ଓଡ଼ିଆ ପରମ୍ପରାରେ ସାଧବମାନେ ବାଣିଜ୍ୟ କରିବାର ପରମ୍ପରା ଥିଲା। ଏବେ ପୂର୍ବ ଭଳି ସେହି ପରମ୍ପରା ନାହିଁ ସତ କିନ୍ତୁ ବାଣିଜ୍ୟ କ୍ଷେତ୍ର ବେଶ୍ ଅଗ୍ରଗତି କରିଛି। ଆଉ ପୁରୁଷମାନଙ୍କ ଭଳି ମହିଳାମାନେ ବି ବ୍ୟବସାୟ କ୍ଷେତ୍ରରେ ସଫଳ ଉଦାହରଣ ସୃଷ୍ଟି କରି ପାରିଛନ୍ତି।
ସଫଳ ଉଦ୍ୟୋଗୀ
ପରିବାର ଲୋକଙ୍କର ରକ୍ଷଣଶୀଳ ମନୋଭାବ ଯୋଗୁ ଭଲ ପାଠ ପଢି ଉଚ୍ଚଶିକ୍ଷିତା ହୋଇଥିଲେ ବି ଚାକିରି କରିପାରି ନ ଥିଲେ। କିନ୍ତୁ ବିବାହ କରି ପିଲାମାନେ ବଡ଼ ହେବା ପରେ ସେ ଆରମ୍ଭ କରିଥିଲେ ବ୍ୟବସାୟ। ଆଉ ଆଜି ସେ ଭୁବନେଶ୍ୱରର ଜଣେ ପ୍ରତିଷ୍ଠିତ ବ୍ୟବସାୟୀ।
ଭୁବନେଶ୍ୱରର ବମିଖାଲରେ ରୁହନ୍ତି କୁକୁମିନା ପରିଜା। ଭୁବନେଶ୍ୱରର ଓଇସି (ଓଡ଼ିଶା ଇଞ୍ଜିନିୟରିଂ କଲେଜ)ରୁ ସେ ଇଲେକ୍ଟ୍ରୋନିକ୍ସରେ ଇଞ୍ଜିନିୟରିଂ ଡିଗ୍ରି ହାସଲ କରିଛନ୍ତି। ବାପା ଜଣେ ସଫଳ ବ୍ୟବସାୟୀ ଓ ସ୍ବାମୀ ସୁବାଶିଷ ରାୟ କେନ୍ଦ୍ର ସରକାରଙ୍କର ଜଣେ ଉଚ୍ଚପଦସ୍ଥ ଅଧିକାରୀ। ଏହା ସତ୍ତ୍ୱେ ସେ ଆତ୍ମନିର୍ଭର ହେବା ପାଇଁ ଚିନ୍ତା କରିଥିଲେ। ତେଣୁ ପ୍ରଥମେ ଲକ୍ଷ୍ମୀସାଗରଠାରେ ତିଆରି କଲେ ‘ନିର୍ମଳା ରେସିଡେନ୍ସି ଲଜ୍’। ତା’ପରେ ବମିଖାଲରେ କରିଥିଲେ ‘ନିଶାମଣି ପ୍ୟାଲେସ୍’ ମ୍ୟାରେଜ୍ ମଣ୍ଡପ ଓ କ୍ୟାଟରିଂ ସର୍ଭିସ୍। ଏବେ ସେ ଏହି ଦୁଇ ବ୍ୟବସାୟକୁ ବେଶ୍ ସହଜରେ ପରିଚାଳନା କରୁଛନ୍ତି। ନିଜେ ସଫଳ ହେବା ସହ ଅନେକଙ୍କୁ ଦେଇଛନ୍ତି କର୍ମନିଯୁକ୍ତିର ସୁଯୋଗ। ସଫଳ ଉଦ୍ୟୋଗୀଭାବେ ସେ ପରିଚୟ ବି ହାସଲ କରିପାରିଛନ୍ତି। ଅବଶ୍ୟ କରୋନା ପାଇଁ
