ଚଣ୍ଡିଖୋଲ,୨।୧୨(ଡି.ଏନ.ଏ.): ଶୀତ ଋତୁ ଆସିଲେ ବିଭିନ୍ନ ପର୍ଯ୍ୟଟନସ୍ଥଳରେ ପର୍ଯ୍ୟଟକଙ୍କ ଭିଡ଼ ହୋଇଥାଏ। ଗତ ବର୍ଷ କୋଭିଡ୍ ପାଇଁ ପର୍ଯ୍ୟଟକଙ୍କ ଭିଡ଼ ଦେଖାଯାଇ ନ ଥିଲା। ଚଳିତ ବର୍ଷ ପର୍ଯ୍ୟଟନସ୍ଥଳୀଗୁଡ଼ିକ ଲୋକାରଣ୍ୟ ହେବା ଆଶା ରଖାଯାଇଛି। ତେବେ କୋଟିକୋଟି ଟଙ୍କା ଖର୍ଚ୍ଚ କରାଯାଇ ବନ ବିଭାଗ ତରଫରୁ ପରିବେଶ ପର୍ଯ୍ୟଟନ କେନ୍ଦ୍ର ନିର୍ମାଣ କରାଯାଉଥିବା ବେଳେ ସେଠାକୁ ପର୍ଯ୍ୟଟକ ଆସିବା ପାଇଁ ଇଚ୍ଛୁକ ନୁହନ୍ତି। କାରଣ ଏହି ପର୍ଯ୍ୟଟନ କେନ୍ଦ୍ର ଗୁଡିକରେ ପାନୀୟ ଜଳ ଓ ଆଲୋକୀକରଣ ବ୍ୟବସ୍ଥା ନାହିଁ। ଏଭଳି ସ୍ଥାନ ଦେଖିବାକୁ ମିଳିଛି ବଡ଼ଚଣା ବ୍ଲକ୍ ଅନ୍ତର୍ଗତ ପ୍ରସିଦ୍ଧ ଶୈବ ପୀଠ ମହାବିନାୟକ ଏବଂ ଓଳାଶୁଣୀ ପୀଠରେ। ଏହି ଦୁଇଟିସ୍ଥାନରେ ବନବିଭାଗ ତରଫରୁ ପରିବେଶ ପର୍ଯ୍ୟଟନ କେନ୍ଦ୍ର ନିର୍ମାଣ କରାଯାଇଛି। ପର୍ଯ୍ୟଟକ ଏଠାରେ ରହିବା ପାଇଁ ଅନ୍ଲାଇନରେ ବୁକିଂ କରୁଥିଲେ ମଧ୍ୟ ରାତ୍ରିଯାପନ କରିପାରୁନାହାନ୍ତି।
ସୂଚନା ମୁତାବକ, ୨୦୧୨ରେ ଓଳାଶୁଣୀ ଓ ମହାବିନାୟକଠାରେ ପରିବେଶ ପର୍ଯ୍ୟଟନ କେନ୍ଦ୍ର ନିର୍ମାଣ କରାଯାଇଥିଲା। ପର୍ଯ୍ୟଟକଙ୍କ ସୁବିଧାକୁ ଦୃଷ୍ଟିରେ ରଖି ଏଥିରେ ବିଭିନ୍ନ ବ୍ୟବସ୍ଥା କରାଯାଇଥିଲା। ମାତ୍ର ୟା ଭିତରେ ୧୦ ବର୍ଷ ବିତିବାକୁ ବସିଥିଲେ ମଧ୍ୟ ଆଜି ଯାଏ ଏହି ଦୁଇ କେନ୍ଦ୍ରରେ ବିଦ୍ୟୁତ୍, ପାଣି ବ୍ୟବସ୍ଥା ହୋଇ ପାରିନାହିଁ। ରକ୍ଷଣାବେକ୍ଷଣ ଲାଗି କର୍ମଚାରୀ ନିଯୁକ୍ତି ହୋଇପାରି