ରାୟଗଡ଼ା,୪।୩(ସ୍ବ.ପ୍ର.): ରାୟଗଡ଼ା ଜିଲାରେ ବଢ଼ି ଚାଲିଛି ବ୍ୟାପକ ବେଆଇନ କାରବାର। ବିଶେଷ ଭାବେ ପଥର, ମୋରମ ଓ ବାଲି ଚୋରା ଚାଲାଣ ସାଧାରଣ ଘଟଣା ହୋଇଗଲାଣି। ଜିଲାର ପ୍ରତ୍ୟେକ ତହସିଲ ଅଞ୍ଚଳରେ ଏହି କାରବାର ବଢ଼ି ଚାଲିଛି। ସରକାରଙ୍କୁ କୋଟି କୋଟି ଟଙ୍କାର ରାଜସ୍ବ ଫାଙ୍କି ଏହି ଚୋରା କାରବାର କରୁଛନ୍ତି ବ୍ୟବସାୟୀ। ବିଭାଗୀୟ କର୍ମଚାରୀଙ୍କ ଅବହେଳା ଓ ବ୍ୟକ୍ତିଗତ ସ୍ବାର୍ଥ ଏହାର ମୁଖ୍ୟ କାରଣ ବୋଲି ବୁଦ୍ଧିଜୀବୀମାନେ କହିଛନ୍ତି। ଏହିଭଳି ଏକ ବେଆଇନ କାମ ଦେଖିବାକୁ ମିଳିଛି ରାୟଗଡ଼ା ସଦର ମହକୁମାରୁ ମାତ୍ର ୨କି.ମି. ଦୂରରେ। ସେଠାରେ ଏକ ବେଆଇନ ପଥର ଖାଦାନ ରହିଛି। ବିନା ଅନୁମତିରେ ଜଣେ ଅଣ ଓଡ଼ିଆ ବ୍ୟକ୍ତି ଏହି ଖାଦାନରୁ ପଥର ଲୁଟି ନେଉଛନ୍ତି ା ପ୍ରତିଦିନ ହଜାର ହଜାର ସିଏମ୍ ପଥର ଖନନ ହୋଇ ଚାଲାଣ ହେଉଛି। ଏହି ବେଆଇନ ପଥର ଖନନ ଦ୍ୱାରା ପରିବେଶ ଓ ପ୍ରାକୃତିକ ସୌନ୍ଦର୍ଯ୍ୟ ନଷ୍ଟ ସାଙ୍ଗକୁ ସରକାରଙ୍କ କୋଟି କୋଟି ଟଙ୍କା ରାଜସ୍ବ ହାନି ହେଉଛି।
ସୂଚନା ଅନୁଯାୟୀ, ରାୟଗଡ଼ା ତହସିଲ ଅଧୀନ ଧୁମାଗୁଡ଼ା ମୌଜାର ଖାତା ନମ୍ବର ୨୭ର ପ୍ଲଟ୍ ନମ୍ବର ୧୭୧ରେ ଏହି ବେଆଇନ ପଥର ଖନନ ଚାଲିଛି। ସରକାରୀ ରେକର୍ଡ ଅନୁଯାୟୀ ଏହି ପ୍ଲଟ୍ ପ୍ରାୟ ୧୨ ଏକର ପରିମିତ ଏବଂ ପାହାଡ଼ କିସମ ବୋଲି ଉଲ୍ଲେଖ ରହିଛି। ତେବେ ଏହି ବିରାଟ କାୟ ପାହାଡ଼କୁ ୨୦୨୧ରୁ ଜଣେ ଅଣ ଓଡ଼ିଆ ବ୍ୟକ୍ତି ବେଆଇନ ଭାବେ ଖନନକରି ଚାଲିଛନ୍ତି। ପ୍ରାୟ ୩ ଏକର ଅଞ୍ଚଳରୁ ପଥର ଖନନ କରାଗଲାଣି। ଏଠାରେ ରହିଥିବା ମୂଲ୍ୟବାନ୍ କଳାପଥର ପାଇଁ ପ୍ରତି ୨ରୁ ୩ ଦିନରେ ଜିଲୋଟିନ ବ୍ୟବହାର କରି ବେଆଇନ ବ୍ଲାଷ୍ଟିଂ କରାଯାଇ ପଥର ଖନନ କରି ଚାଲାଣ କରାଯାଉଛି। ଏହି ପଥର ଖନନ କରାଯାଇ ବେଆଇନ ଭାବେ ଆନ୍ଧ୍ରପ୍ରଦେଶକୁ ଚାଲାଣ ହେଉଥିବା