ନୂଆଦିଲ୍ଲୀ,୪।୧୧: ଦିଲ୍ଲୀରେ ମ୍ୟୁନିସିପାଲଟି କର୍ପୋରେସନ ପାଇଁ ନିର୍ବାଚନ ତାରିଖ ଘୋଷଣା ହୋଇଛି। ଦିଲ୍ଲୀର ନିର୍ବାଚନ କମିଶନର ବିଜୟ ଦେବ ଶୁକ୍ରବାର ଅପରାହ୍ନ ୪ଟାରେ ଏକ ଖବରଦାତା ସମ୍ମିଳନୀ କରି ନିର୍ବାଚନ ତାରିଖ ଘୋଷଣା କରିଛନ୍ତି। ଦିଲ୍ଲୀରେ ଡିସେମ୍ବର ୪ରେ ମତଦାନ ଓ ଡିସେମ୍ବର ୭ରେ ଫଳାଫଳ ଆସିବ। ତେବେ ଏହାପୂର୍ବରୁ ଅର୍ଥାତ୍ ନଭେମ୍ବର ୭ରେ ନାମାଙ୍କନ ପତ୍ର ଦାଖଲ ଆରମ୍ଭ ହୋଇ ନଭେମ୍ବର ୧୪ରେ ଶେଷ ହେବ। ସେହିପରି ନଭେମ୍ବର ୧୬ରେ ନାମାଙ୍କନ ଯାଞ୍ଚ ଏବଂ ନଭେମ୍ବର ୧୯ରେ ନାମାଙ୍କନ ପତ୍ର ପ୍ରତ୍ୟାହାରର ଶେଷ ଦିନ ରହିବ। ଅନ୍ୟପଟେ ନିର୍ବାଚନ ତାରିଖ ଘୋଷଣା ହେବା ମାତ୍ରେ ଆଚରଣ ସଂହିତା ଲାଗୁ ହୋଇଛି। ନିର୍ବାଚନ ପ୍ରଚାର ପାଇଁ ହୋର୍ଡିଂ ଓ ବ୍ୟାନରକୁ ହଟାଇଦିଆଯିବ। ସୂଚନାଯୋଗ୍ୟ, ଦିଲ୍ଲୀରେ ବିଧାନସଭାର ୭୦ଟି ଆସନ ରହିଛି। କିନ୍ତୁ ୨ଟି ଆସନରେ ନିର୍ବାଚନ ଅନୁଷ୍ଠିତ ହେବ ନାହିଁ। ମୋଟ ୬୮ଟି ଆସନରେ ନିର୍ବାଚନ ହେବ, ଯେଉଁଥିରେ ୨୫୦ଟି ଓ୍ବାର୍ଡ ରହିଛି। ସୂଚନା ମୁତାବକ, ୨୦୧୧ ଜନଗଣନା ଅନୁଯାୟୀ ୨୫୦ୱାର୍ଡରେ ୪୨ଟି ଆସନ ଏସ୍ସି ପାଇଁ ସଂରକ୍ଷିତ ଥିବା ବେଳେ ୨୧ଟି ଆସନ ମହିଳାଙ୍କ ପାଇଁ ସଂରକ୍ଷିତ ରହିଛି। ମହିଳାମାନଙ୍କ ପାଇଁ ୧୦୪ଟି ଆସନ ପୃଥକ ଭାବେ ସଂରକ୍ଷିତ ରଖାଯାଇଛି। ସମୁଦାୟ ୧୩୬୬୫ଟି ମତଦାନ କେନ୍ଦ୍ର ରହିବ। ଏଥିସହ ନିର୍ବାଚନରେ ଇଭିଏମ୍ ବ୍ୟବହାର କରାଯିବ। ପ୍ରତ୍ୟେକ ବିଧାନସଭାରେ ୬୮ପର୍ଯ୍ୟବେକ୍ଷକ ରହିବେ। ସବୁ ସ୍ଥାନରେ ଭିଡିଓଗ୍ରାଫି କରାଯିବ ବୋଲି ନିର୍ବାଚନ କମିଶନର ବିଜୟ ଦେବ ସୂଚନା ଦେଇଛନ୍ତି।
