କେନ୍ଦୁଝର,୨୪ା୧୨(ସ୍ବ.ପ୍ର.): ଝୁମ୍ପୁରା ବ୍ଲକ ନିଶ୍ଚିନ୍ତପୁର ପଞ୍ଚାୟତର ଅମ୍ଳାନିଗୋଡ଼ା ଗ୍ରାମରେ ହାତୀ ଉପଦ୍ରବ ଜାରି ରହିଛି। ହାତୀମାନେ ଘର ଭାଙ୍ଗିବା ସହ ଫସଲ, ଘରର ଆସବାବପତ୍ର ନଷ୍ଟ କରୁଥିବାରୁ ଲୋକମାନେ ଚିନ୍ତାରେ ରହିଛନ୍ତି ସେମାନଙ୍କ ପାଖାପାଖି ୧୫ ହଜାର ଟଙ୍କା ମଧ୍ୟ ଦଳାଚକଟା କରି ଖାଇ ଦେଇଛନ୍ତି। ବନ ବିଭାଗ କିମ୍ବା ପ୍ରଶାସନ ପକ୍ଷରୁ ତୁରନ୍ତ ସହାୟତା ଦେବାକୁ ଉକ୍ତ ଅଞ୍ଚଳ ଗସ୍ତ କରିଥିବା ସ୍ବତନ୍ତ୍ର ଉନ୍ନୟନ ପରିଷଦର ଅଧ୍ୟକ୍ଷା ଲକ୍ଷ୍ମୀ ନାଏକ କହିଛନ୍ତି। କ୍ଷତିଗ୍ରସ୍ତ ପରିବାର ହେଲେ ଭୂବନ ମହାନ୍ତ, ଅନ୍ନପୂର୍ଣ୍ଣା ମହାନ୍ତ, ମଦନ ମହାନ୍ତ, ଜଗମୋହନ ମହାନ୍ତ, ଡମ୍ବରୁଧର ମହାନ୍ତ, କୁଚୁରୀ ମହାନ୍ତ, ହୃଷୀକେଶ ମହାନ୍ତ, ମାନିଆ ମୁଣ୍ଡା, ମୀନକେତନ ମୁଣ୍ଡା, ରାବଣ ସର୍ଦ୍ଦାର, ଲବ ସର୍ଦ୍ଦାର। ହାତୀ ସେମାନଙ୍କ ଘରଦ୍ୱାର ଭାଙ୍ଗିବା ସହ ବହୁ କଷ୍ଟରେ ଧାରକରଜ କରିଥିବା କୋବି, ବାଇଗଣ, ବିଲାତି, ମଟର ଆଦି ଚାଷକୁ ଦଳି ଚକଟି ଦେଇଥିବାରୁ ମୁଣ୍ଡରେ ହାତ ଦେଇ ବସିଛନ୍ତି। ବର୍ଷ ତମାମ କିପରି ଚଳିବେ ସେନେଇ ଚିନ୍ତାରେ ରହିଛନ୍ତି। କ୍ଷତିଗ୍ରସ୍ତ ପରିବାରଙ୍କୁ ତୁରନ୍ତ ଜିଲା ଖଣିଜ ପ୍ରତିଷ୍ଠାନ ପାଣ୍ଠିରୁ ସହାୟତା ପ୍ରଦାନ କରାଗଲେ ଗରିବ ଲୋକମାନେ ଉପକୃତ ହୋଇ ପାରନ୍ତେ ବୋଲି ମତ ପ୍ରକାଶ ପାଇଛି। ଦୀର୍ଘଦିନ ଧରି ଉକ୍ତ ଅଞ୍ଚଳରେ ହାତୀ ଉପଦ୍ରବ ଲାଗି ରହିଥିବା ବେଳେ ବନ ବିଭାଗ ପକ୍ଷରୁ ସେମାନଙ୍କ ସମ୍ପତ୍ତିର ସୁରକ୍ଷା ଦିଆଯାଇ ପାରୁନାହିଁ କିମ୍ବା ଆପାତ୍ତକାଳୀନ ସହାୟତା ଦିଆଯାଉ ନ ଥିବାରୁ ଦୁଃଖରେ ରହିଛନ୍ତି। ଅର୍ଥାଭାବରୁ ଘର ମରାମତି କରି ପାରୁନାହାନ୍ତି। ଫଳରେ ଶୀତର ପ୍ରକୋପରେ ଭଙ୍ଗା ଦଦରା ଘରେ ବହୁ କଷ୍ଟରେ ରହିବାକୁ ପଡୁଛି। ଉକ୍ତ ଗ୍ରାମରେ ଦୁଇଟି ପଡ଼ାରେ ପାଖାପାଖି ୬୦ ପରିବାର ବସବାସ କରଥିବାରୁ ହାତୀ ଉପଦ୍ରବରେ ଆତଙ୍କିତ ହୋଇପଡ଼ିଛନ୍ତି।
