ଅମରପାଲି, ୧୦।୬ (ପୀତାମ୍ବର ସାହୁ): ସୁବର୍ଣ୍ଣପୁର ଜିଲା ବୀରମହାରାଜପୁର ବ୍ଲକ ଅନ୍ତର୍ଗତ ବହଳପଦର ଗ୍ରାମରେ ସରକାରୀ ଜମିରୁ ବେଆଇନ ଜବରଦଖଲ ଉଚ୍ଛେଦ କରାଯାଇଛି। ଉଚ୍ଛେଦ ପରେ ଜମିକୁ ପ୍ରାଥମିକ କୃଷି ସେବା ସମବାୟ ସମିତି (ପାକ୍ସ) ନାମରେ ହସ୍ତାନ୍ତର କରାଯାଇଥିବାବେଳେ, ଏଠାରେ ନୂତନ କାର୍ଯ୍ୟାଳୟ ନିର୍ମାଣ ପାଇଁ ପଥ ପ୍ରଶସ୍ତ ହୋଇଛି।
ସୂଚନା ଅନୁସାରେ, ବହଳପଦର ପ୍ରାଥମିକ କୃଷି ସେବା ସମବାୟ ସମିତିର ନିଜସ୍ବ ଜମି ନଥିବାରୁ ଦୀର୍ଘଦିନ ଧରି ଏକ ଘରୋଇ ଘରେ କାର୍ଯ୍ୟାଳୟ ଚାଲିଆସୁଥିଲା। ଫଳରେ ଖରିଫ ଓ ରବି ଋତୁରେ ଧାନ କ୍ରୟ ସମୟରେ ବିଭିନ୍ନ ପ୍ରକାର ଅସୁବିଧା ଦେଖାଦେଉଥିଲା। ନୂତନ କାର୍ଯ୍ୟାଳୟ ନିର୍ମାଣ ପାଇଁ ବିଭାଗ ପକ୍ଷରୁ ଅର୍ଥ ମଞ୍ଜୁର ହୋଇଥିଲେ ମଧ୍ୟ ଉପଯୁକ୍ତ ଜମି ଅଭାବରୁ କାମ ଆଗକୁ ବଢ଼ିପାରୁ ନଥିଲା। ଏହାକୁ ନେଇ ଗ୍ରାମବାସୀ ବହଳପଦର-ଅମରପାଲି ମଧ୍ୟବର୍ତ୍ତୀ ଏକ ସରକାରୀ ଜମିରେ କାର୍ଯ୍ୟାଳୟ ନିର୍ମାଣ ପାଇଁ ଦାବି କରିଥିଲେ। ତେବେ ସେହି ଜମିକୁ କେତେକ ବ୍ୟକ୍ତି ବେଆଇନ ଭାବେ ଦଖଲ କରି ରଖିଥିବାରୁ ପ୍ରକଳ୍ପ କାର୍ଯ୍ୟକାରୀ ହୋଇପାରୁ ନଥିଲା। ପ୍ରଶାସନ ପକ୍ଷରୁ ବାରମ୍ବାର ନୋଟିସ ଓ ନିର୍ଦ୍ଦେଶ ସତ୍ତ୍ୱେ ଦଖଲକାରୀମାନେ ଜମି ଖାଲି କରିନଥିଲେ। ମଙ୍ଗଳବାର ବୀରମହାରାଜପୁର ତହସିଲ ପ୍ରଶାସନ ପକ୍ଷରୁ ଉଚ୍ଛେଦ ଅଭିଯାନ ଚଳାଯାଇଥିଲା। ପ୍ରଥମେ କିଛି ଦଖଲକାରୀ ବିରୋଧ କରିଥିଲେ ମଧ୍ୟ ତହସିଲଦାର ସୁଚିସ୍ମିତା ପାଣିଗ୍ରାହୀଙ୍କ ବୁଝାସୁଝା ପରେ ପରିସ୍ଥିତି ସ୍ବାଭାବିକ ହୋଇଥିଲା। ପରେ ଜେସିବି ସହାୟତାରେ ସେଠାରେ ନିର୍ମିିତ ଅସ୍ଥାୟୀ ଘର ଭଙ୍ଗାଯାଇଥିଲା ଏବଂ ଜମିକୁ ତାରବାଡ଼ ଦେଇ ସୁରକ୍ଷିତ କରାଯାଇଥିଲା। ଉଚ୍ଛେଦ କାର୍ଯ୍ୟରେ ତହସିଲଦାର ସୁଚିସ୍ମିତା ପାଣିଗ୍ରାହୀଙ୍କ ସମେତ ଅତିରିକ୍ତ ତହସିଲଦାର ସ୍ବାଗତ କୁମାର ପଣ୍ଡା, ଏସିଏଫ ତଥା ଅତିରିକ୍ତ ରେଞ୍ଜ ଦାୟିତ୍ୱରେ ଥିବା ରେଞ୍ଜ ଅଧିକାରୀ ଅବିନାଶ ବରିହା, ରାଜସ୍ବ ନିରୀକ୍ଷକ ନରେନ୍ଦ୍ର ଧରୁଆ, ଏଆରଆଇ ମୋହିତ କୁମାର ମିଶ୍ର, ଏଆରସିଏସ ନାରାୟଣ ସେଠୀ ଏବଂ ସମବାୟ ସମିତିର ସମ୍ପାଦକ ପ୍ରଫୁଲ୍ଲ ଦନ୍ତା ପ୍ରମୁଖ ଉପସ୍ଥିତ ଥିଲେ। ଉଚ୍ଛେଦ ସମୟରେ କୌଣସି ଅପ୍ରୀତିକର ପରିସ୍ଥିତି ଏଡ଼ାଇବା ପାଇଁ ଠେଙ୍ଗୋ ଡ୍ୟାମ ଫାଣ୍ଡି ଅଧିକାରୀ ଜେଡି ପ୍ରଧାନଙ୍କ ନେତୃତ୍ୱରେ ଏକ ପ୍ଲାଟୁନ ପୋଲିସ ମୁତୟନ କରାଯାଇଥିଲା।