ଦିଗପହଣ୍ଡି,୮।୨(ଅଶେଷ ନାଥ ମିଶ୍ର): ଗଞ୍ଜାମ ଜିଲା ଦିଗପହଣ୍ଡି ବ୍ଲକ ବଜାପଲ୍ଲୀ ଗାଁ ଛକ ନିକଟରେ ରବିବାର ଏକ ମୁଖ୍ୟମନ୍ତ୍ରୀ ସରକାରୀ ବସ୍(ନଂ. ଓଡ଼ି୩୨କେ -୧୮୦୯) ଧକ୍କାରେ ଜଣେ ବୃଦ୍ଧାଙ୍କ ମୃତ୍ୟୁ ଘଟିଛି। ମୃତକ ହେଲେ ଦିଗପହଣ୍ଡି ବ୍ଲକ ଝରିପଦର ଗ୍ରାମର କେ. ଶାଶୁଲୁ ରେଡ୍ଡୀ(୭୫)।
ବଜାପଲ୍ଲୀ ଗାଁ ଛକରେ ବୃଦ୍ଧାଙ୍କ ପୁଅ ଘରକରି ରହୁଛନ୍ତି। ବୃଦ୍ଧା ଜଣକ ପୁଅ ଘରକୁ ବୁଲିବାକୁ ଆସିଥିଲେ। ରବିବାର ସେ ଗାଁକୁ ଯିବାପାଇଁ ବସ୍କୁ ଅପେକ୍ଷା କରିଥିଲେ। ବସ୍ ଦିଗପହଣ୍ଡିରୁ ଭାୟା ଗୋକର୍ଣ୍ଣପୁର ଦେଇ ବି. ତୁରୁବୁଡ଼ି ଗାଁକୁ ଯାଉଥିବା ବେଳେ ବସ୍ ବୃଦ୍ଧାଙ୍କୁ ଧକ୍କା ଦେଇଥିଲା। ତାଙ୍କୁ ଗୁରୁତର ଅବସ୍ଥାରେ ଦିଗପହଣ୍ଡି ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ଭର୍ତ୍ତି କରାଯାଇଥିଲା।
ପ୍ରାଥମିକ ଚିକିତ୍ସା ପରେ ଅବସ୍ଥା ଗୁରୁତର ହେବାରୁ ତାଙ୍କୁ ବ୍ରହ୍ମପୁର ବଡ଼ ଡାକ୍ତରଖାନା ସ୍ଥାନାନ୍ତର କରାଯାଇଥିଲା। ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ। ଦୁର୍ଘଟଣାଗସ୍ତ ବସ୍କୁ ଘଟଣାସ୍ଥଳରେ ଲୋକେ ଅଟକ ରଖିଥିଲେ। ଏନେଇ ଘଟଣାସ୍ଥଳରେ ଉତ୍ତେଜନା ପରିସ୍ଥିତି ସୃଷ୍ଟି ହୋଇଥିଲା।
ଖବର ପାଇ ଦିଗପହଣ୍ଡି ଥାନା ଏଏସ୍ଆଇ କହ୍ନେଇ ର୍ମିଦ୍ଧା ସଦଳବଳେ ଘଟଣାସ୍ଥଳରେ ପହଞ୍ଚି ଲୋକଙ୍କୁ ବୁଝାସୁଝା କରିବା ସହ ବସ୍କୁ ଜବତ କରି ଥାନାକୁ ନେଇ ଥିଲେ। ପରେ ପୋଲିସ ବ୍ରହ୍ମପୁର ବଡ଼ ଡାକ୍ତରଖାନାରେ ପହଞ୍ଚି ମୃତଦେହ ଜବତ କରିଛି। ସୋମବାର ମୃତଦେହ ବ୍ୟବଚ୍ଛେଦ କରାଯିବ ବୋଲି ଭାରପ୍ରାପ୍ତ ଆଇଆଇସି ତଥା ଡିଏସ୍ପି ପ୍ରଶାନ୍ତ ପାତ୍ର କହିଛନ୍ତି।
