ଜୁନାଗଡ଼,୧୮।୪(ସୁନୀଲ କୁମାର ସିଂହ)-କଳାହାଣ୍ଡି ଜିଲା ଜୁନାଗଡ଼ ସହରରେ ଶନିବାର ଏନଫୋର୍ସ ଟିମ ପକ୍ଷରୁଖାଦ୍ୟ ସାମଗ୍ରୀ ଯାଞ୍ଚ କରାଯାଇଛି। ଏହି ଟିମରେ
ଧର୍ମଗଡ଼ ଉପଖଣ୍ଡ ଖାଦ୍ୟ ନିରାପତ୍ତା ବିଭାଗ,ଜୁନାଗଡ଼ ବିଜ୍ଞାପିତ ଅଞ୍ଚଳ ପରିଷଦ କର୍ମଚାରୀ ଏବଂ ପୋଲିସ କର୍ମଚାରୀ ସାମିଲ ଥିଲେ। ଏହି ଅବସରରେ ଜୁନାଗଡ଼ ସହରର ବିଭିନ୍ନ ହୋଟେଲ ଏବଂ ରେଷ୍ଟୁରାଣ୍ଟଗୁଡ଼ିକର ଯାଞ୍ଚ କରାଯାଇଥିଲା। ପ୍ରାୟ ୨୦ କିଲୋଗ୍ରାମ ପଚାସଢ଼ା ଖାଦ୍ୟ ଏବଂ କୃତ୍ରିମ ରଙ୍ଗ ମିଶ୍ରିତ ସନ୍ଦେହଜନକ ସାମଗ୍ରୀକୁ ଚିହ୍ନଟ କରାଯାଇ ତୁରନ୍ତ ନଷ୍ଟ କରିଦିଆଯାଇଥିଲା। ସେହିପରି ଗ୍ରୀଷ୍ମ ଋତୁକୁ ଦୃଷ୍ଟିରେ ରଖି ଲସି ପ୍ରସ୍ତୁତ କରୁଥିବା ୟୁନିଟ୍ଗୁଡ଼ିକର ମଧ୍ୟ ଯାଞ୍ଚ କରାଯାଇଥିଲା। ଏଥିରେ ବ୍ୟବହୃତ ହେଉଥିବା ଦହି ଏବଂ ବରଫର ଉତ୍ସଗୁଡ଼ିକର ଯାଞ୍ଚ କରାଯିବା ସହ, ଉପଯୁକ୍ତ ପରିମଳ ଏବଂ ନିରାପଦ ଖାଦ୍ୟ ପ୍ରସ୍ତୁତି ପ୍ରକ୍ରିୟା ବଜାୟ ରଖିବା ପାଇଁ ସମ୍ପୃକ୍ତ ବ୍ୟବସାୟୀମାନଙ୍କୁ ପରାମର୍ଶ ଦିଆଯାଇଥିଲା। ଏହାସହ ଫଳ ଦୋକାନଗୁଡ଼ିକରେ ବେଆଇନ କାର୍ବାଇଡ୍ ବା ପାଚକ ବ୍ୟବହାରକୁ ରୋକିବା ପାଇଁ ଯାଞ୍ଚ କରାଯାଇଥିଲା। ଏହି ସମୟରେ ପ୍ରାୟ ୧୦ କିଲୋଗ୍ରାମ ନିମ୍ନମାନର ଫଳକୁ ନଷ୍ଟ କରାଯାଇଥିଲା। ସାମଗ୍ରିକ ଭାବେ, ଖାଦ୍ୟ ସୁରକ୍ଷା ଏବଂ ସ୍ୱଚ୍ଛତା ବଜାୟ ରଖିବାର ଗୁରୁତ୍ୱ ବିଷୟରେ ବ୍ୟବସାୟୀମାନଙ୍କୁ ସଚେତନ କରାଯାଇଥିଲା। ଆଗାମୀ ଦିନରେ ମଧ୍ୟ ଏପରି ଯାଞ୍ଚ କରାଯିବ ଵୋଲି ଜଣାପଡିଛି। ଏହି ଚଢ଼ାଉରେ ଧର୍ମଗଡ଼ ଉପଖଣ୍ଡ ଖାଦ୍ୟ ନିରାପତ୍ତା ଅଧିକାରୀ ବିଶ୍ୱଜିତ ନାଏକ, ସେନିଟେସନ ଏକ୍ସପାର୍ଟ ବାଳକୃଷ୍ଣ ବନଜାରା,ପ୍ରଦ୍ୟୁମ୍ନ ଦାଶ,ଖାଦ୍ୟ ସୁରକ୍ଷା ବିଭାଗର ରାଜୀବ ଲୋଚନ ରଣା,ଗଜେନ୍ଦ୍ର କୈବର୍ତ୍ତ ଓ ପୋଲିସ କର୍ମଚାରୀ ଉପସ୍ଥିତ ଥିଲେ।