ୱାଶିଂଟନ,୮ ।୧୨: ବିଶ୍ୱର ସବୁଠାରୁ ଧନୀ ବ୍ୟକ୍ତି ତାଲିକାର ଏକ ନମ୍ବରରେ ଥିବା ଏଲନ ମସ୍କ ଏବେ ଏହାକୁ ହରାଇ ପାରନ୍ତି ବୋଲି କୁହାଯାଉଛି । ଫୋର୍ବସ ଦ୍ୱାରା ଧନୀ ବ୍ୟକ୍ତିଙ୍କ ତାଲିକା ଅନୁସାରେ, ସୋସିଆଲ ମିଡିଆ ପ୍ଲାଟଫର୍ମ ଟୁଇଟରର ନୂଆ ମୁଖ୍ୟ ଏଲନ ମସ୍କ ବୁଧବାର ବିଶ୍ୱର ସବୁଠାରୁ ଧନୀ ବ୍ୟକ୍ତି ହେବାର ଗୌରବ ହରାଇବାକୁ ଯାଉଥିବା କୁହାଯାଉଛି । ଫୋର୍ବସର ରିୟଲ ଟାଇମ ବିଲେନିୟର୍ସର ଲିଷ୍ଟରେ ଟେଲସାର ସିଇଓ ଏଲନ ମସ୍କ କିଛି ସମୟ ପାଇଁ ଏହି ତାଲିକାରେ ତଳକୁ ଖସି ଦ୍ୱିତୀୟ ସ୍ଥାନରେ ରହିଥିଲେ । ଏଲନ ମସ୍କଙ୍କୁ ଫ୍ରାନ୍ସର ୭୩ ବର୍ଷୀୟ ଅରବପତି ବର୍ନାର୍ଡ ଅରନଲ୍ଟ କଡା ଟକ୍କର ଦେଇଛନ୍ତି । ଏହାସହ ଲକ୍ଜରି ବ୍ରାଣ୍ଡ ଲୁଇସ ବୁଇଟନର ମୂଳ କମ୍ପାନୀ ଏଲଭିଏମଏଚର ମାଲିକ ବର୍ନାର୍ଡ ଅରନଲ୍ଟ ବିଶ୍ୱର ସବୁଠାରୁ ଧନୀ ଅବପତି ତାଲିକାରେ ଆଗକୁ ଚାଲିଯାଇଛନ୍ତି ।
ଫୋର୍ବସର ରିୟଲ ଟାଇମ ଇଣ୍ଡେକ୍ସ ଅନୁଯାୟୀ, ବୁଧବାର କିଛି ସମୟ ପାଇଁ ଏଲନ ମସ୍କ ଫୋର୍ବସର ‘ରିୟଲ-ଟାଇମ ବିଲେନିୟର୍ସ’ ତାଲିକାର ଦ୍ୱିତୀୟ ସ୍ଥାନକୁ ଚାଲି ଆସିଥିଲେ । ଟୁଇଟର ଓ ଟେଲସାର ସିଇଓଙ୍କୁ ଅରନଲ୍ଟ ପଛରେ ପକାଇଦେଇଥିଲେ । ଫୋର୍ବସ ଏବେ ମସ୍କଙ୍କ ସମ୍ପତ୍ତି ୧୮୪.୯ ଅରବ ଡଲାର ବୋଲି ଦର୍ଶାଇଛି ଓ ଅରନଲ୍ଟଙ୍କ ସମ୍ପତ୍ତି ୧୮୪.୭ ଅରବ ଡଲାର ବୋଲି ଦର୍ଶାଇଛି । ଏହି ଅଙ୍କକୁ ଦେଖିଲେ ଉଭୟ ଅରବ ପତିଙ୍କ ନେଟୱର୍ଥରେ ସାମାନ୍ୟ ଫରକ ରହିଛି ।
