ଏସ୍ଏଚ୍ଜିଙ୍କୁ ସ୍ବାବଲମ୍ବୀ କରିଛି ଅଣ୍ଡାଦିଆ କୁକୁଡ଼ା ପାଳନ କେନ୍ଦ୍ର
08 ଫୁଲବାଣୀ ଅଫିସ,୨୭ା୫: ରାଜ୍ୟ ସରକାର ମହିଳାମାନଙ୍କୁ ସ୍ବାବଲମ୍ବୀ କରିବାକୁ ମହିଳା ସ୍ବୟଂ ସହାୟିକା ଗୋଷ୍ଠୀ (ଏସ୍ଏଚ୍ଜି) ମାଧ୍ୟମରେ ବିଭିନ୍ନ ପ୍ରକାର ସହାୟତା ଯୋଗାଇ ଦେଉଛନ୍ତି। ଏହି ପରିପ୍ରେକ୍ଷୀରେ କନ୍ଧମାଳ ଜିଲା ବାଲିଗୁଡା ସମନ୍ବିତ ଆଦିବାସୀ ଉନ୍ନୟନ ସଂସ୍ଥା ପକ୍ଷରୁ ୬ଟି ବ୍ଲକରେ ୧୧ଟି ଅଣ୍ଡାଦିଆ କୁକୁଡା ପାଳନ କେନ୍ଦ୍ର ସ୍ଥାପନ କରାଯାଇ ଏହାକୁ ଏସ୍ଏଚ୍ଜିଙ୍କୁ ହସ୍ତାନ୍ତର କରାଯାଇଛି। ମହିଳାମାନେ ଆତ୍ମ ନିର୍ଭରଶୀଳ ହେବା ନିମନ୍ତେ ୨୦୨୩-୨୪ ଆର୍ଥିକ ବର୍ଷରେ ଜିଲାପାଳ ଆଶିଷ ଇଶ୍ୱର ପାଟିଲଙ୍କ ନିର୍ଦ୍ଦେଶରେ ବାଲିଗୁଡା ସମନ୍ବିତ ଆଦିବାସୀ ଉନ୍ନୟନ ସଂସ୍ଥା ତତ୍ୱାବଧାନରେ ପ୍ରାଣୀ ସମ୍ପଦ ବିକାଶ ଓ ଓଡିଶା ଜୀବୀକା ମିଶନ ସହଭାଗିତାରେ ବାଲିଗୁଡା, କ.ନୂଆଗାଁ, ଚକାପାଦ, ତୁମୁଡିବନ୍ଧ, କୋଟଗଡ, ଦାରିଙ୍ଗିବାଡି ବ୍ଲକରେ ଅଣ୍ଡାଦିଆ କୁକୁଡା ପାଳନ କାର୍ଯ୍ୟକ୍ରମ ଆରମ୍ଭ ହୋଇଛି। ପ୍ରଥମ ପର୍ଯ୍ୟାୟରେ ୬ଟି ବ୍ଲକରେ ୧୧ଟି ଅଣ୍ଡାଦିଆ କୁକୁଡା ପାଳନ କେନ୍ଦ୍ର ସ୍ଥାପନ କରାଯାଇଛି ା ପ୍ରତ୍ୟେକ ଅଣ୍ଡା ଦିଆ କୁକୁଡା ପାଳନ କେନ୍ଦ୍ରରେ କୁକୁଡା ଘର ମରାମତି, ବୋରୱେଲ ଖନନ, ବୁଦ୍ୟୁତ୍ ସଂଯୋଗୀକରଣ, ୧୦୦୦ କୁକୁଡା କ୍ଷମତା ବିଶିଷ୍ଟ କେଜ ଯୋଗାଣ, ୧୪ ସପ୍ତାହ ଅବଧିରେ ୫୦୦ କୁକୁଡା ପ୍ରଦାନ, ୨୫୫୦ କିଲେଗ୍ରାମ କୁକୁଡା ଦାନା ପ୍ରଦାନ ଆଦି ସମସ୍ତ ସହାୟତା ବାଲିଗୁଡା ସମନ୍ବିତ ଆଦିବାସୀ ଉନ୍ନୟନ ସଂସ୍ଥା ଦ୍ୱାରା ପ୍ରଦାନ କରାଯାଇଛି। ବର୍ତ୍ତମାନ ସମୟରେ ଦୈନିକ ହାରାହାରି ୪୨୦ରୁ ୪୩୦ ଅଣ୍ଡା କୁକୁଡା ଦେଉଥିବା ବେଳେ ଏହା ଗୋଟିକୁ ୫ଟଙ୍କା ଦରରେ ନିକଟସ୍ଥ ବଜାର ଓ ବ୍ୟବସାୟୀଙ୍କୁ ବିକ୍ରି କରାଯାଉଛି। ହାରାହାରି ଦୈନିକ ୨୧୫୦ ଟଙ୍କା ମହିଳାମାନେ ରୋଜଗାର କରୁଛନ୍ତି। ପ୍ରାରମ୍ଭିକ ପର୍ଯ୍ୟାୟରେ ଦୈନିକ ୩୨୫ ଟଙ୍କା ଲାଭ ମିଳୁଛି। ଆଗାମୀ ଦିନରେ ଅଣ୍ଡା ଦେବା ହାର ବଢ଼ିବ ଓ ରୋଜଗାର ବଢ଼ିବ ବୋଲି ମା’ ମାନେ ଆଶାବାଦୀ ଅଛନ୍ତି। ଓଡିଶା ଜୀବୀକା ମିଶନ ଆର୍ଥିକ ସହଯୋଗରେ ଓ ପ୍ରାଣୀ ସମ୍ପଦ ବିକାଶ ବିଭାଗର ବୈଷୟିକ ସହଯୋଗରେ ଆଉ ୫୦୦ ଅଣ୍ଡାଦିଆ କୁକୁଡା ଓ ଦାନା କ୍ରୟ କରି ବ୍ୟବସାୟ ବଢ଼ାଇବା ପାଇଁ ସ୍ବୟଂ ସହାୟିକା ଗୋଷ୍ଠିର ମା’ମାନେ ଆଗ୍ରହୀ ଅଛନ୍ତି। କୁକୁଡା ଦାନା କ୍ରୟ ନିମନ୍ତେ ବାହାର ଜିଲା ଉପରେ ନିର୍ଭର କରିବାକୁ ପଡୁ ଥିବାରୁ ଦାନା ଖର୍ଚ୍ଚ ଅଧିକ ପଡୁଛି। ତେଣୁ ଜିଲାରେ ଏକ ଦାନା ପ୍ରସ୍ତୁତି କେନ୍ଦ୍ର ଖୋଲିବା ପାଇଁ ମା’ମାନେ ଜିଲା ପ୍ରଶାସନକୁ ଅବଗତ କରିଛନ୍ତି।ବାଟାଗୁଡା ଗ୍ରାମର ଲକ୍ଷ୍ମୀବାଇ ସ୍ବୟଂ ସହାୟିକା ଗୋଷ୍ଠୀ ସଭାପତି ସୁଲତା ମଳିକ, ସମ୍ପାଦିକା ଲୁପୁଙ୍ଗି ମଳିକ, ସଦସ୍ୟ ନରଜୀନି ମଳିକ, ନିଖଜୀନି ଦିଗାଳ, ଟେଙ୍ଗ ଦିଗାଳ, ସୁମତି ଦିଗାଳ, ତୁଳସୀ ଦିଗାଳ ପ୍ରମୁଖ କୁହନ୍ତି ଆମେ ସରକାରଙ୍କ ଦ୍ୱାରା ଧାର୍ଯ୍ୟ ସମସ୍ତ ପ୍ରକାର ସହାୟତା ଏବଂ ସହଯୋଗ ପାଇଛୁ। ଆଗାମୀ ଦିନରେ ଆମେ ଅଣ୍ଡା ବ୍ୟବସାୟକୁ ଆହୁରି ଆଗକୁ ନେବୁ।