ମୁମ୍ବାଇ,୨୮।୧୧: ଯଦି ଏକନାଥ ସିନ୍ଦେ ନୁହନ୍ତି, ତେବେ ମହାରାଷ୍ଟ୍ରର ଆଗାମୀ ମୁଖ୍ୟମନ୍ତ୍ରୀ କିଏ ହେବ? ଦେବେନ୍ଦ୍ର ଫଡନାଭିସ ଏହି ଦୌଡରେ ସବୁଠାରୁ ଆଗରେ ଥିବା କୁହାଯାଉଛି। ହେଲେ ଯଦି ଶିନ୍ଦେ ମୁଖ୍ୟମନ୍ତ୍ରୀ ନ ହୁଅନ୍ତି ତେବେ ତାଙ୍କ ଭୂମିକା କ’ଣ ରହିବ ସେନେଇ ଆଲୋଚନା କରାଯାଉଛି। ଯଦି ସେ ଭାଜପା ଉପରେ ଖପ୍ପା ହୋଇଯାଆନ୍ତି ତେବେ ଏହାର ପ୍ରଭାବ ଦଳ ଉପରେ କ’ଣ ପଡ଼ିବ? ମହାରାଷ୍ଟ୍ର ରାଜନୀତି ବ୍ୟତୀତ ଲୋକ ସଭାରେ ଶିନ୍ଦେଙ୍କ ଦଳର ପ୍ରମୁଖ ଯୋଗଦାନ ରହିଛି। ଏମିତିରେ ଯଦି ତାଙ୍କୁ ଅଣଦେଖା କରାଯାଏ ତେବେ ମୋଦି ସରକାର ଦୁର୍ବଳ ହୋଇପାରନ୍ତି।
କେନ୍ଦ୍ରରେ ବର୍ତ୍ତମାନ ଭାଜପା ନେତୃତ୍ୱାଧୀନ ଏନ୍ଡିଏ ସରକାର ଅଛି। ଏଥିରେ ଶିନ୍ଦେଙ୍କ ଶିବସେନାର ୭ ଏମ୍ପି ଅଛନ୍ତି। ଯଦି ଗଣିତକୁ ବୁଝାଯାଏ ତେବେ ମୋଦି ସରକାରରେ ମୋଟ ୨୯୨ ଏମ୍ପି ଅଛନ୍ତି। ସଂସଦରେ ମୋଟ ୫୪୩ ସଦସ୍ୟ ନିର୍ବାଚିତ ହୋଇ ପହଞ୍ଚନ୍ତି। ବହୁମତ ଲାଗି ୨୭୨ ଏମ୍ପିଙ୍କ ଆବଶକତା ରହିଛି। ଏହି ଅଙ୍କରୁ ଅଧିକ ୨୦ ଏମ୍ପି ଏନ୍ଡିଏ ପକ୍ଷରେ ଅଛନ୍ତି।
ଏଣୁ ଯଦି ଏକନାଥ ଶିନ୍ଦେ ମୁଖ୍ୟମନ୍ତ୍ରୀ ନ ହୁଅନ୍ତି ତେବେ ତାଙ୍କ ସହ ଦଳକୁ କ’ଣ ମିଳିବ?ଶିବସେନା ନିକଟରେ ମହାରାଷ୍ଟ୍ରରେ ୫୭ ବିଧାୟକ ଅଛନ୍ତି। ହେଲେ ଲୋକ ସଭାରେ ମୋଟ ୭ ସଦସ୍ୟ ଅଛନ୍ତି। ମୁଖ୍ୟମନ୍ତ୍ରୀ ପଦ ଯିବା ପରେ ଏବେ ଶିନ୍ଦେ କେନ୍ଦ୍ରକୁ ଯାଇପାରନ୍ତି। ତାଙ୍କୁ ମୋଦି ସରକାରରେ ମନ୍ତ୍ରୀ ପଦ ମିଳିପାରେ ବୋଲି କୁହାଯାଉଛି। ସେହିଭଳି ତାଙ୍କ ପୁଅ ଶ୍ରୀକାନ୍ତ ଶିନ୍ଦେଙ୍କୁ ମହାରାଷ୍ଟ୍ରରେ ଉପମୁଖ୍ୟମନ୍ତ୍ରୀ ପଦ ଦିଆଯାଇପାରେ। ଏଭଳି ଅନେକ ଦାବି କରାଯାଉଥିବା ବେଳେ ଯଦି ସେ ଖପ୍ପା ହୋଇ ଭାଜପାରୁ ଅଲଗା ହୋଇଯାଆନ୍ତି ତେବେ କେନ୍ଦ୍ରରେ ମୋଦି ସରକାର ଦୁର୍ବଳ ହୋଇଯିବ, ପରେ ନୀତୀଶ କୁମାର ଏବଂ ଚନ୍ଦ୍ରବାବୁ ନାଇଡୁ ବାଜି ପଲଟାଇଦେବାର ଭୟ ରହିଛି। ସେ ଯାହା ବି ହେଉ ରାଜନୀତିରେ କିଛି ବି ସମ୍ଭବ, ଆଗାମୀ ଦିନରେ ସବୁକିଛି ସ୍ପଷ୍ଟ ହୋଇଯିବ।
ଶିନ୍ଦେ ରାଜ୍ୟର ନୂଆ ସରକାରରେ ଉପମୁଖ୍ୟମନ୍ତ୍ରୀ ପଦକୁ ସମ୍ଭବତଃ ସ୍ବୀକାର ନ କରିପାରନ୍ତି। କାରଣ ତାଙ୍କର ନିକଟତର ସଞ୍ଜୟ ଶିରସାଟ୍ ଏହା କହିଛନ୍ତି। ଅପରପକ୍ଷେ ଶିନ୍ଦେ ଭାଜପାର ନିଷ୍ପତ୍ତିକୁ ମାନିନେବେ ବୋଲି ସଫାସଫା କହିଦେଇଛନ୍ତି।
