ବାଲେଶ୍ୱର,୭ା୨: ନିରବଚ୍ଛିନ୍ନ ବିଦ୍ୟୁତ ଯୋଗାଣର ଏକ ପ୍ରମୁଖ ପ୍ରତିବନ୍ଧକ ହେଉଛି ବିଦ୍ୟୁତ ଚୋରି କାରଣ ତାହା ନେଟ୍ୱର୍କ ଉପରେ ଅଧିକ ଚାପ ସୃଷ୍ଟି ସହ ଟ୍ରିପିଂ ହୋଇଥାଏ। ଏହି ସମସ୍ୟାକୁ ଦୂର କରିବାର ଆବଶ୍ୟକତା ବିଚାରକୁ ନେଇ ଟାଟା ପାୱାର ଓ ଓଡ଼ିଶା ସରକାରଙ୍କ ଯୌଥ ଉଦ୍ୟୋଗ ଟିପି ନଦର୍ନ ଓଡ଼ିଶା ଡିଷ୍ଟ୍ରିବ୍ୟୁଶନ୍ ଲିମିଟେଡ୍ (ଟିପିଏନ୍ଓଡିଏଲ୍) ପକ୍ଷରୁ ବିଦ୍ୟୁତ ଚୋରିକୁ ବନ୍ଦ କରିବା ଲାଗି ଏନ୍ଫୋର୍ସମେଣ୍ଟ୍ ଟିମ୍ ମୁତୟନ କରାଯାଇଛି। ଗତ ଆଠ ମାସ ମଧ୍ୟରେ ଟିମ୍ର ମିଳିତ ଉଦ୍ୟମ ଯୋଗୁଁ ୨୫,୭୦୪ ଜଣ ଗ୍ରାହକଙ୍କଠାରୁ ମିଟର୍ ହେର୍ଫେର୍, ହୁକ ପକାଇବା, ମିଟର୍ ବାଇପାସ୍ କରିବା ଆଦି ଜରିଆରେ ହୋଇଥିବା ୫୭,୦୦୦ କିଲୋୱାଟ୍ର ଅଣସ୍ବୀକୃତ ଲୋଡ୍ ଚିହ୍ନଟ କରାଯାଇଛି। ସେହିଭଳି ବିଦ୍ୟୁତ ଚୋରିକୁ ଧରିବା ଲାଗି ପ୍ରତି ଟିମ୍ରେ ୧୦୪ ଜଣ ଲେଖାଏଁ ସଦସ୍ୟ ବିଶିଷ୍ଟ ମୋଟ୍ ୨୦ଟି ଟିମ୍କୁ ୨୪ ଘଣ୍ଟିଆ ମୁତୟନ ରଖାଯାଇଛି।
ଏ ସମ୍ପର୍କରେ ଟିପିଏନ୍ଓଡିଏଲ୍ର ସିଇଓ ଭାସ୍କର ସରକାର କହିଛନ୍ତି, ଏକ ଦାୟିତ୍ୱବାନ ବିଦ୍ୟୁତ କମ୍ପାନୀ ଭାବେ ଆମର ଗ୍ରାହକମାନଙ୍କୁ ଭରସାଯୋଗ୍ୟ ଓ ସୁଲଭ ବିଦ୍ୟୁତ ଯୋଗାଇ ଦେବା ଉପରେ ଆମେ ସର୍ବଦା ଧ୍ୟାନ ଦେଉଛୁ। ଆମର ଏହି ପ୍ରତିବଦ୍ଧତା ଦିଗରେ ଅନ୍ୟ ଏକ ପଦକ୍ଷେପ ହେଉଛି ବିଦ୍ୟୁତ ଚୋରିକୁ ଧରିବା ଲାଗି ଏକ କଠିନ ପରିଶ୍ରମୀ ଓ ଉତ୍ସର୍ଗୀକୃତ ଟିମ୍ ମୁତୟନ କରିବା। ଏକ ଦୃଢ଼ ନେଟ୍ୱର୍କ ସୃଷ୍ଟି କରିବା ଏବଂ ଆମ ଗ୍ରାହକମାନଙ୍କୁ ଭରସାଯୋଗ୍ୟ ବିଦ୍ୟୁତ ଯୋଗାଣ କରିବା ଲାଗି ଅଧିକ ଉଦ୍ୟମ ସହିତ କାର୍ଯ୍ୟ ଜାରି ରଖିବୁ।
