ଟୋକିଓ, ୯ା୭ (ଏପି)- ଟୋକିଓ ଅଲିମ୍ପିକ୍ସରେ ଦର୍ଶକଙ୍କୁ ସମ୍ପୂର୍ଣ୍ଣ ନିଷିଦ୍ଧ କରାଯାଇଛି। ଗୁରୁବାର ଜରୁରିକାଳୀନ ପରିସ୍ଥିତି ଜାରି ପରେ ଅଲିମ୍ପିକ ମନ୍ତ୍ରୀ ତାମାୟୋ ମାରୁକାଓ୍ବା ଏକ ଜାପାନିଜ ନ୍ୟୁଜ ଏଜେନ୍ସିକୁ ଏହା କହିଛନ୍ତି। ଅନ୍ତର୍ଜାତୀୟ ଅଲିମ୍ପିକ କମିଟି ଓ ଜାପାନର ଆୟୋଜକଗଣ ତରଫରୁ ମିଳିତ ଭାବେ ନିଷ୍ପତ୍ତି ନିଆଯାଇଛି। ଫଳରେ ଏଥର ଗେମ୍ସ ଏକ ଟିଭି ଇଭେଣ୍ଟରେ ପରିଣତ ହୋଇଛି। କିଛିମାସ ପୂର୍ବରୁ ବିଦେଶୀ ଦର୍ଶକଙ୍କ ଉପରେ କଟକଣା ଜାରି ହୋଇସାରିଛି। ଜାପାନ ପ୍ରଧାନମନ୍ତ୍ରୀ ୟୋଶିଦେ ସୁଗା ସ୍ପଷ୍ଟ କରିଛନ୍ତି ଯେ ଇନ୍ଡୋର ହେଉ ଅବା ଆଉଟ୍ଡୋର୍ ବିନା ଦର୍ଶକରେ ପ୍ରତିଯୋଗିତା ହେବ। ଅନ୍ତର୍ଜାତୀୟ ଅଲିମ୍ପିକ କମିଟି (ଆଇଓସି) ସଭାପତି ଥୋମାସ ବ୍ୟାକ୍ ଗୁରୁବାର ଟୋକିଓରେ ପହଞ୍ଚତ୍ବା ପୂର୍ବରୁ ରାଜଧାନୀରେ କରୋନା ସଂକ୍ରମଣ ବୃଦ୍ଧି ପାଉଥିବାରୁ ଜାପାନ ପ୍ରଧାନମନ୍ତ୍ରୀ ସୁଗା ଜରୁରିକାଳୀନ ପରିସ୍ଥିତି ଜାରି କରିଛନ୍ତି। ଏହା ଆସନ୍ତା ସୋମବାରଠାରୁ ଲାଗୁ ହେବ ଏବଂ ଅଗଷ୍ଟ ୨୨ ତାରିଖ ପର୍ଯ୍ୟନ୍ତ ବଳବତ୍ତର ରହିବ। ଅଲିମ୍ପିକ୍ସ ଜୁଲାଇ ୨୩ରୁ ଅଗଷ୍ଟ ୮ ପର୍ଯ୍ୟନ୍ତ ହେବାକୁଥିବାରୁ ଯାହା ଜଣାପଡ଼ୁଛି ଟୋକିଓ ଗେମ୍ସ ଜରୁରିକାଳୀନ ପରିସ୍ଥିତି ମଧ୍ୟରେ ହିଁ ଆୟୋଜିତ ହେବ। ପାରାଲିମ୍ପିକ୍ସ କିନ୍ତୁ ଅଗଷ୍ଟ ୨୪ରୁ ହେବାର କାର୍ଯ୍ୟକ୍ରମ ରହିଛି। ଦେଶକୁ ଡେଲ୍ଟା ଷ୍ଟ୍ରେନ୍ ସଂକ୍ରମଣରୁ ବଞ୍ଚାଇବା ଲାଗି ସତର୍କତାମୂଳକ ପଦକ୍ଷେପ ସ୍ବରୂପ ଜରୁରିକାଳୀନ ପରିସ୍ଥିତି ଜାରି କରିବାକୁ ପଡ଼ିଛି ବୋଲି ସୁଗା କହିଛନ୍ତି। ବ୍ୟାକ୍ ଗୁରୁବାର ଅପରାହ୍ନରେ ଟୋକିଓର ହାନେଦା ବିମାନବନ୍ଦରରେ ଅବତରଣ କରିଥିଲେ। ଯଥାସମ୍ଭବ କ୍ୟାମେରାକୁ ଏଡାଇଯାଇଥିଲେ। ବିମାନ ବନ୍ଦରରୁ ସହରର କେନ୍ଦ୍ର ସ୍ଥଳରେ ରହିଥିବା ଏକ ୫ ତାରକା ହେଟେଲକୁ ଯାଇଥିଲେ, ଯେଉଁଠାରେ କି ଅଲିମ୍ପିକ କମିଟି ଗେମ୍ସ ମୁଖ୍ୟାଳୟ ରହିଛି। ସେଠାରେ ସେ ୩ ଦିନ ଆଇସୋଲେଶନରେ ରହିବେ। ମହାମାରୀ ସମୟରେ ଗେମ୍ସ ଆୟୋଜନକୁ ଜାପାନ ବାସିନ୍ଦା ଓ ଦେଶର ମେଡିକାଲ କମ୍ୟୁନିଟିର ଦୃଢ଼ ବିରୋଧ ସତ୍ତ୍ୱେ ଆଇଓସି ଓ ସ୍ଥାନୀୟ ଆୟୋଜକଗଣ ଗେମ୍ସ ଆୟୋଜନ ନେଇ ବଦ୍ଧପରିକର। ଜରୁରିକାଳୀନ ପରିସ୍ଥିତି ଜାରିହେବା ଦ୍ୱାରା ବାର୍, ରେସ୍ତୋରଁା ଓ କାରାଓକ୍ ପାର୍ଲରଗୁଡ଼ିକୁ ବନ୍ଦ ରଖିବା ଲାଗି ଅନୁରୋଧ କରାଯିବ। ଫଳରେ ଲୋକେ ପାର୍ଟି ଅବା ମଦ୍ୟ ପରିବେଷଣ ସହ ଅଲିମ୍ପିକ ସମ୍ପର୍କିତ ଖୁସି ଉତ୍ସବ ପାଳିପାରିବେ ନାହିଁ। ଟୋକିଓ ବାସିନ୍ଦାଙ୍କୁ ଘରେ ରହି ଟିଭି ଜରିଆରେ ଗେମ୍ସ ଦେଖିବା ଲାଗି ଅନୁରୋଧ କରାଯିବ। ଅଲିମ୍ପିକ୍ସ ସମୟରେ ଡ୍ରିଙ୍କ୍ସ ପାର୍ଟିରୁ ଲୋକମାନଙ୍କୁ ରୋକାଯିବ ବୋଲି ସ୍ବାସ୍ଥ୍ୟ ମନ୍ତ୍ରୀ ନୋରିଶା ତାମୁରା କହିଛନ୍ତି। ବର୍ତ୍ତମାନ ଚାଲିଥିବା ଜରୁରିକାଳୀନ ପରିସ୍ଥିତିର ଅବଧି ରବିବାର ଶେଷ ହେଉଛି। ଗୁରୁବାର ଟୋକିଓରେ ୮୯୬ ନୂଆ କୋଭିଡ୍ ପଜିଟିଭ ଚିହ୍ନଟ ହୋଇଛନ୍ତି। ଗତ ସପ୍ତାହରେ ଏହି ସଂଖ୍ୟା ୬୭୩ ରହିଥିଲା।
