ଲକ୍ଷ୍ନୌ,୬।୨: ଉତ୍ତର ପ୍ରଦେଶର ମିଲ୍କିପୁର ବିଧାନସଭା ଉପନିର୍ବାଚନ ସମ୍ପର୍କରେ ହେଉଥିବା ଅଭିଯୋଗ ଉପରେ ସମାଜବାଦୀ ପାର୍ଟି ମୁଖ୍ୟ ଅଖିଳେଶ ଯାଦବ ଏକ ବିବାଦୀୟ ବୟାନ ଦେଇଛନ୍ତି। ସେ କହିଥିଲେ ଯେ ଭାଜପା ଏହିପରି ଭାବେ ନିର୍ବାଚନ ଲଢ଼େ। ନିର୍ବାଚନ କମିଶନ ମରିଗଲାଣି। ଆମକୁ ସେମାନଙ୍କୁ ଧଳା କପଡା ଉପହାର ଦେବାକୁ ପଡିବ।
ପୂର୍ବରୁ, ଅଖିଳେଶ ଶାସକ ଭାରତୀୟ ଜନତା ପାର୍ଟି (ଭାଜପା) ଏବଂ ସ୍ଥାନୀୟ ପ୍ରଶାସନକୁ ଟାର୍ଗେଟ କରିଥିଲେ। ଉତ୍ତର ପ୍ରଦେଶର ପୂର୍ବତନ ମୁଖ୍ୟମନ୍ତ୍ରୀ ଅଖିଳେଶ ଯାଦବ ଭାଜପା ଉପରେ ଗଣତାନ୍ତ୍ରିକ ପ୍ରକ୍ରିୟାକୁ ଦୁର୍ବଳ କରିବା ଏବଂ ଅଯୋଧ୍ୟାର ମିଲ୍କିପୁର ବିଧାନସଭା ଉପନିର୍ବାଚନରେ ହେରଫେର କରିବାର ଅଭିଯୋଗ ଆଣିଥିଲେ। ସେ ନିର୍ବାଚନ କମିଶନଙ୍କ ଠାରୁ କାର୍ଯ୍ୟାନୁଷ୍ଠାନ ମଧ୍ୟ ଦାବି କରିଥିଲେ।
ପୋଲିସ ପ୍ରଶାସନର ମନୋଭାବ ଅଗଣତାନ୍ତ୍ରିକ ବୋଲି ଅଖିଳେଶ ଦାବି କରିଥିଲେ। ଡଜନ ଡଜନ ବୁଥରେ ସମାଜବାଦୀ ପାର୍ଟିର ବୁଥ ଏଜେଣ୍ଟମାନଙ୍କୁ ଧମକ ଦିଆଯାଇଥିଲା। ମିଲକିପୁରରେ ବେଇମାନି କରିବା ପାଇଁ ଭାଜପା ସମସ୍ତ ପ୍ରକାରର ରଣନୀତି ଆପଣାଇଥିଲା। ମିଲକିପୁର ଉପନିର୍ବାଚନକୁ ପ୍ରଭାବିତ କରିବା ପାଇଁ ଭାଜପା ଗୁଣ୍ଡାମାନେ ବିଶୃଙ୍ଖଳା ସୃଷ୍ଟି କରିଥିଲେ। ତାଙ୍କୁ ପୋଲିସ ପ୍ରଶାସନ ପକ୍ଷରୁ ଖୋଲା ସୁରକ୍ଷା ମିଳିଥିଲା। ପୋଲିସ-ପ୍ରଶାସନ ଭାଜପା ଗୁଣ୍ଡାମାନଙ୍କୁ ମୁକ୍ତ ହାତ ଦେଇ ନିର୍ବାଚନ ଆଚରଣ ବିଧିର ଘୋର ଉଲ୍ଲଂଘନ କରିଛନ୍ତି।
ସେ ଅଭିଯୋଗ କରିଛନ୍ତି ଯେ ପୋଲିସ-ପ୍ରଶାସନ ଭୋଟରଙ୍କ ମଧ୍ୟରେ ଭୟର ବାତାବରଣ ସୃଷ୍ଟି କରି ଭୋଟକୁ ପ୍ରଭାବିତ କରିଛନ୍ତି। ଭାଜପା ସମର୍ଥକମାନେ ନିଜେ ସ୍ବୀକାର କରିଛନ୍ତି ଯେ ସେମାନେ ନକଲି ଭୋଟ ଦେଇଛନ୍ତି। ସମାଜବାଦୀ ପାର୍ଟି ପ୍ରାର୍ଥୀ ଅଜିତ ପ୍ରସାଦ ନିଜେ ନକଲି ଭୋଟିଂ କରୁଥିବା ସମୟରେ କିଛି ଲୋକଙ୍କୁ ଧରିଥିଲେ। ସେ କହିଛନ୍ତି, ‘ମିଲକିପୁର ଉପନିର୍ବାଚନରେ ରାୟପଟ୍ଟି ଅମାନିଗଞ୍ଜରେ ନକଲି ଭୋଟିଂ ବିଷୟରେ ଯେଉଁ ବ୍ୟକ୍ତି କହିଥିଲେ, ସେ ସ୍ପଷ୍ଟ କରିଦେଇଛନ୍ତି ଯେ ଭାଜପା ସରକାରଙ୍କ ଅଧିକାରୀମାନେ କିପରି ଜାଲିଆତିରେ ସାମିଲ ଅଛନ୍ତି।’ ନିର୍ବାଚନ କମିଶନଙ୍କୁ ଆଉ କଣ ପ୍ରମାଣ ଦରକାର ବୋଲି ସେ ପ୍ରଶ୍ନ ବି କରିଛନ୍ତି।
