ଆଳି,୧୮ା୫(ଡି.ଏନ.ଏ.): ଗତ ୨ ମାସ ହେବ କେନ୍ଦ୍ରାପଡ଼ା ଜିଲା ଆଳି ଓ ରାଜକନିକା ଥାନା ଅଞ୍ଚଳରେ ଆତଙ୍କ ସୃଷ୍ଟି କରିଥିବା ୫ ଡକାୟତଙ୍କ ସମେତ ୧୧ଜଣଙ୍କୁ ପୋଲିସ ଗିରଫ କରିଛି। ସେମାନଙ୍କଠାରୁ ୨ ଲକ୍ଷ ୪୧ ହଜାର ୫୫୫ ଟଙ୍କା ମୂଲ୍ୟର (୫୩.୬୮୦ଗ୍ରାମ) ସୁନା ଗହଣା, ୧୬୪୮୦ ଟଙ୍କା ମୂଲ୍ୟର (୩୬୮.୩୦୦ଗ୍ରାମ)ରୁପା ଅଳଙ୍କାର, ୩ ମୋଟର ସାଇକେଲ,୨ ଛୁରୀ, ଗ୍ୟାସ କଟର,ବଡ଼ ଛୋଟ ପ୍ଲାସ, ଲାଇଟ ଗନ, ୬ ମୋବାଇଲ ସହିତ ନଗଦ ୨୩ହଜାର ୮୦୦ ଟଙ୍କା ଜବତ କରାଯାଇଛି। ଗିରଫ ଅଭିଯୁକ୍ତମାନେ ହେଲେ ବଡଆଙ୍କୋ ଗ୍ରାମର ଦୀପକ ମଳିକ ଓ ପ୍ରଶାନ୍ତ ମଳିକ, ପଦିନିପାଳର ସନ୍ତୋଷ ରାୟ, ନିଆଳର ଶ୍ରୀଧର ସିଂ,ଏକମାଣିଆର କାର୍ତ୍ତିକ ମଳିକ। ସେହିପରି ଚୋରୀ ସାମଗ୍ରୀ କିଣିଥିବା ଗୌଡ଼ପାଟଣାର ତପନ ସାହୁ, ବିଲିକଣାର ସର୍ବେଶ୍ୱର ସାହୁ, ବାଲେଶ୍ୱର ଜିଲା ଖଇରା ଥାନା ଅଧୀନ ଜୋଡଗଡିଆ ଗାଁର ରବିନ୍ଦ୍ର ନାୟକ, ଖଣ୍ଟପଡାଥାନା ଅନ୍ତର୍ଗତ କୋଶବଜାୟପୁରର ସବିତା ଦାସ, ଯାଜପୁର ଜିଲା ବିଞ୍ଜାରପୁର ଥାନା ଅନ୍ତର୍ଗତ ସୟଦପୁର ଗ୍ରାମର ମନୋଜ କୁମାର ପୋଥାଳ ଓ ଆଖୁନମହଲା ଗ୍ରାମର ରାମିଜ ରାଜା ଖାଁଙ୍କୁ ପୋଲିସ ଗିରଫ କରି ମଙ୍ଗଳବାର କୋର୍ଟ ଚାଲାଣ କରିଛି ବୋଲି କେନ୍ଦ୍ରାପଡ଼ା ଏସ୍ପି ସନ୍ଦିପ ସଂପଦ ମଡକର ଆୟୋଜିତ ଖବରଦାତା ସମ୍ମିଳନୀରେ କହିଛନ୍ତି।
ଏହି ଡକାୟତମାନେ ପ୍ରଥମେ ଏକାଧିକ ମନ୍ଦିରରୁ ଚୋରି କରି ସଫଳ ହେବା ପରେ ବିଭିନ୍ନ ଗ୍ରାମରେ ଚୋରି କରି ପୋଲିସ ଆଖିରୁ ନିଦ ହଜେଇ ଦେଇଥିଲେ। ଗତ ୮ ତାରିଖ ଦିନ ଏହି ଡକାୟତମାନେ ଆଳି ଥାନା ଅନ୍ତର୍ଗତ ବଡଆଙ୍କୋ ଗ୍ରାମର ସାଧୁଚରଣ ମହାଳିକଙ୍କ ଘରେ ପଶି ଲକ୍ଷାଧିକ ଟଙ୍କାର ସୁନା ଗହଣା ଲୁଟି ନେବା ସହ ସାଧୁ ଚରଣ ଓ ତାଙ୍କ ସ୍ତ୍ରୀଙ୍କୁ ମରଣାନ୍ତକ ଆକ୍ରମଣ କରି ଫେରାର ହୋଇଯାଇଥିଲେ। ସେହିପରି ଗତ ଏପ୍ରିଲ ୩୦ ତାରିଖ ରାତିରେ ରାଜକନିକା ଥାନା ଅଧୀନ ଭାମଣ୍ଡା ଗ୍ରାମର ମୀନତି ମଳିକଙ୍କ ଘରେ ପଶି ୮୦ ହଜାର ଟଙ୍କା ଓ ମୂଲ୍ୟବାନ ଅଳଙ୍କାର ଲୁଟି ନେଇଥିଲେ। ଆଳି ଥାନାରେ ସାଧୁ ଚରଣ କରିଥିବା ଏତଲା ଓ ରାଜକନିକା ଥାନାରେ ମିନତୀ ମଳିକ କରିଥିବା ଅଭିଯୋଗକୁ ଭିତ୍ତି କରି କେନ୍ଦ୍ରାପଡ଼ା ଜିଲା ପୋଲିସ ତଦନ୍ତ ଆରମ୍ଭ କରିଥିଲା। ପଟ୍ଟାମୁଣ୍ଡାଇ ଏସ୍ଡିପିଓ ସାରାଣୀ ବେହୁରାଙ୍କ ପ୍ରତ୍ୟକ୍ଷ ତତ୍ତ୍ୱାବଧାନରେ ଆଳି ଓ ରାଜକନିକା ପୋଲିସ ତନାଘନା ଚଳାଇବା ପରେ ୧୧ ଅଭିଯୁକ୍ତ ପୋଲିସ କବ୍ଜାକୁ ଆସିଥିଲେ। ସେମାନଙ୍କୁ ଥାନାକୁ ଆଣି ପଚରାଉଚରା କରିବା ପରେ ସମସ୍ତ ଘଟଣା ସାମ୍ନାକୁ ଆସିଥିଲା। ଏ ସଂକ୍ରାନ୍ତରେ ଆଳି ଥାନାରେ ଏକ ମାମଲା(ନଂ.୧୬୪/୨୨) ରାଜକନିକା ଥାନା ଏକ ମାମଲା(ନଂ.୧୩୬/୨୨) ରୁଜୁ ହୋଇଥିଲା।
