ଜଗତ୍ସିଂହପୁର ଅଫିସ, ୧୧।୪: ଜଗତ୍ସିଂହପୁର ସହରରେ ବୟସ୍କଙ୍କ ପାଇଁ କୌଣସି ପାର୍କ ନାହିଁ। ପିଲାମାନଙ୍କ ପାଇଁ ଜିଲାପାଳଙ୍କ କାର୍ଯ୍ୟାଳୟ ପରିସରରେ ଥିବା ଏକତା ଶିଶୁ ଉଦ୍ୟାନଟି ଜରାଜୀର୍ଣ୍ଣ ଅବସ୍ଥାରେ ରହିଛି। ଫଳରେ ପିଲାଙ୍କ ମନୋରଞ୍ଜନରେ ବାଧା ସୃଷ୍ଟି ହୋଇଛି।
ଏମ୍ପିଙ୍କ ଆଞ୍ଚଳିକ ଉନ୍ନୟନ ପାଣ୍ଠି ଓ ପିପିଏଲ୍ ଆର୍ଥିକ ସହାୟତାରେ ୩୧ା୮ା୨୦୦୬ରେ ଏହି ଉଦ୍ୟାନ ଖୋଲି ଥିଲା। ତତ୍କାଳୀନ ବିଦ୍ୟାଳୟ ଓ ଗଣଶିକ୍ଷା ମନ୍ତ୍ରୀ ସ୍ବର୍ଗତ ବିଷ୍ଣୁ ଚରଣ ଦାସଙ୍କ ଦ୍ୱାରା ଏହା ଉଦ୍ଘାଟିତ ହୋଇଥିଲା। ସେତେବେଳେ ମୁଖ୍ୟଅତିଥି ଏମ୍ପି ସ୍ବର୍ଗତ ବ୍ରହ୍ମାନନ୍ଦ ପଣ୍ଡା ଓ ସମ୍ମାନିତ ଅତିଥି ଭାବେ ଜିଲାପାଳ ସତ୍ୟବ୍ରତ ସାହୁ, ଜଗତ୍ସିଂହପୁର ପୌରାଧ୍ୟକ୍ଷା ମିନତି ଦାସ ଓ ପିପିଏଲ୍ ଉପସଭାପତି ରାଜେନ୍ଦ୍ର ମୋହନ ମଲ୍ଲିକ ଯୋଗ ଦେଇଥିଲେ। ସହରରେ ପିଲାମାନଙ୍କ ପାଇଁ ପ୍ରଥମ ପାର୍କ ହୋଇଥିବାରୁ ଲୋକଙ୍କ ମନରେ ସେତେବେଳେ ଖୁସି ପରିଲକ୍ଷିତ ହୋଇଥିଲା। ଏହାର ୯ବର୍ଷ ପରେ ଅର୍ଥାତ୍ ୧ା୧ା୨୦୧୫ରେ ଜଗତ୍ସିଂହପୁର ବିଧାୟକ ତଥା ବିରୋଧୀ ଦଳ ଉପନେତା ଚିରଞ୍ଜୀବ ବିଶ୍ୱାଳ, ତତ୍କାଳୀନ ଜିଲାପାଳ, ଜଗତ୍ସିଂହପୁର ପୌରାଧ୍ୟକ୍ଷ ବିପ୍ଳବ ଚୌଧୁରୀ, ୧୬ନଂ. ୱାର୍ଡ କାଉନସିଲର, ଉପାଧ୍ୟକ୍ଷଙ୍କ ଉପସ୍ଥିତିରେ ପୁନରୁଦ୍ଧାର ଓ ନବୀକରଣ କାର୍ଯ୍ୟର ଉଦ୍ଘାଟନ ହୋଇଥିଲା। ୨୦୦୬ରୁ ଏଥିମଧ୍ୟରେ ପାର୍କରେ ବହୁ ଟଙ୍କା ବ୍ୟୟ କରାଯାଇଛି। କିନ୍ତୁ ଦୁଃଖର କଥା ହେଲା ଏବେ ଏହା ଭିତରେ ପିଲାମାନେ ଖେଳିବା ସତେ ଯେପରି ବିପଦଜନକ ହୋଇପଡିଛି।