ତାଙ୍କୁ କିଛି ମାସ କ୍ଷତି ସହିବାକୁ ପଡିଥିଲା, କିନ୍ତୁ ଏବେ ପୁଣି ଥରେ ସେ ବ୍ୟବସାୟକୁ ଆଗେଇ ନେଇ ପାରିଛନ୍ତି।
-କୁକୁମିନା ପରିଜା, ଭୁବନେଶ୍ୱର
ଅନ୍ଲାଇନ୍ରେ ବ୍ୟବସାୟ
ଆତ୍ମନିର୍ଭର ହେବାର ପ୍ରବଳ ଆଗ୍ରହ ଆଜି ତାଙ୍କୁ ଦେଇଛି ସଫଳତା। ଜଣେ ଡିଜାଇନରଭାବେ ସେ ପାଇଛନ୍ତି ସ୍ବତନ୍ତ୍ର ପରିଚୟ। ଗହଣା ଡିଜାଇନ କରି ଆଜି ବ୍ୟବସାୟ ଜଗତରେ ଅଗ୍ରସର ହେବାରେ ଲାଗିଛନ୍ତି ସଙ୍ଗ୍ରିଲା ମହାନ୍ତି।
ନୟାଗଡ଼ର ମହିଳା ଡିଜାଇନର ହେଉଛନ୍ତି ସଙ୍ଗ୍ରିଲା। ନାରୀମାନଙ୍କର ସମସ୍ତ ଗହଣା ଡିଜାଇନ କରି ବେଶ୍ ଆକର୍ଷଣୀୟ କରିପାରନ୍ତି ସଙ୍ଗ୍ରିଲା। ଆଉ ତାଙ୍କର ଡିଜାଇନର ସମସ୍ତ ଗହଣାକୁ ସେ ‘ପ୍ରେମ୍ ଫ୍ୟାଶନ୍’ ନାଁରେ ଅନ୍ଲାଇନ୍ ମାଧ୍ୟମରେ ବିକ୍ରି କରନ୍ତି। ଚୁଡି ଠାରୁ ଆରମ୍ଭ କରି ହାର, କାନଫୁଲ କିମ୍ବା ମଥା ଟିକା ଆଦି ସବୁ ପ୍ରକାରର ଗହଣାକୁ ଆଧୁନିକ ଡିଜାଇନରେ ତିଆରି କରି ସେ ବିକ୍ରି କରୁଛନ୍ତି। ଏହି ମାଧ୍ୟମରେ ଏବେ ସେ ବେଶ୍ ଭଲ ରୋଜଗାର ବି କରିପାରୁଛନ୍ତି। ପରିବାର ପାଇଁ ସମୟ ବାହାର କରିବା ସହିତ ବ୍ୟବସାୟକୁ ବି ଠିକ୍ ଭାବେ ଚଳାଇ ଏବେ ସେ ଉଦାହରଣ ପାଲଟିଛନ୍ତି। ବଡ କଥା ହେଉଛି କି ଏସବୁ ଡିଜାଇନ ପାଇଁ ସଙ୍ଗ୍ରିଲା କେବେ କାହା ଠାରୁ ତାଲିମ୍ ନେଇ ନାହାନ୍ତି। ପିଲାବେଳେ ମା’ଙ୍କ କାମ ଦେଖି ଗହଣା ଡିଜାଇନ୍ କରିବା ପାଇଁ ତାଙ୍କର ଆଗ୍ରହ ସୃଷ୍ଟି ହୋଇଥିଲା। ଆଉ ଏହି କାମ ପାଇଁ ତାଙ୍କୁ ପ୍ରେରଣା ଯୋଗାଇଥିଲେ ତାଙ୍କର