ଜେନାପୁର, ୯ା୫(ଡି.ଏନ.ଏ.): ସରକାରଙ୍କ ପକ୍ଷରୁ ଭିନ୍ନକ୍ଷମମାନଙ୍କୁ ଚିହ୍ନଟ କରି ସେମାନଙ୍କୁ ବିଭିନ୍ନ ସୁବିଧା ସୁଯୋଗ ପ୍ରଦାନ କରିବାର ବ୍ୟବସ୍ଥା ଅଛି। ହେଲେ ବିଭାଗୀୟ ଅଧିକାରୀମାନେ ଏଥିରେ ଅବହେଳା କରୁଥିବାରୁ ଭିନ୍ନକ୍ଷମ ବ୍ୟକ୍ତି ଓ ସେମାନଙ୍କ ପରିବାର ଲୋକେ ହଇରାଣ ହେଉଛନ୍ତି। ଏଭଳି ଏକ ଘଟଣା ଦେଖିବାକୁ ମିଳିଛି ଯାଜପୁର ଜିଲା ଧର୍ମଶାଳା ବ୍ଲକ ଏଣ୍ଡଳବା ପଞ୍ଚାୟତ ଅଧୀନ ପୋତୁଅ ଗ୍ରାମରେ। ଉକ୍ତ ଗାଁର ବିଦ୍ୟାଧର ଦେହୁରୀ(୩୮) ଜନ୍ମରୁ ପୋଲିଓ ଆକ୍ରାନ୍ତ। ୨୦୨୨ରେ ସ୍ବାସ୍ଥ୍ୟ ବିଭାଗ ପକ୍ଷରୁ ତାଙ୍କୁ ମିଳିଥିବା ପ୍ରମାଣପତ୍ର ଅନୁଯାୟୀ ସେ ୯୦ ପ୍ରତିଶତ ଭିନ୍ନକ୍ଷମ। ସେ ଠିକ୍ ଭାବେ ଚାଲିପାରୁ ନାହାନ୍ତି। ସେଥିପାଇଁ ସେ ବିଭିନ୍ନ କାମ ପାଇଁ ବୃଦ୍ଧା ମା’ଙ୍କ ଉପରେ ନିର୍ଭର କରୁଛନ୍ତି। ବାପା ଗତ ୧୮ ବର୍ଷ ହେବ ଆରପାରିକୁ ଚାଲିଯିବା ପରେ ପରିବାର ଏକମାତ୍ର ରୋଜଗାରିଆ ସାନ ଭାଇଙ୍କର ବି ଗତ ୧୦ ବର୍ଷ ତଳେ ପରଲୋକ ଘଟିଛି। ଏବେ ବୃଦ୍ଧା ମା’ଶୁଆ ଦେଇ(୬୫) ବିଦ୍ୟାଧରଙ୍କ ପାଇଁ ସାହା ଭରସା ସାଜିଛନ୍ତି। ଶୁଆଙ୍କୁ ସରକାର ତରଫରୁ ଭତ୍ତା ବାବଦରେ ୫୦୦ ଟଙ୍କା ଓ ୧୦ କେଜି ଚାଉଳ ମିଳୁଛି। ହେଲେ ସେଥିରେ ୨ ପ୍ରାଣୀ ଚଳିବା ସମ୍ଭବ ହେଉନାହିଁ। ଫଳରେ ମା’ପୁଅ ଗାଁ ଦାଣ୍ଡରେ ଅନ୍ୟକୁ ହାତ ପତାଇ ଯାହା ପାଉଛନ୍ତି ସେଥିରେ ଚଳିବାକୁ ବାଧ୍ୟ ହେଉଛନ୍ତି। ଏପରି ସ୍ଥିତିରେ ବିଦ୍ୟାଧରଙ୍କୁ ଆଜି ପର୍ଯ୍ୟନ୍ତ ଭିନ୍ନକ୍ଷମ ଭତ୍ତା ମିଳୁନାହିଁ। ଏଥିପାଇଁ ଜଣେ ବାବୁଙ୍କ ସହାୟତରେ ସେ ଅନ୍ଲାଇନ୍ରେ ଆବେଦନ କରିଥିଲେ। ପଞ୍ଚାୟତ ଅଫିସ ଦୌଡି ଦୌଡ଼ି ନୟାନ୍ତ ହେଲେଣି। କେହି ତାଙ୍କ କଥା ଶୁଣୁନାହାନ୍ତି ବୋଲି ବିଦ୍ୟାଧର କରିଛନ୍ତି। ଗାଁ ସାରା ବୁଲି ମାଗିବା ପରେ ଯାହା ମିଳେ ସେଥିରେ ଆମେ ମା’ପୁଅ ଚଳୁ। ଦେହପା ଅସୁସ୍ଥ ହେଲେ ସାହି ପଡ଼ିଶାଙ୍କ ଉପରେ ନିର୍ଭର କରିବାକୁ ପଡୁଛି ବୋଲି ବୋଲି ଛଳ ଛଳ ଆଖିରେ କହିଛନ୍ତି ଶୁଆ ଦେଇ ଏଭଳି ଅବସ୍ଥାରେ ବ୍ଲକ୍ ପକ୍ଷରୁ ବିଦ୍ୟାଧରଙ୍କୁ ମିଳିନାହିଁ ତିନିଚକିଆ ସାଇକେଲ, ଆବାସ ଗୃହ, ଏପରି କି ବ୍ୟାଙ୍କରୁ ଭିନ୍ନକ୍ଷମଙ୍କ ଲାଗି ଆର୍ଥିକ ସହାୟତା ଯୋଗାଇଦେବାର ବ୍ୟବସ୍ଥା ରହିଥିଲେ ମଧ୍ୟ ବିଦ୍ୟାଧରଙ୍କ ପାଇଁ ସବୁ ସ୍ବପ୍ନ ପାଲଟିଛି। ଏ ସଂକ୍ରାନ୍ତରେ ସାମାଜିକ ସୁରକ୍ଷା ଅଧିକାରୀ ତାପସ କୁମାର ବେହେରାଙ୍କୁ ପଚାରିବାରୁ ସେ କହିଛନ୍ତି, ତାଙ୍କୁ ଖୁବ୍ ଶୀଘ୍ର ଭତ୍ତା ପ୍ରଦାନର ବ୍ୟବସ୍ଥା କରାଯିବ।