ସାମାଜିକ କର୍ମୀମାନେ ଅଭିଯୋଗ କରିଛନ୍ତି। ଏହି ପ୍ଲଟ୍ରେ ପଥର ଖନନ ପାଇଁ ତହସିଲ ପକ୍ଷରୁ କୌଣସି ଲିଜ୍ ପ୍ରଦାନ କରାଯାଇନାହିଁ କି କୌଣସି ବିଜ୍ଞପ୍ତି ପ୍ରକାଶ ପାଇନାହିଁ । ଏଭଳିକି ପ୍ରଦୂଷଣ ବିଭାଗ ପକ୍ଷରୁ କୌଣସି ଗ୍ରାମସଭା ମଧ୍ୟ ହୋଇ ନ ଥିବା ଜଣାପଡ଼ିଛି। ତେବେ ଜିଲାପାଳ କାର୍ଯ୍ୟାଳୟ ଓ ପୋଲିସ କାର୍ଯ୍ୟାଳୟରୁ ମାତ୍ର ୨କି.ମି. ଦୂରରେ ଅବସ୍ଥିତ ଏହି ପାହାଡ଼ରେ ବେଆଇନ ବ୍ଲାଷ୍ଟିଂ କରାଯାଉଥିବା ବେଳେ ଅଧିକାରୀଙ୍କ ନଜର ପଡ଼ୁ ନ ଥିବା ଆଶ୍ଚର୍ଯ୍ୟଜନକ। ବର୍ତ୍ତମାନ ସୁଦ୍ଧା ୩ହଜାର ସିଏମ୍ ପଥର ଧୁମାଗୁଡ଼ା ଗାଁ ନିକଟ ପାହାଡ଼ରୁ ଖନନ କରି ଚାଲାଣ ହୋଇଥିବା ଜଣେ ରାଜସ୍ବ କର୍ମଚାରୀ ସୂଚନା ଦେଇଛନ୍ତି। ଉକ୍ତ ବ୍ଲାଷ୍ଟିଂ ଏବଂ ପଥର ଖନନ ଦ୍ୱାରା ନିକଟସ୍ଥ ଗ୍ରାମ ପ୍ରତି ବିପଦ ରହିବା ସହ ପରିବେଶ ପ୍ରଦୂଷିତ ହେଉଛି। ଉକ୍ତ ପାହାଡ଼ ନିକଟରେ ରହିଥିବା ବହୁ ପୁରୁଣା ଗଛ ସବୁ ନଷ୍ଟ ହେବାକୁ ଲାଗିଲାଣି। ଶୁକ୍ରବାର ମଧ୍ୟ ସେଠାରେ ମେଶିନ ସାହାଯ୍ୟରେ ପଥର ଖନନ ହେବା ସହ ବହୁ ପୁରୁଣା ବଡ଼ ବଡ଼ ବୃକ୍ଷକୁ ମେଶିନ ସାହାଯ୍ୟରେ କାଟିଦିଆଯାଇଥିବା ଦେଖିବାକୁ ମିଳିଥିଲା। ତେବେ ପ୍ରଶାସନିକ ଅଧିକାରୀ କାହିଁକି କୌଣସି ଆଇନଗତ ପଦକ୍ଷେପ ନେଉନାହାନ୍ତି ତାହା ସନ୍ଦେହ ଘେରରେ। ଖଜୁରିଗଛ ମୂଳରୁ ପାହାଚ ପାହାଚ ଭଳି ତହସିଲ କାର୍ଯ୍ୟାଳୟର ଉପରଠୁ ତଳ ସମସ୍ତ ଅଧିକାରୀ ଦୁର୍ନୀତିଗ୍ରସ୍ତ ଏବଂ ବ୍ୟକ୍ତିଗତ ସ୍ବାର୍ଥ ସାଧନରେ ବ୍ୟସ୍ତ ବୋଲି ସାମାଜିକ କର୍ମୀମାନେ କହିଛନ୍ତି। ତେବେ ଏନେଇ ତହସିଲଦାର ତାପସ ରାଉତଙ୍କୁ ପଚାରିବାରୁ ପଥର ଖନନ ଖବରପାଇ ସେଠାକୁ ଯାଇଥିଲେ ବୋଲି କହିଛନ୍ତି। ଏନେଇ ପୋଲିସରେ ଏକ ମାମଲା ରୁଜୁ କରାଯାଇଛି। ତଦନ୍ତ ପରେ ଆଇନଗତ କାର୍ଯ୍ୟାନୁଷ୍ଠାନ ନିଆଯିବ ବୋଲି ସେ କହିଛନ୍ତି।
