ଢେଙ୍କାନାଳ ଅଫିସ/ ଭାପୁର(ଡି.ଏନ୍.ଏ.) ୧।୪ ପ୍ରଚଣ୍ଡ ଗ୍ରୀଷ୍ମପ୍ରବାହର ସିଧାସଳଖ ପ୍ରଭାବ ଢେଙ୍କାନାଳର ବନ୍ୟଜୀବନ ଉପରେ ପଡ଼ିଲାଣି। ଜଙ୍ଗଲରେ ଖାଦ୍ୟ ଓ ପାଣି ଅଭାବ ହାତୀ ଭଳି ବିଶାଳକାୟ ତୃଣଭୋଜୀ ପ୍ରାଣୀଙ୍କୁ ଗଁା ମୁହଁା କରାଇଛି। କମ୍ ବୟସର ଛୁଆ ହାତୀ ଗୋଠରୁ ଅଲଗା ହେବା ଫଳରେ ସେମାନଙ୍କ ଜୀବନ ପ୍ରତି ବିପଦ ସୃଷ୍ଟି ହେଉଛି।
ସଦର ରେଞ୍ଜ୍ ଅନ୍ତର୍ଗତ ଭାପୁର ନୂଆସାହି ନିକଟବର୍ତ୍ତୀ ଅଞ୍ଚଳକୁ ବାଟବଣା ହୋଇ ଚାଲି ଆସିଥିବା ହାତୀ ଶାବକ ପାଇଁ ଗୁରୁବାର ବନ ବିଭାଗକୁ ନାକେଦମ ହେବାକୁ ପଡ଼ିଛି। ଉକ୍ତ ଛୁଆ ହାତୀ ମା’ଠାରୁ ଅଲଗା ହୋଇ ଦୁଇଦିନ ହେଲା ଗଁା ତଳି ଅଞ୍ଚଳରେ ଘୂରି ବୁଲୁଥିଲା। ସୂଚନା ପାଇ ବନ କର୍ମଚାରୀ ପହଞ୍ଚତ୍ ତା’କୁ ଜଙ୍ଗଲ ଆଡ଼କୁ ଘଉଡ଼ାଇବାକୁ ଉଦ୍ୟମ କରିଥିଲେ। ତେବେ ଲୋକଙ୍କ ଗହଳି ଏବଂ ହୋହଲ୍ଲା ପାଇଁ ହାତୀ ଶାବକ ଭୟଭୀତ ହୋଇପଡ଼ିଥିଲା। ତେଣୁ ସେ ଇତସ୍ତତଃ ହୋଇ ଏଣେତେଣେ ଦୌଡ଼ିବା ସହିତ ହାଲିଆ ହୋଇପଡ଼ିଥିଲା। ସନ୍ଧ୍ୟା ସୁଦ୍ଧା ଛୁଆ ହାତୀ ଗଁା ପାଖ ବୁଦୁବୁଦିଆ ଜଙ୍ଗଲ ନିକଟରେ ରହିଥିବା ବନ ବିଭାଗ ପକ୍ଷରୁ ସୂଚନା ମିଳିଛି। ତେବେ ଦିନତମାମ କିଛି ଖାଇ ନ ଥିବାରୁ ତା’ର ଜୀବନ ପ୍ରତି ବିପଦ ସୃଷ୍ଟି ହୋଇଛି।
ସେହିପରି ଗୁରୁବାର ସକାଳେ ବେଲବଣିଆ ସଂରକ୍ଷିତ ଜଙ୍ଗଲର ଅମାନ୍ତିପଡ଼ା ପଥର ଖଣି ନିକଟ ପୋଖରୀରୁ ଏକ ଅଣ୍ଡିରା ହାତୀ ଛୁଆର ମୃତଦେହ ଠାବ କରାଯାଇଛି। ସୂଚନା ପାଇ ଏସିଏଫ୍ ରଶ୍ମିରଞ୍ଜନ ସ୍ବାଇଁ, ରେଞ୍ଜର ବିଭୁଦାନନ୍ଦ ମିଶ୍ର, ବନପାଳ ଇନ୍ଦୁଭୂଷଣ ଭଞ୍ଜ, ବନରକ୍ଷୀ ସବିତା ବେହେରା ପ୍ରମୁଖ କପିଳାସ ଏବଂ କାଇମାଟିର ପ୍ରାଣୀ ଚିକିତ୍ସକଙ୍କ ସହ ଘଟଣାସ୍ଥଳରେ ପହଞ୍ଚତ୍ ତଦନ୍ତ କରିଛନ୍ତି। ଉକ୍ତ ହାତୀର ଆନୁମାନିକ ବୟସ ଦୁଇବର୍ଷ ହେବ। ସେ କିଛିଦିନ ହେଲା ଅସୁସ୍ଥ ଥିଲା ବୋଲି ବନ ବିଭାଗ ପକ୍ଷରୁ କୁହାଯାଇଛି। ଏ ସଂକ୍ରାନ୍ତରେ ଜିଲା ବନଖଣ୍ଡ ଅଧିକାରୀ ଡ. ପ୍ରକାଶଚାନ୍ଦ ଗୋଗିନେନି କୁହନ୍ତି, ହାତୀ ମୃତଦେହ ବ୍ୟବଚ୍ଛେଦ ପରେ ନମୁନା ସଂଗ୍ରହ କରି ଓୟୁଏଟି ଲାବୋରେଟୋରିକୁ ପଠାଯାଇଛି। ସେଠାରୁ ରିପୋର୍ଟ ଆସିଲେ ହାତୀମୃତ୍ୟୁର କାରଣ ସ୍ପଷ୍ଟ ହେବ।
