ଛତ୍ରପୁର,୧୭।୩(ସନ୍ତୋଷ ପାଢ଼ୀ/ଦିଲ୍ଲୀପ ସାମଲ ): ସାଧାରଣ ନିର୍ବାଚନ ପାଇଁ ତାରିଖ ଘୋଷଣା ପରେ ଗଞ୍ଜାମ ଜିଲା ପ୍ରଶାସନ ତତ୍ପର ହୋଇଛି। ନିର୍ବାଚନ ଆଚରଣ ବିଧି କଡ଼ାକଡ଼ି ପାଳନ ଲାଗି ଗୁରୁତ୍ୱ ଦିଆଯାଇଛି। ଏନେଇ ବିଭିନ୍ନ ରାଜନୈତିକ ଦଳର ପ୍ରତିନିଧିମାନଙ୍କ ସହ ଗଞ୍ଜାମ ଜ଼ିଲାପାଳ ଦିବ୍ୟଜ୍ୟୋତି ପରିଡା ଆଲୋଚନା କରିଛନ୍ତି। କିଭଳି ନିର୍ବାଚନ ଅବାଧ ଓ ନିରପେକ୍ଷ ହେବ ସେନେଇ ସମସ୍ତଙ୍କ ସହଯୋଗ ଲୋଡ଼ିଥିଲେ ଜ଼ିଲାପାଳ।
ପରେ ଏକ ଖବରଦାତା ସମ୍ମିଳନୀରେ ଜ଼ିଲାପାଳ ନିର୍ବାଚନ ପ୍ରସ୍ତୁତି ସମ୍ପର୍କରେ ବିସ୍ତୃତ ଭାବେ ସୂଚନା ଦେଇଛନ୍ତି। ନିର୍ବାଚନ ଆଚରଣବିଧି ଲାଗୁ ହୋଇଯାଇଥିବାରୁ ଜିଲାର ସମସ୍ତ ସ୍ଥାନରୁ ୪୮ ଘଣ୍ଟା ମଧ୍ୟରେ ବ୍ୟାନର, ପୋଷ୍ଟର, ହୋର୍ଡିଙ୍ଗ ବାହାର କରାଯାଉଥିବା। ଜ଼ିଲାପାଳ କହିଛନ୍ତି, ଗଞ୍ଜାମ ଜିଲାରେ ଦୁଇଟି ପର୍ଯ୍ୟାୟରେ ୧୩ ବିଧାନସଭା ଆସନ ଏବଂ ବ୍ରହ୍ମପୁର ଓ ଆସ୍କା ଲୋକ ସଭା ଆସନ ପାଇଁ ଭୋଟ ଗ୍ରହଣ ହେବ ଜିଲାରେ ୨୯ ଲକ୍ଷ ୭୧ ହଜାର ମତଦାତା ରହିଛନ୍ତି। ସେଥିରୁ ୧୫,୩୧୬୬୦ ପୁରୁଷ ଓ ୧୪୩୯୨୮୬ ମହିଳା ଭୋଟର ଅଛନ୍ତି। ତୃତୀୟ ଲିଙ୍ଗ ୨୮୧ ଏବଂ ଯୁବ ଭୋଟର ୬୫୦୮୦ ରହିଛନ୍ତି। ମତଦାତା ଲାଗି ୩୦୭୭ଟି ବୁଥ କେନ୍ଦ୍ର ସ୍ଥାପନ ହୋଇଛି। ୪୨୪ ସଖି ବୁଥ କରାଯାଇଛି। ୨୬ ମହିଳା ଲିଡ ବୁଥ ଏବଂ ୩୯ ଯୁବ ବୁଥ ଏବଂ ୧୩ଟି ଦିବ୍ୟାଙ୍ଗ ମାନଙ୍କ ପାଇଁ ବୁଥ କରାଯାଇଛି। ପ୍ରାର୍ଥୀମାନେ ସୁବିଧା ନାମକ ଡିଜିଟାଲ ଆପ ଜରିଆରେ ପ୍ରାର୍ଥୀ ପତ୍ର ଦାଖଲ ସଭା ସମିତି ଅନୁମତି ପାଇବାର ବ୍ୟବସ୍ଥା କରାଯାଇଛି। ୮୫ବର୍ଷରୁ ଊର୍ଦ୍ଧ୍ୱ ଭୋଟର ସ୍ବତନ୍ତ୍ର ଭାବେ ଘରେ ରହି ଭୋଟଦାନ ବ୍ୟବସ୍ଥା ରହିଛି। ଭୋଟ ଗ୍ରହଣ ପାଇଁ ୨୨ ହଜାର ୧୫୨ ପୋଲିଙ୍ଗ ଅଫିସର ନିଯୁକ୍ତ ପାଇଛନ୍ତି। ନିର୍ବାଚନ ପରିଚାଳନା ପାଇଁ ନିର୍ବାଚନ ଖର୍ଚ୍ଚ ମନିଟରିଙ୍ଗ ଟିମ ଗଠନ ହୋଇଛି। ଏଥିପାଇଁ ୪୩ ଫ୍ଲାଇଙ୍ଗ ସ୍କୁଆର୍ଡ, ୪୩ ଷ୍ଟାଟିକ ସର୍ଭେଲାନ୍ସ ଟିମ ଓ ୩୯ ଭିଡିଓ ସର୍ଭେଲାନ୍ସ ଟିମ, ୧୯ ଖର୍ଚ୍ଚ ପର୍ଯ୍ୟବେକ୍ଷକଙ୍କୁ ନିଯୁକ୍ତି ଦିଆଯାଇଛି ଏହି ଖବରଦାତା ସମ୍ମିଳନୀରେ ଜିଲା ସୂଚନା ଓ ଲୋକସମ୍ପର୍କ ଅଧିକାରୀ ରବି ନାରାୟଣ ବେହେରା ଉପସ୍ଥିତ ଥିଲେ।
