଅପେକ୍ଷା ଅଧିକ ସକାରାତ୍ମକ ରହିଛନ୍ତି।
କାଣ୍ଟାର କାର୍ଯ୍ୟନିର୍ବାହୀ ପରିଚାଳନା ନିର୍ଦ୍ଦେଶକ ଦୀପେନ୍ଦ୍ର ରାଣା କହିଛନ୍ତି, ଏହି ସର୍ଭେ ୧୨ଟି ଭାରତୀୟ ସହର (ମୁମ୍ବାଇ, ଦିଲ୍ଲୀ, ଚେନ୍ନାଇ, କୋଲକାତା, ପୁଣେ, ହାଇଦ୍ରାବାଦ, ବେଙ୍ଗାଲୁରୁ, ଅହମ୍ମଦାବାଦ, ଇନ୍ଦୋର, ପାଟନା, ଜୟପୁର ଏବଂ ଲକ୍ଷ୍ନୌ)ରେ କରାଯାଇଥିଲା। ୨୧-୫୫ ବର୍ଷ ବୟସର ଲୋକଙ୍କ ମଧ୍ୟରେ ଡିସେମ୍ବର ୧୫, ୨୦୨୨ରୁ ଜାନୁୟାରୀ ୧୫, ୨୦୨୩ ମଧ୍ୟରେ ଏହି ସର୍ଭେ ହୋଇଥିଲା।
