ଢେଙ୍କାନାଳ,୩ା୮(ରତନ ନାୟାର): ଢେଙ୍କାନାଳ ଜିଲା ହିନ୍ଦୋଳ ରେଞ୍ଜ ଖଜୁରିଆକଟା , ବେଡ଼ା ଗ୍ରାମ ମଧ୍ୟରେ ଯାଇଥିବା ରାସ୍ତାରେ ଗୁରୁବାର ସକାଳେ ୨ଟି ବଡ଼ ହାତୀ ଉପଦ୍ରବ କରୁଥିବାରୁ ଗ୍ରାମବାସୀ ଆତଙ୍କିତ ହୋଇପଡ଼ିଛନ୍ତି । ୨ଟି ଯାକ ଦନ୍ତାହାତୀ ଗୋଠଛଡ଼ା ହୋଇ ଗ୍ରାମ ଭିତରେ ପଶିଛନ୍ତି । ଏଥି ସହିତ ଗ୍ରାମ ରାସ୍ତାରେ ହାତୀ ଦୁଇଟି ଚାଲିବାରୁ ଉକ୍ତ ରାସ୍ତାରେ ଚଳାଚଳ ବନ୍ଦ ହୋଇପଡ଼ିଛି । ଗ୍ରାମର ଯୁବକ ଓ ପିଲାମାନେ ସେମାନଙ୍କୁ ତଡ଼ୁଥିବା ବେଳେ ହାତୀ ୨ଟି ସେମାନଙ୍କୁ ପାଲଟା ଆକ୍ରମଣ କରୁଥିବା ଦେଖାଯାଇଛି। ହାତୀ ଦ୍ୱୟ ଲୋକଙ୍କୁ ଗୋଡ଼ାଉଥିବା ଦେଖାଯାଇଛି । ବନ କର୍ମଚାରୀମାନେ ଉପସ୍ଥିତ ରହି ହାତୀ ଦୁଇଟିଙ୍କୁ ସେଠାରୁ ହଟାଇବା ପାଇଁ ଉଦ୍ୟମ କରୁଥିଲେ ମଧ୍ୟ ସେମାନେ ଉକ୍ତ ଅଞ୍ଚଳ ଛାଡ଼ି ଯାଉନାହାନ୍ତି । ତୁରନ୍ତ ୨ ଦନ୍ତାହାତୀଙ୍କୁ ଉକ୍ତ ଅଞ୍ଚଳରୁ ତଡ଼ିବା ପାଇଁ ଗ୍ରାମବାସୀ ଦାବି କରିଛନ୍ତି।
