ବରୀ,୧୮ା୧(ଡି.ଏନ.ଏ.): ପ୍ରଧାନମନ୍ତ୍ରୀ ଆବାସ ଯୋଜନା (ଗ୍ରାମୀଣ) ଆବଣ୍ଟନ କ୍ଷେତ୍ରରେ ସ୍ବଚ୍ଛତା ବଜାୟ ପାଇଁ ନିର୍ଦ୍ଦିଷ୍ଟ ନିୟମ ଜାରି କରାଯାଇଛି। ମାତ୍ର ବରୀ ବ୍ଲକ୍ର ବିଭିନ୍ନ ପଞ୍ଚାୟତରେ ଲାଗିଥିବା ତାଲିକା ତ୍ରୁଟିପୂର୍ଣ୍ଣ ଥିବା ଅଭିଯୋଗ ହୋଇଛି। ଫଳରେ ଏହାକୁ ନେଇ ଜନସାଧାରଣଙ୍କ ମଧ୍ୟରେ ଅସନ୍ତୋଷ ପ୍ରକାଶ ପାଇଛି। ତେଣୁ ତୁରନ୍ତ ସଂଶୋଧିତ ତାଲିକା ପ୍ରକାଶ କରିବାକୁ ଦାବି ହୋଇଛି।
ସୂଚନା ମୁତାବକ, ବିଗତ ଦିନରେ ପଞ୍ଜୀକୃତ ଥିବା ବ୍ଲକ୍ ଅଧୀନ ବିଭିନ୍ନ ପଞ୍ଚାୟତର ହିତାଧିକାରୀମାନେ ଏବେ ପଞ୍ଚାୟତ କାର୍ଯ୍ୟାଳୟରେ ଉପଲବ୍ଧ ହୋଇଥିବା ତାଲିକାରୁ ବଞ୍ଚତ୍ତ ହୋଇଛନ୍ତି। ପୂର୍ବରୁ ରାଜ୍ୟ ସରକାରଙ୍କ ତରଫରୁ ଏହି ଯୋଜନାରେ ନିଜ ଦଳର ସମର୍ଥତ୍ତ ଅଯୋଗ୍ୟ ହିତାଧିକାରୀଙ୍କୁ ସାମିଲ କରାଯାଉଥିବା ନେଇ ଅଭିଯୋଗ ହୋଇ ଆସୁଥିଲା। କିନ୍ତୁ ଏଥର ଆବାସ ଯୋଜନା ଆବଣ୍ଟନ ସ୍ବଚ୍ଛତା ରଖିବା କ୍ଷେତ୍ରରେ କେନ୍ଦ୍ର ସରକାରଙ୍କ ନିର୍ଦ୍ଦେଶ ପରେ ଏହାକୁ ରାଜ୍ୟ ସରକାର କଡ଼ାକଡ଼ି ଭାବେ ପାଳନ କରୁଥିବା ଦେଖିବାକୁ ମିଳିଛି। ତେବେ ମୂଳ ତାଲିକାରେ ନାମ ନ ଥିବା କିଛି ଅବିବାହିତଙ୍କ ନାମ ଏବେ ପଞ୍ଚାୟତ ତାଲିକାରେ ରହିଥିବାରୁ ପ୍ରଶାସନର ସ୍ବଚ୍ଛତା ଉପରେ ପ୍ରଶ୍ନବାଚୀ ସୃଷ୍ଟି ହୋଇଛି। ବିଶେଷକରି ବିଭିନ୍ନ ପଞ୍ଚାୟତ କାର୍ଯ୍ୟାଳୟରେ ଲଗାଯାଉଥିବା ତାଲିକାକୁ ଉଦ୍ଦେଶ୍ୟମୂଳକ ଭାବେ କର୍ମଚାରୀ ଖୁବ୍ କମ୍ ସମୟ ମଧ୍ୟରେ ହଟାଇ ନେବା ଯୋଗୁ ହିତାଧିକାରୀ ସେମାନଙ୍କ ନାମ ଅଛି କି ନାହିଁ ତାହା ଜାଣିବାର ସୁଯୋଗ ପାଉନାହାନ୍ତି। ଆବାସ ଯୋଜନାରେ ସ୍ବଚ୍ଛତା ଆଣିବାକୁ ଟୋଲ୍ ଫି’ ନମ୍ବରରେ ବ୍ଲକ୍ ପ୍ରଶାସନ, ଜିଲା ପ୍ରଶାସନ ନିକଟରେ ଅଭିଯୋଗ କରାଯାଇ ପାରିବ ବୋଲି ସୂଚନା ରହିଛି। ଏହି ମର୍ମରେ ବିଭିନ୍ନ ପଞ୍ଚାୟତର ରାଜନୈତିକ ନେତା ତାଙ୍କ ଦଳୀୟ କର୍ମୀଙ୍କୁ ଏହି ଯୋଜନାରେ ସାମିଲ କରିବାକୁ ଉଦ୍ୟମ କରୁଛନ୍ତି। ମାତ୍ର ପ୍ରଶାସନିକ ଅଧିକାରୀ ଏହି ତଦନ୍ତ ପ୍ରକ୍ରିୟାକୁ କିଭଳି ଭାବେ ସୁଚାରୁରୂପେ ସମ୍ପାଦନ କରିବେ ତାହା ସମୟ ହିଁ କହିବ। କେତେଜଣ ରାଜନେତାଙ୍କ ଚାପର ବଶବର୍ତ୍ତୀ ହୋଇ ତଦନ୍ତ ଦାୟିତ୍ୱରେ ଥିବା କିଛି ଅଧିକାରୀ ପଞ୍ଚାୟତସ୍ତରୀୟ ନେତାଙ୍କ ସହାୟତାରେ ଅର୍ଥ ଆଦାୟ କରିଥିଲେ। ମାତ୍ର ଏବେ ସରକାରୀ ନିୟମ କଡ଼ାକଡ଼ି ଭାବେ ପାଳନ କରିବାକୁ ପ୍ରଶାସନ ଅଣ୍ଟାଭିଡୁଥିବାରୁ ଏହା ସେମାନଙ୍କ ମୁଣ୍ଡ ବିନ୍ଧାର କାରଣ ପାଲଟିଛି। ଏ ସମ୍ପର୍କରେ ବରୀ ମଣ୍ଡଳ ଉନ୍ନୟନ ଅଧିକାରୀ ଚିନ୍ମୟ ଦାସଙ୍କୁ ପଚାରିବାରେ ସେ କହିଛନ୍ତି, ବିଭିନ୍ନ ପଞ୍ଚାୟତର ମୂଳ ତାଲିକା ସହ ପ୍ରକାଶିତ ତାଲିକାର ତାଳ ମେଳ ରହୁ ନ ଥିବା ଅଭିଯୋଗ ଆସିଛି। ତେଣୁ ଦାୟିତ୍ୱରେ ଥିବା କର୍ମଚାରୀଙ୍କୁ ଏହାକୁ ସଂଶୋଧିତ କରି ପ୍ରତି ପଞ୍ଚାୟତ କାର୍ଯ୍ୟାଳୟରେ ଉପଲବ୍ଧ କରାଇବାକୁ ନିର୍ଦ୍ଦେଶ ଦିଆଯାଇଛି।