ଏହାର ପରିସରରେ ବିଦ୍ୟୁତ୍ ବୋର୍ଡଟ ଉପରେ କଭର ନାହିଁ। କୌଣସି ଶିଶୁର ଯଦି ଅଜ୍ଞାତରେ ହାତ କି ଗୋଡ ବାଜିଯାଏ ତେବେ ଜୀବନ ପ୍ରତି ବିପଦ ରହିଛି। ଏହା ଜାଣି ମଧ୍ୟ ପୌର କର୍ତ୍ତୃପକ୍ଷ ଚିନ୍ତା ନ କରିବା ଯନ୍ତ୍ରଣାଦାୟକ। କେବଳ ଏତିକି ନୁହେଁ, ପାର୍କ ପରିସରରେ ଥିବା ୪ଟି ଦୋଳି ମଧ୍ୟ ଯେକୌଣସି ସମୟରେ ଛିଣ୍ଡିପଡ଼ିବା ନେଇ ଆଶଙ୍କା ରହିଛି। କାରଣ ଦୀର୍ଘ ବର୍ଷ ହେବ ଲୌହ ଷ୍ଟାଣ୍ଡ ଓ ଚେନ୍ରେ ରଙ୍ଗ ଲାଗି ନ ଥିବାରୁ ଏଥିରେ କଳଙ୍କି ଖାଇଗଲାଣି। ପିଲାମାନେ ଶିଡିରେ ଚଢି ପ୍ଲାଷ୍ଟିକ ଖସଡାରେ ଖସିବାକୁ ବହୁତ ଭଲ ପାଆନ୍ତି। ମାତ୍ର ଏଭଳି ଥିବା ୩ଟିରୁ ୨ଟି ଖସଡା ଏକପ୍ରକାର ଅଦରକାରୀ ହୋଇପଡ଼ିଛି। ଗୋଟିଏରେ ପ୍ଲାଷ୍ଟିକ ଖସଡା ଭାଙ୍ଗି ପଡ଼ିବାରୁ ତାହା କାଢ଼ି ଦିଆଯାଇଛି। ଅନ୍ୟଟିର ପ୍ଲାଷ୍ଟିକ ଖସଡା ସଂଯୋଗ କରୁଥିବା ଅର୍ଥାତ୍ ପିଲାମାନେ ଛିଡା ହେବାପାଇଁ ଥିବା ଲୌହ ପ୍ଲେଟ୍ଟି କଳଙ୍କି ଖାଇ ଖାଲ ହୋଇଯାଇଛି। ଫଳରେ ଏହା ବ୍ୟବହାର ଉପଯୋଗୀ ନୁହେଁ। ପାର୍କ ପରିସରରେ ଆରମ୍ଭରୁ ହାତୀ ମୁଣ୍ଡ ଚିତ୍ର ଥାଇ ସିମେଣ୍ଟରେ ଏକ ଖସଡା କରାଯାଇଥିଲା। ଦୁଃଖର କଥା ହେଲା ଏହାର ମରାମତି କିମ୍ବା ରଙ୍ଗ ନ ହେବାରୁ ପିଲାମାନେ ଖସୁଥିବା ଚିକ୍କଣ ଅଂଶ କ୍ଷତିଗ୍ରସ୍ତ ହୋଇଛି। ଏଥିରେ ପିଲାମାନେ ଖସୁଥିବାବେଳେ ପ୍ୟାଣ୍ଟ, ସାର୍ଟ ଚିରିଯିବା ସହ କ୍ଷତାକ୍ତ ହେଉଥିବା କୁହାଯାଉଛି। ପାର୍କ ପରିସରରେ ଆବଶ୍ୟକ ଆଲୋକୀକରଣ ବ୍ୟବସ୍ଥା କରାଯାଉ ନ ଥିବାରୁ ବାସ୍ତବ ଲକ୍ଷ୍ୟ ପୂରଣ ହୋଇପାରୁନାହିଁ। ତେଣୁ ତୁରନ୍ତ ଏହା ଉପରେ ପଦକ୍ଷେପ ନିଆ ନ ଗଲେ ଆଉ କିଛି ଦିନ ପରେ ଏକତା ଶିଶୁ ଉଦ୍ୟାନରେ କାଉ ଉଡିବା ଭଳି ପରିସ୍ଥିତିକୁ ଏଡ଼ାଇ ଦିଆଯାଇ ନ ପାରେ ବୋଲି ସାଧାରଣରେ ଅଭିଯୋଗ ହେଉଛି।
ଏ ସମ୍ପର୍କରେ ନବନିର୍ବାଚିତ ପୌରାଧ୍ୟକ୍ଷା ଅର୍ଚ୍ଚନା ସିଂହ କହିଛନ୍ତି, ସେ ନୂଆକରି ଦାୟିତ୍ୱ ନେଇଛନ୍ତି। ପୌରାଞ୍ଚଳରେ ଯାହା କିଛି ଅଭାବ, ଅସୁବିଧା ରହିଛି ସେସବୁ ଦୂର ପାଇଁ ପଦକ୍ଷେପ ନିଆଯିବ।
