କଟକ ଅଫିସ,୨୪ା୮-ରାଜ୍ୟର ଏକ ପ୍ରତିଷ୍ଠିତ ସରକାରୀ ବିଶ୍ୱବିଦ୍ୟାଳୟରେ ନାମ ଲେଖାଇଦେବାର ପ୍ରଲୋଭନ ଦେଖାଇ ଜଣେ ବିଦ୍ୟାର୍ଥୀଙ୍କୁ ଠକିଥିବା ୨ ଜଣ ଦଲାଲ ଗିରଫ ହୋଇଛନ୍ତି। ଏହି ଘଟଣା ମର୍କତନଗର ଥାନା ଅଞ୍ଚଳରେ ଘଟିଛି। ଗିରଫ ଅଭିଯୁକ୍ତ ଦ୍ୱୟ ହେଲେ ଭୁବନେଶ୍ୱର ନୟାପଲ୍ଲୀ ଅଞ୍ଚଳର ସନ୍ଦୀପ ମିଶ୍ର (୨୬) ଓ ଓଲ୍ଡ ଟାଉନ ଅଞ୍ଚଳର ସୁଜିତ ରାଉତରାୟ (୨୯)।
ସୂଚନା ଅନୁଯାୟୀ, ମର୍କତନଗର ସେକ୍ଟର-୯ ଅଞ୍ଚଳର ଜଣେ ବିଦ୍ୟାର୍ଥୀ ଉଚ୍ଚଶିକ୍ଷା ପାଇଁ ବିଭିନ୍ନ ବିଶ୍ୱବିଦ୍ୟାଳୟରେ ଆବେଦନ କରିଥିଲେ। କିଛି ଦିନ ତଳେ ଅଭିଯୁକ୍ତ ଦ୍ୱୟ ତାଙ୍କୁ ଯୋଗାଯୋଗ କରିଥିଲେ। ୧ଲକ୍ଷ ଟଙ୍କା ଦେଲେ ନାମଲେଖା ହୋଇଯିବ ବୋଲି ସେମାନେ ବିଦ୍ୟାର୍ଥୀ ଜଣଙ୍କୁ କହିବା ପରେ ୪୦ ହଜାର ଟଙ୍କାର ଚେକ୍ ଓ ନଗଦ ୬୦ ହଜାର ଟଙ୍କା ନେଇଥିଲେ। ବିଦ୍ୟାର୍ଥୀ ଜଣଙ୍କ ବାରମ୍ବାର ଫୋନ କରି ନାମଲେଖା ପ୍ରକ୍ରିୟା ସମ୍ପର୍କରେ ବୁଝାସୁଝା କରିଥିଲେ ମଧ୍ୟ ଅଭିଯୁକ୍ତ ଦ୍ୱୟ ଧରାଛୁଆଁ ଦେଇ ନ ଥିଲେ। ପରେ ମୋବାଇଲ ଅଫ୍ କରି ଦେଇଥିଲେ। ଏ ନେଇ ବିଦ୍ୟାର୍ଥୀ ଜଣଙ୍କ ମର୍କତନଗର ଥାନାରେ ଏତଲା ଦେବା ପରେ ପୋଲିସ ଘଟଣାର ତଦନ୍ତ ଆରମ୍ଭ କରିଥିଲା। କେସ୍ ନଂ-୧୪୩, ଆଇପିସି ଧାରା ୪୧୯/୪୨୦/୪୬୭/୪୬୮/୩୪ ଅନୁଯାୟୀ ଉଭୟଙ୍କୁ ଗିରଫ ପରେ କୋର୍ଟ ଚାଲାଣ କରାଯାଇଛି।
