ରସୁଲପୁର,୩୧ା୮(ଡି.ଏନ.ଏ.): ଯାଜପୁର ଜିଲା ରସୁଲପୁର ବ୍ଲକର ଉତ୍ତର ସୀମାରେ ପ୍ରବାହିତ ମୂଳ ଖରସ୍ରୋତା ନଦୀକୁ ବଞ୍ଚାଇ ଚିରସ୍ରୋତା କରିବା ପାଇଁ ପୁନରୁଦ୍ଧାର ସମିତି ପକ୍ଷରୁ ପ୍ରୟାସ କରାଯାଉଛି। ଏ ନେଇ ସମିତି ପକ୍ଷରୁ ପ୍ରତ୍ୟେକ ମାସର ୩୦ ତାରିଖରେ ପଦଯାତ୍ରା କରାଯାଉଛି। ବ୍ଲକର ଅଞ୍ଚଳର ବିଭିନ୍ନ ପ୍ରାନ୍ତରୁ ପଦଯାତ୍ରାମାନ ଆୟୋଜନ କରାଯାଉଛି। ଏହିକ୍ରମରେ ବ୍ଲକ ଅଧୀନ ଭୋଟକା ପଞ୍ଚାୟତର ଇଚ୍ଛାପୁର ଜଗନ୍ନାଥ ମନ୍ଦିରଠାରୁ ପଦଯାତ୍ରା ଆରମ୍ଭ କରାଯାଇଥିଲା। ସମିତିର ଆବାହକ ଶିକ୍ଷାବିତ୍ କୈଳାସ ଚନ୍ଦ୍ର ନାୟକଙ୍କ ଆହ୍ବାନରେ ଆୟୋଜିତ ପଦଯାତ୍ରାରେ ଇଂ. ବିଶ୍ୱଜିତ୍ ମହାନ୍ତି ନେତୃତ୍ୱ ନେଇଥିଲେ। ଏହି ପଦଯାତ୍ରା ବିଭିନ୍ନ ଗଁା ଦେଇ ରସୁଲପୁର ବ୍ଲକରେ ପହଞ୍ଚତ୍ ଥିଲା। ଉକ୍ତ ପଦଯାତ୍ରୀମାନଙ୍କ ମଧ୍ୟରେ ପୂର୍ବତନ ସରପଞ୍ଚ ଗୋଲଖ ବିହାରୀ ମଲ୍ଲିକ, ବର୍ଷିୟାନ ସାମାଜିକ କର୍ମୀ ଲକ୍ଷ୍ମଣ ରାଉତ, ସୁଧାଶୁଂ ମିଶ୍ର, ଗୌରହରି ପତି, ରଘୁନାଥ ଦାସ, ବାଉରୀବନ୍ଧୁ ମହାନ୍ତ ପ୍ରମୁଖ ଥିଲେ। ପଦଯାତ୍ରୀମାନେ ବ୍ଲକ କାର୍ଯ୍ୟାଳୟରେ ପହଞ୍ଚତ୍ ମୁଖ୍ୟମନ୍ତ୍ରୀଙ୍କ ଉଦ୍ଦେଶ୍ୟରେ ଦାବିପତ୍ର ରସୁଲପୁର ବିଡିଓ ଅବନିକାନ୍ତ ସାହୁଙ୍କ ଜରିଆରେ ପ୍ରଦାନ କରିଥିଲେ। ବିଡିଓ ସାହୁ ଦାବିପତ୍ର ଗ୍ରହଣ କରିବା ସହ ଆସନ୍ତା ମଙ୍ଗଳବାର ନଦୀସ୍ଥଳ ପରିଦର୍ଶନ କରିବା ପରେ ଯାହାକିଛି ପଦକ୍ଷେପ ନେବେ ବୋଲି ସୂଚନା ଦେଇଥିଲେ। ପ୍ରକାଶଥାଉ କି ମୃତ ନଦୀକୁ ବଂଚାଇବା ପାଇଁ ସମିତି ପକ୍ଷରୁ ୫ବର୍ଷ ଧରି ଆନ୍ଦୋଳନ ଜାରି ରହିଛି। ଏ ଦିଗରେ ପ୍ରଶାସନ ପକ୍ଷରୁ ଆଖିଦୃଶିଆ ପଦକ୍ଷେପ ନିଆଯାଉନାହିଁ। ତେବେ ସମିତି ପକ୍ଷରୁ ନଦୀର ଉପରମୁଣ୍ଡ ଟିକରପଡାଠାରେ ଏକ ସ୍ଲୁଇସ୍ ଗେଟ୍ ନିର୍ମାଣ ପାଇଁ ଦାବି ହୋଇଆସୁଛି। ଚଳିତବର୍ଷ ଏହି ଦାବି ପୂରଣ ପାଇଁ ସମିତିର କାର୍ଯ୍ୟକର୍ତ୍ତାମାନେ ରାଜରାସ୍ତାକୁ ଓହ୍ଲାଇ ଥିବାର ଦେଖାଯାଉଛି। ପ୍ରଶାସନ ପକ୍ଷରୁ ଏ ଦିଗରେ କୌଣସି ପଦକ୍ଷେପ ନିଆ ନ ଗଲେ ସମିତି ପକ୍ଷରୁ ଆନ୍ଦୋଳନକୁ ନିର୍ଣ୍ଣାୟକ ମୋଡ ଦିଆଯିବ ବୋଲି ସମିତିର ସଭାପତି ଦେଣୁଧର ଦୋବାଇ ମତ ରଖିଛନ୍ତି।
