ନାଉଗାଁ,୩୦ା୪(ସ୍ବ.ପ୍ର.): ନାଉଗାଁ ପଞ୍ଚାୟତ ସମିତି ୩ୟ ଅଧିବେଶନ ଶୁକ୍ରବାର ଅନୁଷ୍ଠିତ ହୋଇଯାଇଛି। ସମିତି ସମ୍ବିଳନୀ କକ୍ଷରେ ଆୟୋଜିତ ଏହି ବୈଠକରେ ବିଧାୟକ ପ୍ରଶାନ୍ତ ମୁଦୁଲି ଯୋଗଦେଇ କହିଥିଲେ,ସମସ୍ତ ଜନପ୍ରତିନିଧି ହେଉଛନ୍ତି ନାଉଗାଁ ପଞ୍ଚାୟତ ସମିତିର ପରିବାର ବୋଲି କହିଥିଲେ। ବୈଠକରେ ଘୋଡାଂଶ ପଞ୍ଚାୟତ ସଭ୍ୟ ତରୁଣକାନ୍ତ ବାରିକ, ଜାମୁଗାଁ ସରପଞ୍ଚ ଶୁଭ୍ରସ୍ମୃତି ପରିଡା, ଗଳଦାରୀ ସରପଞ୍ଚ ଦିଲୀପ ନାୟକ, ଡାବର ସଭ୍ୟ ସୁବଳ ବେହେରା ପ୍ରମୁଖ ଯୋଗଦେଇ ପାନୀୟ ଜଳ ସମସ୍ୟା ଉପରେ ଆଲୋକପାତ କରିଥିଲେ। ବିଭିନ୍ନ ପଞ୍ଚାୟତରେ ପାନୀୟ ଜଳ ପାଇଁ କାର୍ଯ୍ୟ କରୁଥିବା କର୍ମଚାରୀମାନଙ୍କୁ ନେଇ ଏକ ସ୍ବତନ୍ତ୍ର ବୈଠକ ଡାକିବାକୁ ବିଡିଓ ରଶ୍ମିରେଖା ମଲ୍ଲିକଙ୍କୁ ବିଧାୟକ ପରାମର୍ଶ ଦେଇଥିଲେ।
ସେହିପରି ସମନ୍ବିତ ଶିଶୁ ବିକାଶ ମଧ୍ୟରେ ପ୍ରଦାନ କରାଯାଉଥିବା ଖାଦ୍ୟର ମାନପରୀକ୍ଷା, ନାଉଗାଁ ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ରରେ ଡାକ୍ତର ନିଯୁକ୍ତି, ବିଭିନ୍ନ ବିଦ୍ୟାଳୟରେ ଶିକ୍ଷକଙ୍କ ଅଭାବ ପୂରଣ, ବିଦ୍ୟାଳୟର ଭିତ୍ତି ଭୂମି ସଜାଡିବା ସହ ଆବଶ୍ୟକୀୟ ସରଞ୍ଜାମ ଯୋଗାଇ ଦେବାକୁ ସରପଞ୍ଚ ପ୍ରାଚୀ ସାଗରିକା ଜେନା ବିଧାୟକଙ୍କ ଦୃଷ୍ଟି ଆକର୍ଷଣ କରିଥିଲେ। ନାଉଗଁା ବ୍ଲକର ନାମକୁ ବିଭିନ୍ନ ସରକାରୀ ପୋର୍ଟାଲ, ମ୍ୟାପ ଓ ନକ୍ସା ଆଦିରେ ନୂଆଗାଁ ଲେଖା ହୋଇଛି। ଏହାକୁ ସଂଶୋଧନ କରିବା ପାଇଁ ଅଧ୍ୟକ୍ଷା ତୃଷ୍ନା ଲେଙ୍କାଙ୍କ ଦୃଷ୍ଟି ଆକର୍ଷଣ କରାଯାଇଥିଲା। ନାଉଗାଁ ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ରରେ କିଛି କର୍ମଚାରୀ ରାତିରେ ସ୍ବାସ୍ଥ୍ୟକେନ୍ଦ୍ର