ଓ୍ବାଶିଂଟନ୍,୨୫।୬: ଆମେରିକୀୟ ମହାକାଶ ଗବେଷଣା ସଂସ୍ଥା (ନାସା) ପକ୍ଷରୁ ବୈଦ୍ୟୁତିକ ବିମାନ ନିର୍ମାଣ କାର୍ଯ୍ୟ ଆରମ୍ଭ ହୋଇଯାଇଛି। ଏହା ବୈଦ୍ୟୁତିକ ବିମାନ ଚଳାଚଳ କ୍ଷେତ୍ରରେ ବଡ଼ ଉପଲବ୍ଧି ହେବ ବୋଲି ଆଶା କରାଯାଉଛି। ୨୦୫୦ ସୁଦ୍ଧା ଆମେରିକା ଶୂନ୍ୟ ସବୁଜଗୃହ ବାଷ୍ପ ଉତ୍ସର୍ଜନ ନେଇ ଯେଉଁ ଯୋଜନା ପ୍ରସ୍ତୁତ କରିଛି, ତାହା ସଫଳ କରିବାରେ ବୈଦ୍ୟୁତିକ ବିମାନ ସହଯୋଗ କରିବ ବୋଲି ବିଶ୍ୱାସ ରହିଛି। ଆମେରିକା ଉତାହସ୍ଥିତ ଉତ୍ତର-ଲୋଗାନରେ ନାସାର ଏକ୍ସ-୫୭ ମାକ୍ସଓ୍ବେଲ୍ ଅଲ୍ ଇଲେକ୍ଟ୍ରିକ୍ ଏୟାର କ୍ରାଫ୍ଟ ପ୍ରୋଜେକ୍ଟର ପରୀକ୍ଷା ମୂଳକ କାର୍ଯ୍ୟ ଚଳିତ ବର୍ଷ ସେପ୍ଟେମ୍ବରରେ ଶେଷ ହେବ। ଇଲେକ୍ଟ୍ରିକ୍ ଚାଳିତ ବିମାନ ଭବିଷ୍ୟତ ପାଇଁ ଉପଯୋଗୀ ସାବ୍ୟସ୍ତ ହେବ ବୋଲି କାଲିଫର୍ନିଆସ୍ଥିତ ନାସା ଆର୍ମଷ୍ଟ୍ରଙ୍ଗ ଫ୍ଲାଇଟ୍ ରିସର୍ଚ୍ଚ ସେଣ୍ଟର ନିର୍ଦ୍ଦେଶକ ବ୍ରାଡ୍ ଫ୍ଲିକ୍ କହିଛନ୍ତି।
ଏ ପ୍ରକାର ନିର୍ମାଣ ପୂର୍ବରୁ କେବେ ହୋଇ ନ ଥିବାବେଳେ ଏହା ସହଜ କାମ ନୁହେଁ। ବିଦ୍ୟୁତ ଚାଳିତ ବିମାନ ଲିଥିୟମ୍- ଆୟନ୍ ବ୍ୟାଟେରି ବ୍ୟବହାର କରାଯିବ। ବିଦ୍ୟୁତ୍ ଦ୍ୱାରା ଉତ୍ତପ୍ତ ହୋଇ ବ୍ୟାଟେରିରୁ ଶକ୍ତି ଉତ୍ପନ୍ନ ହେବ, ଯାହା ଦ୍ୱାରା ବିମାନଟି ଆକାଶ ପଥରେ ବହୁ ଦୂର ପର୍ଯ୍ୟନ୍ତ ଅତିକ୍ରମ କରିପାରିବ। ଅନ୍ୟପକ୍ଷେ ବ୍ୟାଟେରି ଟେକ୍ନୋଲୋଜିରେ ସାମାନ୍ୟ ପରିବର୍ତ୍ତନ ଜରୁରୀ ବୋଲି ପ୍ରୋଜେକ୍ଟ ଟିମ୍ ପକ୍ଷରୁ କୁହାଯାଇଛି। ଏକ୍ସ-୫୭ ପ୍ରୋଜେକ୍ଟ ଜରିଆରେ କ୍ରୁଜ୍ ମୋଟର କଣ୍ଟ୍ରୋଲର୍ସ ଡିଜାଇନ୍ କରାଯାଇଛି। ଏଥିରୁ ଉତ୍ପନ୍ନ ଏନର୍ଜି ଲିଥିୟମ୍-ଆୟନ୍ ବ୍ୟାଟେରିରେ ଗଚ୍ଛିତ ହୋଇ ରହିବା ଦ୍ୱାରା ବିମାନ ଚାଲିବ। ବିଦ୍ୟୁତ୍କୁ ନେଇ ନାସା ପକ୍ଷରୁ ଆଗାମୀ ଦିନରେ ଅଧିକ ଗବେଷଣା ଜାରି ରହିବ ।
