ଲଣ୍ଡନ,୧୮।୩: ରୁଷିଆ ଓ ୟୁକ୍ରେନ ମଧ୍ୟରେ ଜାରିିରହିଥିବା ଯୁଦ୍ଧକୁ ଅନେକ ଦେଶ ବିରୋଧ କରୁଛନ୍ତି। ରୁଷିଆ ଉପରେ ପାଶ୍ଚାତ୍ୟ ଦେଶଗୁଡ଼ିକ ଅନେକ ପ୍ରତିବନ୍ଧକ ସହ ଆର୍ଥିକ କଟକଣା ମଧ୍ୟ ଲଗାଇଛନ୍ତି। ଇତିମଧ୍ୟରେ ୟୁରୋପୀୟ ସ୍ପେସ୍ ଏଜେନ୍ସି (ଇଏସ୍ଏ) ମଙ୍ଗଳ ଗ୍ରହ ମିଶନରୁ ରୁଷିଆ ସ୍ପେସ୍ ଏଜେନ୍ସି (ରସ୍କୋସମୋସ)କୁ ବାହାର କରିଦେଇଛି। ବର୍ତ୍ତମାନ ଏହି ମିଶନରେ ରୁଷିଆର ବୈଜ୍ଞାନିକ ଓ ଇଞ୍ଜିନିୟରଙ୍କ କୌଣସି ସହାୟତା ନିଆଯିବ ନାହିଁ। ଏହି ମିଶନ ପ୍ରାୟ ୮୪୩୩କୋଟି ଟଙ୍କାର ରହିଛି। ଯେଉଁଥିରେ ୟୁରୋପୀୟ ଦେଶ ସହିତ ରୁଷିଆ ମଧ୍ୟ ସାମିଲ ଥିଲା। ଇଏସ୍ଏ ଓ ରୁଷିଆ ସ୍ପେସ ଏଜେନ୍ସି ଏକ୍ସୋମାର୍ସ ସେପ୍ଟେମ୍ବରରେ ଏହି ମିଶନକୁ ଲଞ୍ଚ କରିଥାନ୍ତେ। କିନ୍ତୁ ଏହାପୂର୍ବରୁ ଇଏସ୍ଏ ରୁଷିଆକୁ ଏହି ମିଶନରୁ ବାହାର କରିଦେଇଛି ବୋଲି ଶୁକ୍ରବାର ଇଏସ୍ଏର ମହାନିର୍ଦ୍ଦେଶକ ଜୋସେଫ୍ ଏସ୍ବେଶର କହିଛନ୍ତି। ଏକ୍ସୋମାର୍ସ ହେଉଛି ଏକ ରୋଭର, ଯାହାକୁ ମଙ୍ଗଳ ଗ୍ରହକୁ ପଠାଇ ଏକ ଐତିହାସିକ ତଥା ପ୍ରାଚୀନ ପରିବେଶର ଅନୁସନ୍ଧାନ କରାଯିବାର ଥିଲା। ଯାହା ଦ୍ୱାରା ଜୀବନର ଉତ୍ପତ୍ତି ଏବଂ ପ୍ରମାଣକୁ ଖୋଜା ଯାଇପାରିଥାନ୍ତା। ଏଥିସହ ଭବିଷ୍ୟତରେ ଜୀବନର ସମ୍ଭାବନା ଉପରେ ମଧ୍ୟ ଅଧ୍ୟୟନ କରାଯାଇପାରିବ। ବର୍ତ୍ତମାନ ଏହାକୁ ଲଞ୍ଚ କରିବାକୁ ସମୟ ଲାଗିବ ବୋଲି ଜୋସେଫ କହିଛନ୍ତି। କାରଣ ବର୍ତ୍ତମାନ ପରିସ୍ଥିତି ଭଲ ନାହିଁ। କାରଣ ୟୁରୋପୀୟ ଦେଶମାନେ ରୁଷିଆକୁ ଏହି ମିଶନରୁ ବାହାର କରି ଦେଇଛନ୍ତି। ବର୍ତ୍ତମାନ ଏହି ରୋଭରର ଲଞ୍ଚିଂକୁ ନେଇ ପୁଣିଥରେ ଯୋଜନା ତିଆରି କରାଯିବ। ସେହି ଅନୁଯାୟୀ ପ୍ରସ୍ତୁତି କରାଯିବ ବୋଲି ଜୋସେଫ ସୂଚନା ଦେଇଛନ୍ତି। ଅନ୍ୟପଟେ ଏକ୍ସୋମାର୍ସର ଲଞ୍ଚିଂରୁ ରୁଷିଆକୁ ବହିଷ୍କାର କରିବା ପରେ ଇଏସ୍ଏ ଏହି ରୋଭରକୁ ମଙ୍ଗଳ ଗ୍ରହରେ କିପରି ପହଞ୍ଚାଯିବ ସେନେଇ ଅଧ୍ୟୟନ କରିଛି। ଏଥିପାଇଁ ଆମେରିକାର ସ୍ପେସ ଏଜେନ୍ସି ନାସା ସହିତ ବର୍ତ୍ତମାନ ଆଲୋଚନା ଚାଲିଛି। ଆମେରିକାର ସ୍ପେସ ଏଜେନ୍ସି ଏହି ପ୍ରକଳ୍ପରେ ସାମିଲ ହେବାକୁ ପ୍ରସ୍ତୁତ ଅଛି। ଏହି ବୈଜ୍ଞାନିକ ମିଶନରେ ସମ୍ପୂର୍ଣ୍ଣ ସହଯୋଗ କରିବାକୁ ଆମେରିକା ଚାହୁଁଛି ବୋଲି ଜୋସେଫ କହିଛନ୍ତି।
