ରାୟଗଡ଼ା,୨୫।୬(ଆଶିଷ ରଞ୍ଜନ ପଣ୍ଡା)ଆସିଲା ମୌସୁମୀ ା ଆରମ୍ଭ ହେଲା ଚାଷକାମ ା ତେବେ ଆଷାଢ଼ ମାସ ଆରମ୍ଭ ହୋଇ ୨୨ଦିନ ବିତିଯାଇଥିଲେ ମଧ୍ୟ ଜିଲାରେ ଆବଶ୍ୟକ ପରିମାଣର ବର୍ଷା ହୋଇ ନ ଥିବାରୁ ଚାଷକାର୍ଯ୍ୟରେ ବିଳମ୍ବ ଦେଖାଦେଇଛି। ଜିଲାରେ ୨୦୦ ମି.ଲି. ମିଟର ବର୍ଷାର ଆବଶ୍ୟକତା ଥିବା ବେଳେ ଚଳିତ ବର୍ଷ ଜୁନ୍ ୧ରୁ ୨୦ ସୁଦ୍ଧା ୨୧.୩ ମି.ମି. ବର୍ଷା ହୋଇଛି, ଯାହା ଚାଷୀଙ୍କ ପାଇଁ ଚିନ୍ତାର କାରଣ ପାଲଟିଥିଲା। ଜୁନ୍ ଶେଷ ସୁଦ୍ଧା ବର୍ଷା ନ ହେଲେ ଆଉ ବିହନ ପଡ଼ିପାରିବ ନାହିଁ ବୋଲି ଚାଷୀମାନେ କହିଥିଲେ। ହେଲେ ଶନିବାରଠାରୁ ମୌସୁମୀ ପ୍ରଭାବରୁ ଜିଲାରେ ବର୍ଷା ହୋଇଥିବାରୁ ଚାଷୀ ବିହନ ବୁଣି ତଳି ପକାଇବା ଆରମ୍ଭ କରିଛି ା
କୃଷି ବିଭାଗ ସୂଚନା ଅନୁସାରେ, ସମଗ୍ର ରାୟଗଡ଼ା ଜିଲାରେ ଚଳିତ ବର୍ଷ ୧ଲକ୍ଷ ୮୨ ହଜାର ୬୪୦ ହେକ୍ଟର ଜମିରେ ବିଭିନ୍ନ ପ୍ରକାର ଚାଷ ପାଇଁ ଲକ୍ଷ୍ୟ ରଖାଯାଇଛି। ସେଥିମଧ୍ୟରୁ ୪୭ ହଜାର ହେକ୍ଟର ଜମିରେ ଧାନ, ୪୮ ହଜାର ହେକ୍ଟରରେ କପା, ୨୧ ହଜାର ହେକ୍ଟରରେ ମାଣ୍ଡିଆ, ୧୪ ହଜାର ହେକ୍ଟରରେ ମକା, ୧୨ ହଜାର ହେକ୍ଟରରେ ହରଡ଼, ୧୪ ହଜାର ହେକ୍ଟରରେ ପରିବା ଚାଷର ଲକ୍ଷ୍ୟ ଧାର୍ଯ୍ୟ ହୋଇଛି। ଜିଲାର ଅଧିକାଂଶ ଜମିରେ ଧାନ ଓ କପାଚାଷ ହୋଇଥାଏ। ରାୟଗଡ଼ା ଏକ ପାହାଡ଼ିଆ ଜିଲା ହୋଇଥିବା କାରଣରୁ ଏଠାକାର ଜମିରେ ଚାଷୀମାନେ ୧୨୦ ଦିନିଆ ଧାନ ଚାଷ କରିଥାନ୍ତି ା ମୁଖ୍ୟତଃ ୧୦୦୧, ୧୦୧୦ ଓ ଆର୍ଯ୍ୟାଲୁ କିସମ ଧାନ ସର୍ବାଧିକ ଚାଷ ହୋଇଥାଏ। ଏହି ଧାନ ବିହନ ବୁଣିବା ପାଇଁ ଉପଯୁକ୍ତ ସମୟ ହେଉଛି ଜୁନ୍ ମାସର ପ୍ରଥମ ସପ୍ତାହ। ଜୁନ୍ ଶେଷ ସପ୍ତାହରେ ତଳି ରୁଆ କାର୍ଯ୍ୟ ହୋଇଥାଏ। ତେବେ ୪୭ ହଜାର ହେକ୍ଟର ଜମି ପାଇଁ ୪୭୦୦ ରୁ ୪୯୦୦ ହେକ୍ଟର ଜମିରେ ବିହନ ବୁଣାଯିବା ନିୟମ ରହିଛି। କିନ୍ତୁ ବର୍ଷା ଅଭାବରୁ ଗତ ସପ୍ତାହରେ ମାତ୍ର ୧୦୨ ହେକ୍ଟର ଜମିରେ ହିଁ ବିହନ ବୁଣାଯାଇଥିବା ଜଣାପଡ଼ିଛି ା ଗତ ୨୦ ତାରିଖ ପର୍ଯ୍ୟନ୍ତ ଜିଲାରେ କୌଣସି ଗୋଟିଏ ସ୍ଥାନରେ ମଧ୍ୟ ଚାଷୀ ମୁଠାଏ ମଧ୍ୟ ବିହନ ବୁଣି ନ ଥିବା ସୂଚନା ମିଳିଛି। ୨୦୧୫ ରେ ବର୍ଷା