ପରିସରରେ ନିଶା ସେବନ କରି ରୋଗୀଙ୍କୁ ଦୁର୍ବ୍ୟବହାର କରୁଥିବା ନେଇ ଘୋଡାଂଶ ପଞ୍ଚାୟତ ସରପଞ୍ଚ ନିହାର ରଞ୍ଜନ ବସ୍ତିଆ ଓ ସଭ୍ୟ ତରୁଣକାନ୍ତ ବାରିକ କହିଥିଲେ। ସମ୍ପୃକ୍ତ କର୍ମଚାରୀଙ୍କ ନାମରେ ଥାନାରେ ଲିଖିତ ଅଭିଯୋଗ କରିବାକୁ ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ର ଅଧିକାରୀଙ୍କୁ ବିଧାୟକ ନିର୍ଦ୍ଦେଶ ଦେଇଥିଲେ। ବର୍ଷା ଦିନେ ଚାଷ ଜମିରୁ ଜଳ ନିଷ୍କାସନ ପାଇଁ ଜାମୁଗଁା ଓ ଘୋଡାଂଶ ପଞ୍ଚାୟତର ଘୋଡେଶ୍ୱର ଠାରେ ଏକ କଲଭର୍ଟ ନିର୍ମାଣ କରିବାକୁ ସ୍ଥାନୀୟ ପଞ୍ଚାୟତ ସଭ୍ୟ ତରୁଣ କାନ୍ତ ବାରିକ ଦାବି କରିଥିଲେ। ସେହିପରି ନନ୍ଦିଗ୍ରାମରୁ ଡାବରକୁ ଏକ ରାସ୍ତା ନିର୍ମାଣ କରିବା ସହ ଦେଓପଡା -ଡାବରକୁ ଡ୍ରେନେଜ ବ୍ୟବସ୍ଥା କରିବା ପାଇଁ ସୁବଳ ବେହେରା ଦାବି କରିଥିଲେ। ଏହି ଅବସରରେ ସମିତି ସଭ୍ୟା ସୁଶ୍ରୀ ଶ୍ରାବଣୀ ରାୟ ନାଉଗାଁରୁ ଅଲଣା ପଞ୍ଚାୟତ ମଧ୍ୟରେ ଥିବା ଜୋରକୁ ସଫେଇ କରିବା କରିବାକୁ ଦାବି କରିଥିଲେ। ଏଥିସହ ଗତ ବର୍ଷାରେ କ୍ଷତିଗ୍ରସ୍ତ ହୋଇଥିବା ଚାଷୀଙ୍କୁ ବୀମା କେବେ ମିଳିବ ବୋଲି ପ୍ରଶ୍ନ କରିଥିଲେ। ବିଭିନ୍ନ ପଞ୍ଚାୟତରେ ଥିବା ସମସ୍ୟା ସମ୍ପର୍କରେ ଜନପ୍ରତିନିଧିଙ୍କ ସହ ଆଲୋଚନା କରି ଯଥାଶୀଘ୍ର ପଦକ୍ଷେପ ନେବାକୁ ବିଧାୟକ ମୁଦୁଲି ପ୍ରଶାସନିକ ଅଧିକାରୀମାନଙ୍କୁ ପରାମର୍ଶ ଦେଇଥିଲେ। ଅଧ୍ୟକ୍ଷା ଲେଙ୍କାଙ୍କ ପୌରୋହିତ୍ୟ ଆୟୋଜିତ ବୈଠକରେ ଉପାଧ୍ୟକ୍ଷ ସୁଜିତ ପୁହାଣ,ଜିଲା ପରିଷଦ ସଭ୍ୟା ଅମିତା ସ୍ବାଇଁ, ଏମ୍ପିଙ୍କ ପ୍ରତିନିଧି ଅଜୟ ମହାନ୍ତି, ଏବିଡିଓ ଦେବେନ୍ଦ୍ର ପ୍ରଧାନ, ଜିପିଓ ଦିନେଶ ରାୟଙ୍କ ସମେତ ଅନ୍ୟାନ୍ୟ ଅଧିକାରୀମାନେ ଉପସ୍ଥିତ ଥିଲେ।