ଜଣେ ବାନ୍ଧବୀ ଚିନ୍ମୟୀ ସେନାପତି। ତା’ପରେ ୟୁଟ୍ୟୁବରୁ ଡିଜାଇନ୍ କାମ ଶିଖି ସେ ଆରମ୍ଭ କରିଥିଲେ ବ୍ୟବସାୟ। ଫେସବୁକ୍, ହ୍ବାଟ୍ସ ଆପ୍ ମାଧ୍ୟମରେ ସେ ଏବେ ବ୍ୟବସାୟ କରୁଛନ୍ତି। ଖାଲି ସେତିକି ନୁହେଁ ତାଙ୍କ ବ୍ୟବସାୟର ସଫଳତାକୁ ଦେଖି ଏବେ ତାଙ୍କଠାରୁ ଡିଜାଇନ୍ କାମର ତାଲିମ୍ ନେଉଛନ୍ତି ୨୦ଜଣ ପିଲା। ଭୁବନେଶ୍ୱରର ଓଲ୍ଡ ଟାଉନରେ ଏଥିପାଇଁ ସେ ସାଇ ଟ୍ୟୁଟୋରିଆଲ ଖୋଲିଛନ୍ତି। ନିଜେ ଆତ୍ମନିର୍ଭର ହେବା ସହିତ ଅନ୍ୟମାନଙ୍କ ପାଇଁ ରୋଜଗାରର ମାଧ୍ୟମ ସୃଷ୍ଟି କରିବା ଲାଗି ସୁଯୋଗ ଆଣି ଦେଇଛନ୍ତି ସଙ୍ଗ୍ରିଲା।
-ସଙ୍ଗ୍ରିଲା ମହାନ୍ତି, ନୟାଗଡ଼
ଡିଜିଟାଲ ମାର୍କେଟିଂ
ବ୍ୟବସାୟ କରି ନିଜେ ସଫଳ ହେବା ସହିତ ଆହୁରି ଅନେକଙ୍କୁ ସଫଳତାର ମାର୍ଗଦର୍ଶନ ନିମନ୍ତେ ଉଦ୍ୟମ ଚଳାଇଛନ୍ତି ଜଣେ ମହିଳା ଉଦ୍ୟୋଗୀ ଅନନ୍ୟା ପଟ୍ଟନାୟକ। ଡିଜିଟାଲ ମାର୍କେଟିଂ କ୍ଷେତ୍ରରେ ସେ ନିଜେ ସଫଳତା ହାସଲ କରିବା ସହିତ ଅନ୍ୟମାନଙ୍କୁ ବ୍ୟବସାୟର କୌଶଳ ଶିଖାଇ ପାରୁଛନ୍ତି।
ସଫଳତାର ଏଇ ସୋପାନରେ ପହଞ୍ଚିବା ପାଇଁ ଅନନ୍ୟା ଢେର୍ ପରିଶ୍ରମ କରିଛନ୍ତି। ବି.ଏସ୍ସି. ପଢ଼ିବା ପରେ ସେ ମଲ୍ଟିମିଡିଆ କୋର୍ସ ଆଉ ତା’ପରେ ସାମ୍ବାଦିକତା କରି କ୍ୟାରିୟର ଆରମ୍ଭ କରିଥିଲେ। କଣ୍ଟେଣ୍ଟ ରାଇଟିଂ ଆଉ ଗ୍ରାଫିକ୍ସ ଡିଜାଇନ୍ କାମ କରି କ୍ୟାରିୟର କରିଥିଲେ ସତ କିନ୍ତୁ ଆତ୍ମସନ୍ତୋଷ ପାଇ ନ ଥିଲେ। ତେଣୁ ନିଜେ କିଛି କରିବା ଉଦ୍ଦେଶ୍ୟରେ ଭୁବନେଶ୍ୱରରେ ପ୍ରତିଷ୍ଠା କରିଛନ୍ତି ଅପୂର୍ବା