କୁଜଙ୍ଗ/ରାହାମା,୧୧ା୨(ଡି.ଏନ୍.ଏ.): କୁଜଙ୍ଗ ତହସିଲ ଅନ୍ତର୍ଗତ କଳଦ୍ୱୀପ ବାଲି ସଇରାତ୍ର ନିଲାମି ମିଆଦ ପୂରିଥିଲେ ମଧ୍ୟ ରାତିରେ ବାଲି ଚୋରା ଚାଲାଣ ଚାଲିଛି। ଏନେଇ ଶୁକ୍ରବାର ଭାଜପା ଯୁବ ମୋର୍ଚ୍ଚା କୁଜଙ୍ଗ ବ୍ଲକ ପକ୍ଷରୁ ଅତିରିକ୍ତ ତହସିଲଦାରଙ୍କୁ ଏକ ଦାବିପତ୍ର ଦିଆଯାଇଛି। ଉକ୍ତ ଦାବିପତ୍ରରେ ଉଲ୍ଲେଖ କରାଯାଇଛି ଯେ, କଳଦ୍ୱୀପ ବାଲି ସଇରାତରୁ ବେଆଇନ୍ ଭାବେ ନିୟମିତ ବ୍ୟବଧାନରେ ବାଲି ଚାଲାଣ ହେଉଛି। ଏ ସମ୍ପର୍କରେ ଭାଜପା ପକ୍ଷରୁ ଜାନୁୟାରୀ ୭ରେ ତହସିଲଦାରଙ୍କୁ ଅଭିଯୋଗ କରାଯିବା ପରେ କିଛିଦିନ ପାଇଁ ବାଲି ଉଠାଣ ବନ୍ଦ ଥିଲା। ପୁନର୍ବାର ବାଲି ମାଫିଆମାନେ ରାତିରେ ଏଠାରୁ ବାଲି ଉଠାଣ କରୁଛନ୍ତି। କୁଜଙ୍ଗ ମଣ୍ଡଳୀ ଯୁବ ମୋର୍ଚ୍ଚାର ସଭାପତି ଦୁଷ୍ମନ୍ତ ନାଥ ଶର୍ମା ଓ ପାରାଦୀପ ନିର୍ବାଚନ ମଣ୍ଡଳି ଯୁବ ମୋର୍ଚ୍ଚା ସଂଯୋଜକ ଅକ୍ଷୟ ଦାସଙ୍କ ନେତୃତ୍ୱରେ କର୍ମୀମାନେ ଏନେଇ ଅତିରିକ୍ତ ତହସିଲଦାର ବାଇଧର ପ୍ରଧାନଙ୍କ ନିକଟରେ ଅଭିଯୋଗ କରିବା ସହ ତୁରନ୍ତ କାର୍ଯ୍ୟାନୁଷ୍ଠାନ ନେବାକୁ ଦାବିପତ୍ରରେ ଦଶାଇଛନ୍ତି। ଏଥିରେ ଟାଳଟୁଳ ନୀତି ଅବଲମ୍ବନ କରାଗଲେ ଆନ୍ଦୋଳନକୁ ଜୋରଦାର କରାଯିବ ବୋଲି ସେଥିରେ ଉଲ୍ଲେଖ କରାଯାଇଛି। ଅନ୍ୟମାନଙ୍କ ମଧ୍ୟରେ ଦାବିପତ୍ର ପ୍ରଦାନ ସମୟରେ ଅଭିଷେକ ସ୍ବାଇଁ, ପାରାଦୀପ ଗଡ଼ ମଣ୍ଡଳ ଯୁବ ମୋର୍ଚ୍ଚା ସଭାପତି ବିଶ୍ୱଜିତ୍ ବେହେରା ପ୍ରମୁଖ ଉପସ୍ଥିତ ଥିଲେ।
ସୂଚନାଯୋଗ୍ୟ, କଳଦ୍ୱୀପ ବାଲି ସଇରାତର ନିଲାମ କୁଜଙ୍ଗ ତହସିଲ ପକ୍ଷରୁ ୨୦୨୧ରେ ଡକାଯାଇଥିଲା। ବାର୍ଷିକ ରାଜସ୍ବ ୧ କୋଟି ୯୯ ଲକ୍ଷ ୭୪ ହଜାର ୨ଶହ ୨୨ ଟଙ୍କାରେ ଏହାକୁ ନିଲାମ ଦିଆଯାଇଥିଲା। ନିଲାମ ନେଇଥିବା ବ୍ୟକ୍ତି ଓ ତହସିଲ କାର୍ଯ୍ୟାଳୟ ମଧ୍ୟରେ ୨୦୨୧ ଡିସେମ୍ବରରେ ଚୁକ୍ତିପତ୍ର ସ୍ବାକ୍ଷରିତ ହୋଇଥିଲା। ନିୟମ ଅନୁସାରେ ୨୦୨୨ ଡିସେମ୍ବରରେ ନିଲାମ ଅବଧି ଶେଷ ହୋଇଛି। ଅନ୍ୟପକ୍ଷରେ ରାଜସ୍ବ ବାବଦ ୮୩ ଲକ୍ଷରୁ ଊର୍ଦ୍ଧ୍ୱ ଟଙ୍କା ନିଲାମ ଗ୍ରହୀତାଙ୍କ ଉପରେ ବାକି ଥିଲେ ବି ସେ ନିର୍ଦ୍ଧାରିତ ସମୟରେ ପୈଠ ନ କରିବାରୁ ତହସିଲ କାର୍ଯ୍ୟାଳୟ ତରଫରୁ ଚିଠି କରାଯାଇଛି। ଏହାସତ୍ତ୍ୱେ ସଇରାତରୁ ବାଲି ଉଠାଣ ଚାଲିଛି। ଏ ସମ୍ପର୍କରେ ଅତିରିକ୍ତ ତହସିଲଦାର ବାଇଧର ପ୍ରଧାନ କହିଛନ୍ତି, ନିଲାମ ଅବଧି ଶେଷ ହୋଇଛି। ଯଦି ବେଆଇନ ଭାବେ ବାଲି ଉଠାଯାଉଥାଏ ତଦନ୍ତ କରାଯାଇ କାର୍ଯ୍ୟାନୁଷ୍ଠାନ ନିଆଯିବ।
