ନୂଆଦିଲ୍ଲୀ,୨୯।୩: ଭାରତରେ ନିଯୁକ୍ତି ସ୍ଥିତି ଅତ୍ୟନ୍ତ ଉତ୍କଟ ବୋଲି ଅନ୍ତର୍ଜାତୀୟ ଶ୍ରମ ସଂଗଠନ (ଆଇଏଲ୍ଓ) ଏବଂ ଇନ୍ଷ୍ଟିଚ୍ୟୁଟ୍ ଅଫ୍ ହ୍ୟୁମାନ୍ ଡେଭେଲପ୍ମେଣ୍ଟ (ଆଇଏଚ୍ଡି)ର ଏକ ରିପୋର୍ଟରୁ ଜଣାପଡ଼ିଛି। ଉକ୍ତ ସଂଗଠନର ଇଣ୍ଡିଆ ଅନ୍ଏମ୍ପ୍ଲଏମେଣ୍ଟ ରିପୋର୍ଟ, ୨୦୨୪ ଅନୁଯାୟୀ ଦେଶର ବେରୋଜଗାରି ଶ୍ରମଶକ୍ତିର ୮୩ ପ୍ରତିଶତ ହେଉଛନ୍ତି ଯୁବବର୍ଗ। ମୋଟ ବେରୋଜଗାରି ଯୁବଗୋଷ୍ଠୀଙ୍କ ମଧ୍ୟରୁ ମାଧ୍ୟମିକ ଏବଂ ଉଚ୍ଚଶିକ୍ଷା ଗ୍ରହଣ କରିଥିବା ପିଲାମାନଙ୍କ ହାର ୨୦୨୨ରେ ୬୫.୭ ପ୍ରତିଶତକୁ ବୃଦ୍ଧି ପାଇଛି, ଯାହାକି ୨୦୦୦ରେ ୩୫.୨ ପ୍ରତିଶତ ରହିଥିଲା।
୨୦୦୦ରୁ ୨୦୧୯ ମଧ୍ୟରେ ଯୁବ ନିଯୁକ୍ତି ଏବଂ ସାମୟିକ ନିଯୁକ୍ତି ବଢ଼ିଥିବାବେଳେ ମହାମାରି ସମୟରେ ଏହା ହ୍ରାସ ପାଇଥିଲା ବୋଲି ମୁଖ୍ୟ ଅର୍ଥନୈତିକ ଉପଦେଷ୍ଟା ଭି. ଅନନ୍ତ ନାଗେଶ୍ୱରନ୍ଙ୍କ ଦ୍ୱାରା ପ୍ରକାଶ ପାଇଥିବା ଅଧ୍ୟୟନ ରିପୋର୍ଟରୁ ଜଣାପଡ଼ିଛି। ଏହି ସମୟରେ ଶିକ୍ଷିତ ଯୁବବର୍ଗଙ୍କ ମଧ୍ୟରେ ବେରୋଜଗାରି ସ୍ତର ସର୍ବୋଚ୍ଚ ସ୍ତରରେ ପହଞ୍ଚତ୍ଥିଲା। ସହରାଞ୍ଚଳରେ ଅଧିକ ସଂଖ୍ୟାରେ ଶିକ୍ଷିତ ବେରୋଜଗାର ଥିବା ରିପୋର୍ଟରେ କୁହାଯାଇଛି।
ଅନ୍ୟପକ୍ଷରେ ଆଇଏଲ୍ଓର ରିପୋର୍ଟକୁ ଭାରତ ବିବାଦୀୟ ତଥ୍ୟ କହି ବିରୋଧ କରିଛି। ନିଯୁକ୍ତି ସମ୍ପର୍କରେ ଭାରତୀୟ ସଂସ୍ଥାଗୁଡ଼ିକ ଭିନ୍ନ ତଥ୍ୟ ପ୍ରଦାନ କରିଥିବା ଯୁବବ୍ୟାପାର ମନ୍ତ୍ରୀ ଅନୁରାଗ ଠାକୁର କହିଛନ୍ତି। କର୍ମଚାରୀ ଭବିଷ୍ୟ ନିଧି ସଂଗଠନ (ଇପିଏଫ୍ଓ)ରେ ୬.୪ କୋଟି ଲୋକ ପଞ୍ଜୀକୃତ ହୋଇଛନ୍ତି, ଏହା ଅଷ୍ଟ୍ରେଲିଆ, ନ୍ୟୁଜିଲାଣ୍ଡ ଓ ଅନ୍ୟ ଅନେକ ଦେଶର ଲୋକସଂଖ୍ୟାଠାରୁ ଅଧିକ ବୋଲି ଏକ ଗଣମାଧ୍ୟମର ଯୁବ ସମ୍ମିଳନୀରେ ଯୋଗଦେଇ ଠାକୁର କହିଛନ୍ତି। ସେ ଆହୁରି କହିଛନ୍ତି, ନିଯୁକ୍ତି ସୁଯୋଗ ସୃଷ୍ଟି ପାଇଁ ୩୪ କୋଟି ମୁଦ୍ରା ଋଣ ଯୋଗାଇ ଦିଆଯାଇଛି। ଏବେ ସେମାନେ ବେରୋଜଗାରିଙ୍କୁ ନିଯୁକ୍ତି ଯୋଗାଉଛନ୍ତି।
ବହୁବର୍ଷ ଧରି ଭାରତ ଅନ୍ତର୍ଜାତୀୟ ରେଟିଂ ସଂସ୍ଥାଗୁଡ଼ିକୁ ଭରସା କରିଆସୁଛି। ସେମାନେ ଘରୋଇ ତଥ୍ୟ ଆଧାରରେ ରିପୋର୍ଟ ପ୍ରସ୍ତୁତ କରିବା ଆବଶ୍ୟକ। ଆମର ଦାସତ୍ୱ ମାନସିକତା ପାଇଁ ଆମେ ସବୁବେଳେ ବିଦେଶୀ ରେଟିଂ ଉପରେ ନିର୍ଭର କରୁଛୁ। ଏବେ ଏହାକୁ ଛାଡ଼ି ଆମ ଦେଶର ସଂଗଠନଗୁଡ଼ିକ ଉପରେ ବିଶ୍ୱାସ କରିବାକୁ ହେବ ବୋଲି ଠାକୁର କହିଛନ୍ତି।