ଡିଜାଇନ ୱେର ପ୍ରାଇଭେଟ ଲିମିଟେଡ୍(ADPL) ଏବଂ ବେଟର ମ୍ୟାଟର ଫାଉଣ୍ଡେଶନ୍। ଅନନ୍ୟା ପ୍ରଥମେ ୨୦୦୦ ମସିହାରେ ଏକ ସାଇବର କାଫେ କମ୍ ଡକ୍ୟୁମେଣ୍ଟେଶନ୍ ୟୁନିଟ୍ ଆରମ୍ଭ କରିଥିଲେ କିନ୍ତୁ ଅନୁଭବ କରିଥିଲେ ଯେ, ଏଥିରେ ତାଙ୍କର ବୃହତ୍ତର ସ୍ବାର୍ଥ ପୂରଣ ହେବା କଷ୍ଟ। ସିରିଏଲ ଏଣ୍ଟରପ୍ରାଇଜର ବା ମମ୍ପ୍ରେନେର୍ କୋଚ୍ ଭାବରେ ଦ୍ୱିତୀୟ ଚେଷ୍ଟା ୨୦୧୭ରେ ଆରମ୍ଭ କଲେ ଅନନ୍ୟା। ଜଣେ ମା’ ଆଉ ମାତୃ ଉଦ୍ୟୋଗୀ ମମ୍ପ୍ରେନେର ହେବାର ଏକକାଳୀନ ପ୍ରସ୍ତୁତି ସଫଳ ରୂପ ନେଲା। ତାଙ୍କ ଉଦ୍ୟୋଗୀ ଯାତ୍ରାରେ ଏକ ପରିବର୍ତ୍ତନଶୀଳ ସମୟ ହେଉଛି ତାଙ୍କର ଅନଲାଇନ୍ ଶିକ୍ଷା ଅନୁଷ୍ଠାନ ସକ୍ସେସ୍ ସର୍ଜ ଏକାଡେମୀ, ଓଡ଼ିଶାର ଉଦୀୟମାନ ଡିଜିଟାଲ ମାର୍କେଟିଂ ଟ୍ରେନିଂ ବ୍ରାଣ୍ଡ ମଧ୍ୟରୁ ଅନ୍ୟତମ ଏବଂ ବର୍ତ୍ତମାନ ଜାତୀୟ ତଥା ଅନ୍ତର୍ଜାତୀୟ ବଜାରରେ ନିଜର ପରିଚୟ ସୃଷ୍ଟି କରିବାକୁ ପ୍ରସ୍ତୁତ। ଚାଳିଶ ହଜାର ଟଙ୍କାରୁ ଆରମ୍ଭ ହୋଇଥିବା ଏହି ଉଦ୍ୟୋଗ ଏବେ ୫୦ ଲକ୍ଷ ଟଙ୍କାର କାରବାର କରିବାକୁ ସକ୍ଷମ ହୋଇଛି। ତାଙ୍କର ଡିଜିଟାଲ ମାର୍କେଟିଂ ଏଜେନ୍ସି (Ideazicon) ମାଧ୍ୟମରେ ବ୍ୟକ୍ତିଗତ ବ୍ରାଣ୍ଡିଂ, ଆଫିଲିଏଟ୍ ମାର୍କେଟିଂ ଏବଂ ଇନଫ୍ଲୁଏନ୍ସର ମାର୍କେଟିଂରେ ସେବା ପ୍ରଦାନ କରାଯାଇଥାଏ। ମାତୃତ୍ୱ ଓ ବ୍ୟବସାୟ ଉଦ୍ୟୋଗକୁ ସମାନ୍ତରାଳ ଭାବେ ପ୍ରାଧାନ୍ୟ ଦେଇ କାର୍ଯ୍ୟ କରିବାକୁ ପରିବାରର ସହଯୋଗ ନିହାତି ଆବଶ୍ୟକ ବୋଲି ସେ ଅନୁଭବ କରନ୍ତି।
-ଅନନ୍ୟା ପଟ୍ଟନାୟକ, ଭୁବନେଶ୍ୱର
