ବାଲେଶ୍ୱର ଅଫିସ,୫ା୧୨: ବାଲେଶ୍ୱର ଜିଲା ବସ୍ତା ବ୍ଲକ ଅଧିନସ୍ଥ ନଟାକଟା ପଞ୍ଚାୟତରେ ଶନିବାର ରାତିରେ ହାତୀ ଆତଙ୍କ ଦେଖିବାକୁ ମିଳିଛି। ମୟୂରଭଞ୍ଜ ଜିଲା ମୋରଡ଼ା ଅଞ୍ଚଳରୁ ୧୫ରୁ ଊଦ୍ଧର୍ବ ହାତୀପଲ ଅମର୍ଦ୍ଦାରୋଡ୍ ଷ୍ଟେଶନ ନିକଟସ୍ଥ ରେଳ ଲାଇନ ଡେଇଁ ନଟାକଟା ପଞ୍ଚାୟତର ପ୍ରଥମେ ସଦାନନ୍ଦପୁର ଗାଁ ଓ ପରେ ନରଣପୁର ଚାରିଗାଁ, ବଡ଼ଚାରିଗାଁ,ବସନ୍ତପୁରକୁ ପଶିଥିଲେ। ନରଣପୁର ଗ୍ରାମରେ ଆଶୁତୋଷ ରାଉଳ ଓ ରାମହରି ଦାସଙ୍କ ଘର ବାଡ଼ି ଭିତରେ ପଶି ବ୍ୟାପକ କ୍ଷତି କରିଥିଲେ। ଏଥିସହିତ ଏହି ହାତୀପଲ ଧାନ ବିଲ ଭିତରେ ପଶି ଅନେକ ଚାଷ ନଷ୍ଟ କରିଛନ୍ତି। ବାଲେଶ୍ୱର ବନ ବିଭାଗର ଏସିଏଫ୍ ସୁଶାନ୍ତ ଜେନାଙ୍କ ନେତୃତ୍ୱରେ ୧୫ ଜଣିଆ ଟିମ୍ ଓ ସ୍ଥାନୀୟ ଲୋକେ ମିଶି ହାତୀମାନଙ୍କୁ ଘଉଡ଼ାଇବା ପାଇଁ ଚେଷ୍ଟା ଜାରି ରଖିଛନ୍ତି। ଏବେ ହାତୀ ଦଳ ସ୍ଥାନୀୟ ବେତନାସିଆ ଜଙ୍ଗଲରେ ଅଛନ୍ତି।
