ନୂଆଦିଲ୍ଲୀ,୧୩।୫: ଇଂଲଣ୍ଡ କ୍ରିକେଟରୁ ଏକ ଚକିତ କଲାଭଳି ଖବର ସାମ୍ନାକୁ ଆସିଛି । ଇଂଲଣ୍ଡ ଟିମ୍ର ଅଭିଜ୍ଞ ଅଲରାଉଣ୍ଡର ଲିଆମ ଡସନ (Liam Dawson) ହଠାତ ପ୍ରଥମ ଶ୍ରେଣୀ (First-Class) କ୍ରିକେଟରୁ ଅବସର ଘୋଷଣା କରିଛନ୍ତି। କାଉଣ୍ଟି କ୍ରିକେଟ ସିଜିନ ମଝିରେ ହିଁ ସେ ଏଭଳି ନିଷ୍ପତ୍ତି ନେଇ ସମସ୍ତଙ୍କୁ ଆଶ୍ଚର୍ଯ୍ୟ କରିଛନ୍ତି।
ଇଂଲଣ୍ଡ ଏବଂ ହାମ୍ପସାୟର୍ର ଷ୍ଟାର୍ ଅଲରାଉଣ୍ଡର ଲିଆମ ଡସନ ନିଜର ପ୍ରଥମ ଶ୍ରେଣୀ କ୍ୟାରିୟରରେ ପୂର୍ଣ୍ଣଛେଦ ପକାଇଛନ୍ତି। ସେ ନିଜର ହ୍ବାଇଟ-ବଲ (White-ball) କ୍ୟାରିୟରକୁ ଆହୁରି ଅଧିକ ସମୟ ପର୍ଯ୍ୟନ୍ତ ଜାରି ରଖିବା ପାଇଁ ଏହି ନିଷ୍ପତ୍ତି ନେଇଥିବା ଜଣାଇଛନ୍ତି। ସେ ହାମ୍ପସାୟର୍ ପାଇଁ ଟି-୨୦ ବ୍ଲାଷ୍ଟ ଏବଂ ଦିନିକିଆ କପ୍ରେ ଖେଳିବା ଜାରି ରଖିବେ।
ଡସନ ହାମ୍ପସାୟର୍ ପାଇଁ ୨୦୦ରୁ ଅଧିକ ପ୍ରଥମ ଶ୍ରେଣୀ ମ୍ୟାଚ ଖେଳି ୧୦,୦୦୦ରୁ ଅଧିକ ରନ ଏବଂ ୩୫୦ରୁ ଅଧିକ ୱିକେଟ ହାସଲ କରିଛନ୍ତି। ଇଂଲଣ୍ଡ ପାଇଁ ସେ ୪ଟି ଟେଷ୍ଟ ମ୍ୟାଚ ଖେଳିଛନ୍ତି। ଭାରତ ବିରୋଧରେ ଡେବ୍ୟୁ କରି ସେ ନାବାଦ ୬୬ ରନ୍ର ଏକ ଦମଦାର ଇନିଂସ ଖେଳିଥିଲେ।
୨୦୨୪ ସିଜିନ ତାଙ୍କ ପାଇଁ ସବୁଠାରୁ ଶ୍ରେଷ୍ଠ ରହିଥିଲା। ସେ ’PCA ମେନ୍ସ ପ୍ଲେୟାର ଅଫ ଦି ଇୟର’ ଏବଂ ‘କାଉଣ୍ଟି ଚାମ୍ପିୟନଶିପ ପ୍ଲେୟାର ଅଫ ଦି ଇୟର’ ଭଳି ସମ୍ମାନଜନକ ପୁରସ୍କାର ଜିତିବା ସହ ୱିଜଡେନର ପାଞ୍ଚଜଣ ଶ୍ରେଷ୍ଠ କ୍ରିକେଟରଙ୍କ ମଧ୍ୟରେ ସ୍ଥାନ ପାଇଥିଲେ।
ତେବେ ଅବସର ନେବା ସମୟରେ ଡସନ କହିଛନ୍ତି, ଏହି ନିଷ୍ପତ୍ତି ନେବା ସହଜ ନ ଥିଲା, କିନ୍ତୁ ହ୍ବାଇଟ-ବଲ କ୍ରିକେଟକୁ ଲମ୍ବା ସମୟ ପର୍ଯ୍ୟନ୍ତ ଖେଳିବା ପାଇଁ ଏହା ହିଁ ସଠିକ ସମୟ। ହାମ୍ପସାୟର୍ ପାଇଁ ୨୦୦ ମ୍ୟାଚ ଖେଳିବା ମୋ ପାଇଁ ଗର୍ବର ବିଷୟ।
କହିରଖୁଛୁ, ୨୧ତମ ଶତାବ୍ଦୀରେ ହାମ୍ପସାୟର୍ ପାଇଁ ସର୍ବାଧିକ ରନ ସଂଗ୍ରହକାରୀଙ୍କ ତାଲିକାରେ ଡସନ ଚତୁର୍ଥ ସ୍ଥାନରେ ରହିଛନ୍ତି। ତାଙ୍କର ଏହି ନିଷ୍ପତ୍ତି ତାଙ୍କ ପ୍ରଶଂସକଙ୍କୁ ଦୁଃଖୀ କରିଥିଲେ ମଧ୍ୟ ସୀମିତ ଓଭର କ୍ରିକେଟରେ ତାଙ୍କର ଜଲୱା ଦେଖିବାକୁ ମିଳିବ।.
Dharitri – Odisha’s No.1 Odia Daily