ଜେନେଭା,୩ା୬: ଚଳିତ ଜୁନ୍ରୁ ଆଗାମୀ ଅଗଷ୍ଟ ମାସ ମଧ୍ୟରେ ଏଲ୍ନିନୋ ସୃଷ୍ଟି ହେବାର ୮୦ ପ୍ରତିଶତ ଆଶଙ୍କା ରହିଛି ବୋଲି ମଙ୍ଗଳବାର ବିଶ୍ୱ ପାଣିପାଗ ସଙ୍ଗଠନ(ଡବ୍ଲ୍ୟୁଏମ୍ଓ) ସୂଚିତ କରିଛି। ଏହାର ପ୍ରଭାବରେ ସାଧାରଣ ପାଣିପାଗ ବିଗିଡ଼ିଯିବ। ଫଳରେ ଅତ୍ୟଧିକ ଉତ୍ତାପ ଓ ବର୍ଷାର ଆଶଙ୍କା ରହିଛି। ‘ଏଲ୍ନିନୋ ପାଇଁ ପ୍ରସ୍ତୁତ ରୁହନ୍ତୁ’ ଶୀର୍ଷକ ଏକ ସଦ୍ୟତମ ସୂଚନାରେ ଡବ୍ଲ୍ୟୁଏମ୍ଓ ପକ୍ଷରୁ ଏଭଳି କୁହାଯାଇଛି। ଏଲ୍ନିନୋ ଏକ ସମୁଦ୍ର-ବାୟୁମଣ୍ଡଳୀୟ ପ୍ରକ୍ରିୟା, ଯେଉଁଠାରେ ବିଷୁବରେଖା ଏବଂ କେନ୍ଦ୍ରୀୟ ପ୍ରଶାନ୍ତ ମହାସାଗରର ପୃଷ୍ଠଭାଗର ଜଳ ସାଧାରଣ ଅପେକ୍ଷା ଅଧିକ ଉତ୍ତପ୍ତ ରହିଥାଏ। ଏହି ପ୍ରକ୍ରିୟା ବିଶ୍ୱର ତାପମାତ୍ରା ଏବଂ ବର୍ଷାକୁ ପ୍ରଭାବିତ କରିବ। ଏଲ୍ନିନୋ ସ୍ଥିତି ପ୍ରାୟ ୨ ବର୍ଷ ପର୍ଯ୍ୟନ୍ତ ରହିପାରେ ଏବଂ ସାଧାରଣତଃ ଶୀତ ମାସଗୁଡ଼ିକରେ ଏହା ଶୀର୍ଷକୁ ଛୁଇଁଥାଏ। ଜଙ୍ଗଲ ଭଳି ମହାସାଗରଗୁଡ଼ିକ ମଧ୍ୟ ବଡ଼ ଉତ୍ତାପ ଶୋଷକ ଅଟନ୍ତି। କିନ୍ତୁ ଯେତେବେଳେ ଉତ୍ତାପ ଅତ୍ୟଧିକ ହୋଇଯାଏ, ଏହା ଲାଭ ଅପେକ୍ଷା ଅଧିକ କ୍ଷତି କରିଥାଏ। ତେବେ ଏଭଳି ଉତ୍ତପ୍ତ ହେବାର ମୁଖ୍ୟ କାରଣଗୁଡ଼ିକ ମଧ୍ୟରୁ ଅନ୍ୟତମ ହେଉଛି କ୍ରାନ୍ତୀୟ ପ୍ରଶାନ୍ତ ମହାସାଗରରେ ଅସ୍ବାଭାବିକ ଭାବେ ଗରମ ଥିବା ସମୁଦ୍ର ଭିତରର ସ୍ଥିତି। ସାଧାରଣ ଅପେକ୍ଷା ୬ ଡିଗ୍ରୀ ସେଲ୍ସିୟସ୍ରୁ ଅଧିକ ତାପମାତ୍ରା ଏକ ବଡ଼ ଧରଣର ଉତ୍ତାପର ଭଣ୍ଡାର ସୃଷ୍ଟି କରୁଥିଲା,ଫଳରେ ସମୁଦ୍ର ପୃଷ୍ଠ ଗରମ ହେଉଥିବା ଦେଖିବାକୁ ମିଳୁଛି। ବିକଶିତ ହେଉଥିବା ଏଲ୍ନିନୋ ଏବଂ ଏହାର ସମ୍ଭାବ୍ୟ ପ୍ରଭାବ ବିଷୟରେ ବିଶ୍ୱକୁ ଦେଇଥିବା ନିଜ ବାର୍ତ୍ତାରେ ଜାତିସଂଘ ମହାସଚିବ ଆଣ୍ଟୋନିଓ ଗୁଟେରସ କହିଛନ୍ତି, ‘ଏଲ୍ନିନୋ ଆସନ୍ତା ମାସଗୁଡ଼ିକରେ ୯୦% ନିଶ୍ଚିତତା ସହ ଆମ ଦୁଆର ମୁହଁରେ ପହଞ୍ଚୁଛି। ବିଶ୍ୱ ଏହାକୁ ଏକ ଜରୁରିକାଳୀନ ଜଳବାୟୁ ଚେତାବନୀ ଭାବରେ ଗ୍ରହଣ କରିବା ଉଚିତ। ଏଲ୍ନିନୋ ସ୍ଥିତି ଉତ୍ତପ୍ତ ହେଉଥିବା ବିଶ୍ୱର ନିଆଁରେ ଘିଅ ଢାଳିବ। ଏଲ୍ନିନୋ ସଦର୍ନ ଅସିଲେଶନ(ଇଏନ୍ଏସ୍ଓ)ର ପର୍ଯ୍ୟାୟ, ଯାହା କ୍ରାନ୍ତୀୟ ପ୍ରଶାନ୍ତ ମହାସାଗରରେ ସମୁଦ୍ରର ତାପମାତ୍ରା ଏବଂ ବାୟୁମଣ୍ଡଳୀୟ ଚାପ ମଧ୍ୟରେ ଥିବା ପାରସ୍ପରିକ ସମ୍ପର୍କକୁ ଦର୍ଶାଇଥାଏ, ତାହା ରିଲେଟିଭ ଓସେନିକ ନିନୋ ଇଣ୍ଡେକ୍ସର ମୂଲ୍ୟ ଦ୍ୱାରା ନିର୍ଦ୍ଧାରିତ ହୁଏ। ଏହି ସୂଚକାଙ୍କ ହେଉଛି ସାଧାରଣ ତାପମାତ୍ରା ତୁଳନାରେ ସମୁଦ୍ର ପୃଷ୍ଠର ତାପମାତ୍ରାର ପରିବର୍ତ୍ତନ ମୂଲ୍ୟ, ଯାହା ବିଷୁବରେଖା ପ୍ରଶାନ୍ତ ମହାସାଗରରେ ଥିବା ନିନୋ ୩.୪ ଅଞ୍ଚଳ (୫୦ ଉତ୍ତର-୫୦ ଦକ୍ଷିଣ, ୧୨୦୦-୧୭୦୦ ପଶ୍ଚିମ) ରେ ମପାଯାଏ। ଯେତେବେଳେ ଏହି ମୂଲ୍ୟ ଶୂନ(ଜିରୋ) ଡିଗ୍ରୀ ସେଲ୍ସିୟସ୍ ହୁଏ, ଏହାକୁ ଇଏନ୍ଏସ୍ଓ ନିରପେକ୍ଷ (ନ୍ୟୁଟ୍ରାଲ) କୁହାଯାଏ। ଅଧିକ ଗରମ ତାପମାତ୍ରା ଏବଂ +୦.୫୦ରୁ ଅଧିକ ମୂଲ୍ୟ ଏଲ୍ନିନୋ ସ୍ଥିତିକୁ ଦର୍ଶାଉଥିବାବେଳେ -୦.୫୦ସେଲସିୟସ୍ରୁ କମ୍ ଥଣ୍ଡା ସମୁଦ୍ର ପୃଷ୍ଠର ତାପମାତ୍ରାର ଅର୍ଥ ହେଉଛି ଲାନିନା। ଫେବୃଆରୀ-ଏପ୍ରିଲ ମାସ ପାଇଁ ସର୍ବଶେଷ ସୂଚକାଙ୍କ ମୂଲ୍ୟ -୦.୫୦ସେଲ୍ସିୟସ୍ । ଏପ୍ରିଲ ମାସ ଶେଷରୁ ମେ’ ମାସ ମଧ୍ୟଭାଗ ପର୍ଯ୍ୟନ୍ତ ମପାଯାଇଥିବା ସମୁଦ୍ର ପୃଷ୍ଠର ତାପମାତ୍ରାରେ ବୃଦ୍ଧି ପରିଲକ୍ଷିତ ହୋଇଛି, ଏଥିଯୋଗୁ ଏଲ୍ନିନୋର ସୀମା ପାଖେଇ ଆସୁଥିବା ବିଶ୍ୱ ପାଣିପାଗ ସଙ୍ଗଠନ କହିଛି।