ଅଭାବରୁ ଜିଲାରେ ମରୁଡ଼ି ପରିସ୍ଥିତି ସୃଷ୍ଟି ହୋଇଥିଲା। ଚଳିତ ବର୍ଷ ମଧ୍ୟ ସେହିଭଳି ଆଶଙ୍କା ବ୍ୟକ୍ତ କରିଛନ୍ତି ଚାଷୀ ା ଶନିବାରଠାରୁ ବର୍ଷା ଆରମ୍ଭ ହୋଇଥିବାରୁ ଚାଷୀମାନେ ବିହନ ବୁଣିବା ଆରମ୍ଭ କରିଥିଲେ ମଧ୍ୟ କାଶୀପୁର, ଚନ୍ଦ୍ରପୁର ଓ ଗୁଡ଼ାରି ବ୍ଲକର ଅବସ୍ଥା ଅତି ସଙ୍ଗିନ। ଏହି ୩ ବ୍ଲକରେ ଚଳିତ ମାସରେ ଟୋପାଏ ମଧ୍ୟ ବର୍ଷା ହୋଇନାହିଁ। ଶୂନ ମି.ମି. ବର୍ଷା ରେକର୍ଡ କରିଛି କୃଷି ବିଭାଗ। ରାୟଗଡ଼ା ଜିଲାର ଭାତହାଣ୍ଡି ଭାବେ ପରିଚିତ ପଦ୍ମପୁର ବ୍ଲକରେ ମଧ୍ୟ ଆବଶ୍ୟକ ବର୍ଷା ହୋଇନାହିଁ ା ଏହାପରେ ରାମନାଗୁଡ଼ା, ରାୟଗଡ଼ା ଓ ବିଷମକଟକ ବ୍ଲକର ଚାଷ ଉପରେ ସମଗ୍ର ଜିଲା ନିର୍ଭର କରିଥାଏ। ହେଲେ ବୈଶାଖ ମାସ ଅକ୍ଷୟ ତୃତୀୟାରେ ଅଖିମୁଠି ଅନୁକୂଳ କରି ଗତ ୨ ମାସ ହେବ ବର୍ଷାକୁ ଚାହିଁ ରହିଥିଲେ ଚାଷୀ। ଜିଲାରେ ଜଳସେଚନ ବ୍ୟବସ୍ଥା ବିପର୍ଯ୍ୟସ୍ତ। ଭାତହାଣ୍ଡି ବ୍ଲକ ଭାବେ ପରିଚିତ ପଦ୍ମପୁରସ୍ଥିତ ଜିଲାର ସର୍ବବୃହତ୍ ଜଳଭଣ୍ଡାର ବଡ଼ନାଳ ଅବସ୍ଥା ମଧ୍ୟ ସାଂଘାତିକ। ଜୁନ୍ ୮ରେ ୫-ଟି ସଚିବଙ୍କ ଗସ୍ତ ସମୟରେ ବଡ଼ନାଳ ରହିଥିବା ଅଞ୍ଚଳର ଚାଷୀମାନେ ଅଭିଯୋଗ କରିବାର ୨ ସପ୍ତାହ ବିତିଯାଇଥିଲେ ମଧ୍ୟ ବଡ଼ନାଳ ଅବସ୍ଥାରେ କୌଣସି ସୁଧାର ଆସିନାହିଁ ା ରାୟଗଡ଼ା ବ୍ଲକ ସ୍ଥିତ ସିଲଟିଗୁଡ଼ା ଜଳଭଣ୍ଡାରରେ ମଧ୍ୟ ସେହି ସମାନ ଅବସ୍ଥା। ଏହି ଜଳଭଣ୍ଡାର ପାଣି ଜମିକୁ ମାଡ଼େ ନାହିଁ, ଆଉ ଚେକ୍ଡ୍ୟାମ୍ ତ ଜିଲା ପାଇଁ ସ୍ବପ୍ନ ପାଲଟିଛି ା ବର୍ଷା ଅଭାବ ସାଙ୍ଗକୁ ଜଳ ସଂରକ୍ଷଣ ପାଇଁ କୌଣସି ପଦକ୍ଷେପ ଜିଲାରେ ନିଆଯାଉ ନ ଥିବାରୁ ଭୂତଳ ଜଳ ମଧ୍ୟ କମିବାରେ ଲାଗିଲାଣି ା ଫଳରେ ବୋର୍ୱେଲ ଖନନ ପରେ ବି ପାଣି ବାହାରୁ ନ ଥିବା ଅଭିଯୋଗ ହେଉଛି। ଚାଷୀ ଏଭଳି ଚିନ୍ତାରେ ରହିଥିବା ବେଳେ ମୌସୁମୀ ବର୍ଷା କିଛିଟା ଆଶ୍ୱସ୍ତି ଦେଇଛି ା ତେବେ ଆବଶ୍ୟକ ପରିମାଣର ବର୍ଷା ନ ହେଲେ ବିହନ ବୁଣିଲେ ମଧ୍ୟ କିଛି ଲାଭ ହେବ ନାହିଁ ବୋଲି ଚାଷୀମାନେ କହିଛନ୍ତି ା ତେଣୁ ରାଜ୍ୟ ସରକାର ଓ ଜିଲା ପ୍ରଶାସନ ଜଳସେଚନର ବ୍ୟବସ୍ଥା କରିବାକୁ ଚାଷୀ ମହଲରେ ଦାବି ଜୋର ଧରିଛି ା
