ନୂଆଦିଲ୍ଲୀ,୫।୧୨: ଭାରତୀୟ ନିର୍ବାଚନ କମିଶନ ଦିଲ୍ଲୀ ପୋଲିସର ସ୍ପେଶାଲ ସେଲରେ ଏକ ଅଭିଯୋଗ କରିଛନ୍ତି। ଦିଲ୍ଲୀ ପୋଲିସର ସ୍ପେଶାଲ ସେଲକୁ ଦିଆଯାଇଥିବା ଅଭିଯୋଗରେ ନିର୍ବାଚନ ଆୟୋଗଙ୍କ ପକ୍ଷରୁ କୁହାଯାଇଛି ଯେ, ସୋସିଆଲ ମିଡିଆ ହ୍ବାଟସଆପ୍ରେ ଏକ ମିଥ୍ୟା ଖବର ପ୍ରଚାର କରାଯାଉଛି, ଯେଉଁଥିରେ କୁହାଯାଇଛି ଯେ, ଯଦି ଭୋଟ ନ ଦେବ, ତେବେ ବ୍ୟାଙ୍କ ଆକାଉଣ୍ଟରୁ ୩୫୦ ଟଙ୍କା କଟିବ। ଏହି ଖବର ସମ୍ପୂର୍ଣ୍ଣ ନକଲି ବୋଲି ନିର୍ବାଚନ ଆୟୋଗର ମୁଖପାତ୍ର ସ୍ପଷ୍ଟ କରିଛନ୍ତି। ଏହି ଅଭିଯୋଗ ପରେ ଦିଲ୍ଲୀ ପୋଲିସର ସ୍ପେଶାଲ ସେଲର ସାଇବର ୟୁନିଟ ଏହି ଘଟଣାର ତଦନ୍ତ ଆରମ୍ଭ କରିଛି।
ନିର୍ବାଚନ ଆୟୋଗ ଦିଲ୍ଲୀ ପୋଲିସକୁ ଦେଇଥିବା ଅଭିଯୋଗରେ ଅଭିଯୁକ୍ତଙ୍କୁ ଶୀଘ୍ର ଧରିବା ପାଇଁ ଏବଂ ଏହି ବାର୍ତ୍ତା ପ୍ରଚାର କରିବାର କାରଣ ଜାଣିବାକୁ ଅନୁରୋଧ କରିଛନ୍ତି। ଖୁବ ଶୀଘ୍ର ଉତ୍ତରପ୍ରଦେଶ, ପଞ୍ଜାବ, ଉତ୍ତରପ୍ରଦେଶ ସମେତ ୫ଟି ରାଜ୍ୟରେ ନିର୍ବାଚନ ଅନୁଷ୍ଠିତ ହେବାକୁ ଯାଉଛି, ଏପରି ପରିସ୍ଥିତିରେ ନିର୍ବାଚନ କମିଶନ ମଧ୍ୟ ଏଭଳି ଖବର ଭାଇରାଲକୁ ଗମ୍ଭୀରତାର ସହ ନେଇଛନ୍ତି, ଯାହା ପରେ ଦିଲ୍ଲୀ ପୋଲିସ ମଧ୍ୟ ଏହି ଘଟଣାର ତଦନ୍ତ ଆରମ୍ଭ କରିଛି।
