ପଟ୍ଟାଙ୍ଗି,୧୯ା୬(ଶରତ ଧଳ): କେନ୍ଦ୍ର ଓ ରାଜ୍ୟ ସରକାରଙ୍କ ପକ୍ଷରୁ କାର୍ଯ୍ୟକାରୀ ହୋଇଥିବା ଆବାସ ଏବଂ ବିଜୁ ପକ୍କା ଘର ଯୋଜନା ଗ୍ରାମାଞ୍ଚଳ ଲୋକଙ୍କ ପାଇଁ ଏବେ ମଧ୍ୟ ଅପହଞ୍ଚ ହୋଇରହିଛି। ଅନେକ ଯୋଗ୍ୟ ହିତାଧିକାରୀ ଏହି ଯୋଜନାରୁ ବଞ୍ଚତ୍ତ ହୋଇ ରହିଛନ୍ତି। କୋରାପୁଟ ଜିଲା ପଟ୍ଟାଙ୍ଗି ବ୍ଲକ ଅଧୀନ ଗାଙ୍ଗରଜପୁର ପଞ୍ଚାୟତର ୬ନଂ ୱାର୍ଡର ନିଲାମପାଡୁ ଗ୍ରାମରେ ଏପରି ଦେଖିବାକୁ ମିଳିଛି।
ଏହି ଗ୍ରାମରେ ଦୁଇପୁଅ ବାଲିଆ ନାୟକ ଜଗୁ ଏବଂ ବାଲିଆ ନାୟକ କୁନାଙ୍କୁ ଧରି ବସବାସ କରୁଛନ୍ତି ବାଲିଆ ନାୟକ ଫୁଲମତୀ। ସ୍ବାମୀଙ୍କ ମୃତ୍ୟୁ ପରେ ଫୁଲମତୀ ଅନେକ କଷ୍ଟରେ ପିଲା ଦୁହିଁଙ୍କୁ ବଡ କରିଛନ୍ତି। ଫୁଲମତୀଙ୍କ କାନକୁ ଠିକ ରୂପେ ଶୁଭୁନାହିଁ। ନିଜସ୍ବ ଜମି ବୋଲି ତାଙ୍କର କିଛି ନାହିଁ । ଯେଉଁ ଜାଗା ଉପରେ ସେ ଘରକରି ରହୁଥିଲେ ତାହା ତିନି ବର୍ଷ ତଳେ ହୋଇଥିବା ବାତ୍ୟାରେ ଭାଙ୍ଗିଯାଇଛି। ଘର ତିଆରି କରିବାକୁ ପାଖରେ ଅର୍ଥନାହିଁ । ଦିନରେ ଜରିଢାଙ୍କି ନିଜ ଜାଗା ଉପରେ ରହୁଥିବା ଫୁଲମତୀ ରାତିରେ ଗ୍ରାମର ଜଣେ ସହୃଦୟ ବ୍ୟକ୍ତି ବଇ ଦାମଙ୍କ ଘରେ ପିଲାଙ୍କୁ ଧରି ଆଶ୍ରୟ ନେଉଛନ୍ତି। ଗ୍ରାମ ଲୋକଙ୍କ ଚାଷଜମିରେ କୁଲି କାମ କରି ସେଥିରୁ ଯାହା ପାରିଶ୍ରମିକ ପାଉଛନ୍ତି ସେଥିରେ ଚଳୁଛନ୍ତି। ମିଳୁଥିବା ରାଶନ ଚାଉଳ ଏବଂ ବିଧବା ଭତ୍ତା ଫୁଲମତୀଙ୍କ କିଛି ଅଭାବକୁ ତୁଲାଇ ଦେଉଛି। ସାନପୁଅ କୁନା ପଡୋଶୀ ଆନ୍ଧ୍ର ରାଜ୍ୟରେ ଦାଦନ ଶ୍ରମିକ ଭାବେ କାମ କରୁଥିବା ବେଳେ ବଡ଼ପୁଅ ଜଗୁ ମା’ ଫୁଲମତୀଙ୍କ ପାଖରେ ରହି ଗ୍ରାମରେ ଦିନ ମଜୁରିଆ ସାଜିଛନ୍ତି। କେନ୍ଦ୍ର ଓ ରାଜ୍ୟ ସରକାରଙ୍କ ରହିଥିବା ଆବାସ ଅବା ବିଜୁ ପକ୍କା ଘର ଯୋଜନାରେ ଘର ଖଣ୍ଡିଏ ପାଇବା ଲାଗି ଫୁଲମତୀ ପଞ୍ଚାୟତ କାର୍ଯ୍ୟାଳୟରେ ବାରମ୍ବାର ଆବେଦନ କରି ଏଯାଏ କିଛି ସୁଫଳ ମିଳିନାହିଁ ତାଙ୍କୁ। ଗ୍ରାମବାସୀଙ୍କ ଚାପରେ କେବଳ ନିଜ ଦାୟିତ୍ୱ ଖସାଇବାକୁ ପଞ୍ଚାୟତର ଗ୍ରାମ ରୋଜଗାର ସେବକ (ଜିଆରଏସ୍) ଫୁଲମତୀ ରହୁଥିବା ସ୍ଥାନରେ ପହଞ୍ଚତ୍ ପଚରାଉଚରା କରି ଫଟୋ ଉଠାଇ ଚାଲିଯାଇଛନ୍ତି। ଏଯାଏ ଆଉ ଆବାସ ପାଇଁ ତାଙ୍କ ପାଖକୁ କିଛି ଖବର ଆସିନାହିଁ। ଆମ ପାଇଁ ସରକାରୀ ଘର ସାତସପନ ପାଲଟିଛିି ବୋଲି କହନ୍ତି ଫୁଲମତୀ। ପୁଅମାନଙ୍କ ବିବାହ ବୟସ ହୋଇଯାଇଥିଲେ ମଧ୍ୟ ଘର ଖଣ୍ଡିଏ ନ ଥିବାରୁ କେହି ଝିଅ ଦେବାକୁ ରାଜି ହେଉନାହାନ୍ତି ବୋଲି ଦୁଃଖର ସହ କହନ୍ତି ସେ। ପରିଣତ ବୟସରେ ଟିକେ ବିଶ୍ରାମ ଲୋଡୁଥିବା ଫୁଲମତୀଙ୍କ ପରିବାର ଉପରେ କେବେ ପ୍ରଶାସନର ଶୁଭଦୃଷ୍ଟି ପଡିବ ତାହା ସମୟ କହିବ। ଏ ସମ୍ପର୍କରେ ପିଇଓ କମଳ ପରଜାଙ୍କୁ ପଚାରିବାରୁ ସେ କହିଲେ, ଫୁଲମତୀଙ୍କ ସମସ୍ୟା ସମ୍ପର୍କରେ ଅବଗତ ଅଛି। ଏହା କିପରି ସମାଧାନ ହୋଇପାରିବ ସେଥିପ୍ରତି ମୁଁ ଗୁରୁତ୍ୱ ଦେବି। ନିଜେ ନିଲାମପାଡୁ ଗ୍ରାମ ଗସ୍ତ କରି ଅନୁଧ୍ୟାନ କରିବି ବୋଲି ସେ ପ୍ରକାଶ କରିଥିଲେ।