ନାହାନ୍ତି। ଫଳରେ ପର୍ଯ୍ୟଟକଙ୍କ ସଂଖ୍ୟା ଦିନକୁ ଦିନ କମିବାରେ ଲାଗିଛି। ମହାବିନାୟକଠାରେ ଥିବା ପର୍ବତ ଶୋଭାରୁ ୨୦୧୬-୧୭ ଆର୍ଥିକ ବର୍ଷରେ ୮୬ ହଜାର ଟଙ୍କା ରାଜସ୍ବ ମିଳିଥିବା ବେଳେ ୨୦୧୭-୧୮ରେ ୧ ଲକ୍ଷ ୫୯ ହଜାର ଟଙ୍କା, ୨୦୧୮-୧୯ରେ ୧ ଲକ୍ଷ ୨୧ ହଜାର ଟଙ୍କା ଓ ୨୦୧୯-୨୦ ରେ ୧ ଲକ୍ଷ ୫୫ ହଜାର ଟଙ୍କା ରାଜସ୍ବ ମିଳିଛି। ଓଳାଶୁଣୀ ଠାରେ ନିର୍ମିତ ପରିବେଶ ପର୍ଯ୍ୟଟନ କେନ୍ଦ୍ରରେ ୨୦୧୬-୧୭ ଆର୍ଥିକ ବର୍ଷରେ ମାତ୍ର ୧୪ ହଜାର ଟଙ୍କା ରାଜସ୍ବ ମିଳିଥିବା ବେଳେ ୨୦୧୭-୧୮ରେ ୪୩ ହଜାର ଟଙ୍କା, ୨୦୧୮-୧୯ରେ ୨୦ ହଜାର ଟଙ୍କା ଓ ୨୦୧୯-୨୦ରେ ମାତ୍ର ୧୩ ହଜାର ଟଙ୍କା ରାଜସ୍ବ ମିଳିଛି। ଏବେ ଏହି ଦୁଇ ପ୍ରକଳ୍ପ ରାଜ୍ୟ ବନ ଉନ୍ନୟନ୍ନ ନିଗମକୁ ହସ୍ତାନ୍ତର କରାଯାଇଛି। ନିଗମ ପକ୍ଷରୁ ଏକ କୋଠରୀରେ ୨୪ ଘଣ୍ଟା ରହଣି ପାଇଁ ୧୮୫୭ ଟଙ୍କା ଅର୍ଥରାଶି ଦାଖଲ କରିବା ନିୟମ ରହିଛି। ଯେଉଁ ପର୍ଯ୍ୟଟକ ଏହି ପରିବେଶ ପର୍ଯ୍ୟଟନ କେନ୍ଦ୍ରରେ ରହିବାକୁ ଆସୁଛନ୍ତି ଏଠାରେ ସର୍ବନିମ୍ନ ସୁବିଧା ନ ଥିବାରୁ ବାଧ୍ୟ ହୋଇ ଫେରିଯାଉଛନ୍ତି। ବର୍ଷ ବର୍ଷ ହେବ ଏପରି ଅବ୍ୟବସ୍ଥା ଦେଖାଦେଇଥିଲେ ମଧ୍ୟ ଆଜି ଯାଏ ବିଭାଗ ପକ୍ଷରୁ କୌଣସି ପଦକ୍ଷେପ ନିଆଯାଉନାହାନ୍ତି। ଏ ସମ୍ପର୍କରେ ଚଣ୍ଡିଖୋଲ ବନପାଳ ଶଶୀକାନ୍ତ ବେହେରାଙ୍କୁ ପଚାରିବାରୁ ସେ କୁହନ୍ତି, ଏବିଷୟରେ ଉଚ୍ଚ ଅଧିକାରୀଙ୍କୁ ଅବଗତ କରାଯାଇଛି। ଖୁବଶୀଘ୍ର ସମସ୍ୟାର ସମାଧାନ କରାଯିବ।
