ମହାକାଳପଡ଼ା,୧୬ା୩ (ପ୍ରତାପ ଚନ୍ଦ୍ର ସ୍ବାଇଁ): କେନ୍ଦ୍ରାପଡ଼ା ଜିଲା ମହାକାଳପଡ଼ା ବ୍ଲକରେ ଶିଳ୍ପ କରିଡର ପ୍ରତିଷ୍ଠା ପାଇଁ ପୂର୍ବ ସରକାରଙ୍କ ସମୟରେ ଜମ୍ବୁ-ମାର୍ଶାଘାଇ ମୁଖ୍ୟ କେନାଲ ରାସ୍ତା ନିର୍ମାଣ ୨୪ କିମି ଲାଗି ୧୦୪ କୋଟି ଟଙ୍କା ବ୍ୟୟ ଅଟକଳ ରହିଛି। ଏହି କେନାଲ ରାସ୍ତା ନିର୍ମାଣ କାର୍ଯ୍ୟ ଶେଷ ପର୍ଯ୍ୟାୟରେ ପହଞ୍ଚିଛି। ହେଲେ ରାସ୍ତାର ପ୍ରଭାକରପୁର- ସୁନୀଲପଡ଼ା – ବନ୍ଧପଡ଼ା ସଂଲଗ୍ନ ପାର୍ଶ୍ୱରେ ୨୦ ଫୁଟ ଖାଲରେ ବଡ଼ ବଡ଼ କେତେଟା ପୋଖରୀ ରହିଛି। ଫଳରେ ଏହି ରାସ୍ତା ପାଶର୍ବରେ ଗାର୍ଡ ୱାଲ୍ ନିର୍ମାଣ ହୋଇନି। ପରବର୍ତ୍ତୀ ସମୟରେ ବର୍ଷା ହେଲେ କୌଣସି ମୁହୂର୍ତ୍ତରେ ରାସ୍ତା ଭୁଶୁଡିବା ଓ ଦୁର୍ଘଟଣା ଆଶଙ୍କା ରହିଛି। କିଛିଦିନ ପୂର୍ବେ ଭାରସାମ୍ୟ ହରାଇ ଏଠାରେ ଏକ ଶ୍ରମିକ ବୋଝେଇ ଅଟୋ ଓଲଟି ପଡ଼ିଥିଲା ବୋଲି ସ୍ଥାନୀୟ ଲୋକମାନେ କହିଛନ୍ତି। ସେହିପରି ଏହି ରାସ୍ତାର ଗୋପାଳପୁର ମୌଜା ନିକଟ ରାସ୍ତାପାର୍ଶ୍ୱରେ ଏକ ପୋଖରୀ ରହିଛି। ପୂର୍ତ୍ତ ବିଭାଗ ପକ୍ଷରୁ ସେଠାରେ ଗାର୍ଡ ୱାଲ୍ ନିର୍ମାଣ କରାଯାଇଛି। ହେଲେ ଗୋପାଳପୁର ମୌଜା ନିକଟ ଗାର୍ଡ ୱାଲ୍ ନିର୍ମାଣ ଭଳି ଏଠାରେ ଗାର୍ଡ ୱାଲ୍ ନିର୍ମାଣ କାର୍ଯ୍ୟ ପାଇଁ ସ୍ଥାନୀୟ ଲୋକମାନେ ଦାବି କରିଛନ୍ତି। ଅପରପକ୍ଷରେ ରାଜ୍ୟ ସରକାରଙ୍କ ପୂର୍ତ୍ତ ବିଭାଗ ପକ୍ଷରୁ ଏହି ରାସ୍ତା ନିର୍ମାଣ କାର୍ଯ୍ୟ ଆରମ୍ଭ ହୋଇଛି। ସେହିଭଳି ଏହି ରାସ୍ତାର ଦକ୍ଷିଣ ପାର୍ଶ୍ୱରେ ଆଉ ଏକ ୨ ଲାଇନ୍ ରାସ୍ତା ନିର୍ମାଣ ଲାଗି ଜମି ଅଧିଗ୍ରହଣ ପାଇଁ ମହାକାଳପଡ଼ା ପଞ୍ଚାୟତ ଅଫିସ୍ରେ ଗ୍ରାମସଭା ଓ ଜନଶୁଣାଣି ଶିବିର ଅନୁଷ୍ଠିତ ହୋଇଛି। ଏହି ରାସ୍ତା ନିର୍ମାଣ କାର୍ଯ୍ୟ ଶେଷ ହେଲେ ଶିଳ୍ପ ପ୍ରତିଷ୍ଠା ପାଇଁ କମ୍ପାନୀ କର୍ତ୍ତୃପକ୍ଷ ଆଗେଇ ଆସିବେ ବୋଲି କୁହାଯାଇଛି। ଏ ସଂକ୍ରାନ୍ତରେ ମହାକାଳପଡ଼ା ସବ୍ଡିଭିଜନ ପୂର୍ତ୍ତ ବିଭାଗ ସହକାରୀ ନିର୍ବାହୀ ଯନ୍ତ୍ରୀ ଦ୍ୱୈତାରୀ ଟୁଡୁଙ୍କୁ ପଚାରିବାରେ ଜିଓ ସିନ୍ଥେଟିକ ନେଟ ପ୍ୟାକିଂ ନିର୍ମାଣ ହେବ। ଗାର୍ଡ ୱାଲ୍ଠାରୁ ଜିଓ ସିନ୍ଥେଟିକ ନେଟ ବହୁତ ସୁଦୃଢ଼ ଓ ସ୍ଥାୟୀ ବୋଲି ସେ କହିଛନ୍ତି।
