ଲଣ୍ଡନ,୧୬।୫ (ପି.ଟି.): ନ୍ୟୁଜିଲାଣ୍ଡ ବିପକ୍ଷରେ ଇଂଲଣ୍ଡ ଘରୋଇ ପରିବେଶରେ ଦୁଇ ମ୍ୟାଚ୍ ବିଶିଷ୍ଟ ଟେଷ୍ଟ ସିରିଜରେ ଖେଳିବ। ତେବେ ଟେଷ୍ଟ ଦଳରେ ଇଣ୍ଡିଆନ ପ୍ରିମିୟର ଲିଗ୍ (ଆଇପିଏଲ୍) ଖେଳିଥିବା ଇଂଲଣ୍ଡ ଖେଳାଳିଙ୍କୁ ସାମିଲ କରାଯାଇ ନ ପାରେ ବୋଲି ଏକ ରିପୋର୍ଟରୁ ଜଣାଯାଇଛି। ଆଇପିଏଲ୍ ଖେଳିଥିବା କ୍ରିକେଟରମାନେ କ୍ୱାରାଣ୍ଟାଇନରେ ରହିଥିବାରୁ ଏପରି ଆଶଙ୍କା ସୃଷ୍ଟି ହୋଇଛି।
ଫଳରେ ଜୋଶ ବଟଲର, ଜନି ବେୟାରଷ୍ଟୋ, କ୍ରିସ୍ ଓ୍ବକ୍ସ, ସାମ୍ କୁରାନ ଓ ମୋଇନ ଅଲୀଙ୍କ ଭଳି କ୍ରିକେଟର ୧୦ ଦିନିଆ କ୍ୱାରାଣ୍ଟାଇନ୍ରେ ରହୁଥିବାରୁ ନ୍ୟୁଜିଲାଣ୍ଡ ବିପକ୍ଷ ଏହି ସିରିଜରେ ସାମିଲ ହୋଇପାରିବେ ନାହିଁ। କୋଭିଡ୍-୧୯ ପାଇଁ ଆଇପିଏଲ୍ ସସ୍ପେଣ୍ଡ ହେବା ପରେ ପ୍ରତ୍ୟାବର୍ତ୍ତନ କରି ଏହି ଖେଳାଳିମାନେ କ୍ୱାରାଣ୍ଟାଇନରେ ରହୁଛନ୍ତି। ଏହି ସିରିଜ ଜୁନ୍ ୨ ତାରିଖରୁ ଆରମ୍ଭ ହେବାକୁ ଯାଉଛି। ଚଳିତ ସପ୍ତାହ ଶେଷ ଆଡକୁ ଖେଳାଳିମାନଙ୍କ ଆଇସୋଲେଶନ ପିରିୟଡ ଶେଷ ହେବ। ଲଡର୍ସରେ ପ୍ରଥମ ଟେଷ୍ଟ ଆରମ୍ଭ ପୂର୍ବରୁ ଦୁଇ ସପ୍ତାହର ଅନ୍ତର ରହିବ ଓ ଏହା ଯଥେଷ୍ଟ ନୁହେଁ ବୋଲି କୁହାଯାଇଛି। ଆଇପିଏଲ୍ରେ ୧୧ଜଣ ଆଗଧାଡିର ଇଂଲଣ୍ଡ ଖେଳାଳି ବିଭିନ୍ନ ଫ୍ରାଞ୍ଚାଇଜ ତରଫରୁ ପ୍ରତିନିଧିତ୍ୱ କରିଛନ୍ତି।
