ହେଡିଂଲେ,୨୬।୬: ସ୍ଥାନୀୟ ଲିଡ୍ସ ଗ୍ରାଉଣ୍ଡରେ ଇଂଲଣ୍ଡ ଓ ନ୍ୟୁଜିଲାଣ୍ଡ ମଧ୍ୟରେ ଚାଲିଥିବା ତୃତୀୟ ଟେଷ୍ଟ ଏବେ ନିର୍ଣ୍ଣାୟକ ମୋଡ଼ରେ ପହଞ୍ଚିଛି। ପ୍ରଥମ ଇନିଂସରେ ନ୍ୟୁଜିଲାଣ୍ଡ ୩୨୯ ରନ୍ କରିଥିବା ବେଳେ ଇଂଲଣ୍ଡ ୩୬୦ ରନ୍ କରିଥିଲା। ୩୧ ରନ୍ ପଛରେ ଥିବା ନ୍ୟୁଜିଲାଣ୍ଡ ଦ୍ୱିତୀୟ ଇନିଂସରେ ୩୨୬ ରନ୍ରେ ଅଲଆଉଟ୍ ହୋଇଯାଇଛି। ଫଳରେ ଘରୋଇ ଇଂଲଣ୍ଡକୁ ସିରିଜ୍ ମୂଳପୋଛ କରିବା ପାଇଁ ୨୯୬ ରନ୍ ଦରକାର। ଅନ୍ୟପକ୍ଷେ ଇଂଲଣ୍ଡ ଦୁଇ ଓପନରଙ୍କୁ ହରାଇ ୧୭୦ ରନ୍ କରିଛି।
ଶନିବାର ଭ୍ରମଣକାରୀ ନ୍ୟୁଜିଲାଣ୍ଡ ତା’ର ଅସମାପ୍ତ ଦ୍ୱିତୀୟ ଇନିଂସ ସ୍କୋର (୧୬୮/୫)ରୁ ବ୍ୟାଟିଂ ଅରମ୍ଭ କରିଥିଲ। ପୂର୍ବ ଦିନର ଦୁଇ ଅପରାଜିତ ବ୍ୟାଟର ଟମ ବ୍ଲୁଣ୍ଡେଲ ଏବଂ ଡେର୍ଲି ମିଚେଲ ୬ଷ୍ଠ ଉଇକେଟରେ ୧୧୩ ରନ୍ ଯୋଡ଼ିଥିଲେ। ୩ ମ୍ୟାଚ୍ ବିଶିଷ୍ଟ ଏହି ସିରିଜ୍ରେ ଦୁଇ ବ୍ୟାଟରଙ୍କ ମଧ୍ୟରେ ଏହା ଥିଲା ଚତୁର୍ଥ ଶତକୀୟ ଭାଗିଦାରୀ। ଦୁହେଁ ଅର୍ଦ୍ଧଶତକ ପୂରଣ କରିବା ପରେ ପ୍ୟାଭିଲିଅନ ଫେରିଥିଲେ ମିଚେଲ (୫୬ ରନ୍, ୯ ଚୌକା)। ତା’ ପରେ ବ୍ଲୁଣ୍ଡେଲ ଗୋଟିଏ ପଟ ସମ୍ଭାଳି ରଖିଥିବା ବେଳେ ଅନ୍ୟ ପଟେ ଉଇକେଟ ପତନ ଜାରି ରହିଥିଲା। ଫଳରେ ୩୨୬ ରନ୍ରେ ନ୍ୟୁଜିଲାଣ୍ଡ ଅଲଆଉଟ୍ ହୋଇଯାଇଥିଲା। ବ୍ଲୁଣ୍ଡେଲ ୮୮ (୧୫ ଚୌକା) ରନ୍ କରି ଅପରାଜିତ ଥିଲେ। ଘରୋଇ ଇଂଲଣ୍ଡ ପକ୍ଷରୁ ଜ୍ୟାକ ଲିଚ୍ ୫ ଉଇକେଟ ସଫଳତା ହାସଲ କରିଥିବା ବେଳେ ମାଟି ପଟ୍ସ ୩ ଉଇକେଟ ନେଇଥିଲେ।
